ચીનના અત્યાચારનો પર્દાફાશઃ સામાજીક કાર્યકરે જાનના જોખમે ઉઈગર મુસ્લિમોને રખાયા છે તે કેમ્પોનુ રેકોર્ડિંગ કર્યુ

નવી દિલ્હી,તા.21.નવેમ્બર,2021

ચીનમાં ઉઈગર મુસ્લિમોનુ દમન કરવામાં આવતુ હોવાનુ તો ઘણા વખતથી દુનિયા જાણી ચુકી છે પણ એક સોશિયલ વર્કરે ચીન દ્વારા ઉઈગર મુસ્લિમો પરના અત્યાચારોને કેમેરામાં કેદ કરીને દુનિયા સમક્ષ મુકયા છે.

એક બ્રિટિશ અખબારના અહેવાલ પ્રમાણે મૂળે ચીનના સોશિયલ વર્કર ગુઆન ગુઆન ચીનના ઝિજિયાંગ પ્રાંતમાં ટુરિસ્ટ બનીને પહોંચ્યા હતા.તેમણે પોતાની બેગમાં ગુપ્ત કેમેરા ફિટ કર્યો હતો.આ કેમેરા વડે તેમણે એવા કેમ્પના વિડિયો ઉતાર્યા હતા જ્યાં ચીનના ઉઈગર મુસ્લિમોને રાખવામાં આવ્યા છે અને તેમા પર ચીન સરકાર અત્યાચાર કરી રહી છે.

આ કાર્યકરને ખબર હતી કે, જો હું પકડાયો તો ચીનની સામ્યવાદી સરકાર તેમના કરતૂતો ઉઘાડા પાડવાના પ્રયાસ બદલ મને ભયાનક સજા કરશે.કદાચ એવુ પણ બને કે જે કેમ્પોની જાણકારી મેળવવા માટે હું આવ્યો છું ત્યાં જ મને ધકેલી દેવામાં આવે.

આમ છતા હિંમતભેર ગુઆન ગુઆને આ વિસ્તારમાં બે વર્ષ ફરીને કેમેરામાં આ કેમ્પના વિડિયો કેદ કર્યા છે.તે આઠ શહેરોમાં ફર્યા હતા અને 18 કેમ્પ અંગે જાણકારી મેળવી હતી.જેમાંનો એક કેમ્પ તો 1000 યાર્ડમાં ફેલાયેલો છે.કેટલાક કેમ્પ તો નકશા પર છે પણ નહીં.કેમ્પની ચારે તરફ કાંટાળી વાડો, ગાર્ડ ટાવર, પોલીસ ચેક પોઈન્ટ , આર્મી બેરેક અને ઉંચી દિવાલોને તેમણે કેમેરા પર રેકોર્ડ કરી હતી.

ગુઆને આ કેમ્પ ક્યાં છે તે જાણવા સેટેલાઈટ ઈમેજની મદદ લીધી હતી.ગુઆનનુ કહેવુ છે કે, તમામ કેમ્પો પર વોચ ટાવર લગાવાયા છે.જેથી અંદર અને બહાર નજર રાખી શકાય.

from Top Stories News - Gujarat Samachar : World's Leading Gujarati Newspaper https://ift.tt/3DDvqUB
via IFTTT