150 વર્ષમાં જેટલું ગ્લોબલ વોર્મિંગ વધ્યું એટલું 24 હજાર વર્ષમાં પણ વધ્યું ન હતું
- એરિઝોના યુનિવર્સિટીના સંશોધકોનો અહેવાલ નેચર જર્નલમાં પ્રસિદ્ધ થયો
- માનવ સર્જિત ગ્લોબલ વોર્મિંગનું પ્રમાણ અગાઉ ક્યારેય આટલું ઊંચું ન હતું, ગ્રીનહાઉસ ગેસનું ઉત્સર્જન જોખમી સ્તરેઃ સંશોધકોની ચેતવણી
વૉશિંગ્ટન : એરિઝોના યુનિવર્સિટીના સંશોધકોએ તૈયાર કરેલો ક્લાઈમેટ ચેન્જને લગતો અહેવાલ વિખ્યાત નેચર જનરલમાં પ્રસિદ્ધ થયો છે. નવી પદ્ધતિથી થયેલા અભ્યાસમાં જણાયું હતું કે છેલ્લાં ૧૫૦ વર્ષમાં ગ્લોબલ વોર્મિંગ વધ્યું છે એટલું છેલ્લાં ૨૪ હજાર વર્ષમાં પણ વધ્યું નથી. ક્લાઈમેટની દૃષ્ટિએ આ તબક્કો ખૂબ જ જોખમી હોવાનું સંશોધકોએ કહ્યું હતું.
એરિઝોના યુનિવર્સિટીના સંશોધકોએ વિવિધ સેમ્પલના આધારે છેલ્લાં હિમયુગથી લઈને અત્યાર સુધીના તાપમાનનો તુલનાત્મક અભ્યાસ કર્યો હતો. સમુદ્રમાંથી મળેલા સજીવોના અવશેષો પર જે તે વખતે થયેલી તાપમાનની અસરોનું વિશ્લેષણ કર્યા બાદ અને તેનો કમ્પ્યુટર મેથડમાં અભ્યાસ કર્યા બાદ તારણ આપ્યું હતું કે છેલ્લાં હિમયુગ પછી પહેલી વખત આટલું તાપમાન વધ્યું છે.
પ્રોફેસર જેસિકા ટેર્નીએ કહ્યું હતું કે માનવ સર્જિત ગતિવિધિના કારણે છેલ્લાં ૧૫૦ વર્ષથી પૃથ્વીનું તાપમાન વધ્યું છે. આટલું તાપમાન છેલ્લાં ૨૪૦૦૦ વર્ષથી વધ્યુ ન હતું. તાપમાનનો વધારો કુદરતી કારણોસર ૧૦ હજાર વર્ષ પહેલાં શરૂ થયો હતો, પરંતુ એનું પ્રમાણ ઘણું નીચું હતું અને તે ફરીથી રિકવર થઈ જતું હતું એવું પણ અહેવાલમાં કહેવાયું હતું.
વિવિધ મેથડના આધારે એરિઝોના યુનિવર્સિટીના સંશોધકોએ ૨૦૦-૨૦૦ વર્ષના ગાળાના તાપમાનનો અભ્યાસ કર્યો હતો. એમાં છેલ્લાં ૨૦૦ વર્ષમાં તાપમાનમાં અભૂતપૂર્વ વધારો જોવા મળ્યો હતો. તેની પાછળ દેખીતા માનવ સર્જિત કારણો પણ જણાયા હતા. સંશોધકોનો અહેવાલ વિખ્યાત નેચર જર્નલમાં પ્રસિદ્ધ થયો હતો.
પ્રોફેસર જેસિકા ટેર્નીએ કહ્યું હતું કે આપણે ગ્લોબલ વોર્મિંગની એ હદ વટાવી ચૂક્યા છે જેને સાધારણ કહી શકાય. હવે માનવજાત ખૂબ જ જોખમી તબક્કામાં પહોંચી ચૂકી છે. હવે ચેતવણીનો સમય પણ વીતી ચૂક્યો છે. આ સમયગાળો પૃથ્વી અને માનવજાત માટે ખૂબ જ ખતરનાક છે. ગ્રીનહાઉસ ગેસનું ઉત્સર્જન છેલ્લાં ૨૦૦ વર્ષમાં જેટલું વધ્યું છે એટલું અગાઉ ક્યારેય વધ્યું ન હતું. ૨૧મી સદીના બે દશકામાં ગ્રીનહાઉસ ગેસનું ઉત્સર્જન સતત વધી રહ્યું છે અને એના કારણે આગામી દશકામાં ગંભીર પરિણામો ભોગવવા પડશે એવું પણ તેમણે કહ્યું હતું.
from Top Stories News - Gujarat Samachar : World's Leading Gujarati Newspaper https://ift.tt/3wB3huy
via IFTTT
ટિપ્પણીઓ નથી: