સમાજવાદી પાર્ટીના નેતા અબૂ આજમીની મુશ્કેલી વધી, કંપની સામે નકલી દસ્તાવેજ-સહી મામલે FIR દાખલ

વારાણસી, તા.19 ઓક્ટોબર-2023, ગુરુવાર

સમાજવાદી પાર્ટી (Samajwadi Party)ના ધારાસભ્ય અને પૂર્વ સાંસદ અબૂ આજમી (Abu Azmi) જે વિનાયક ગ્રુપ (Vinayak Group)ના પાર્ટનર છે, તેની સામે વારાણસી ડેવલપમેન્ટ ઓથોરિટી (Varanasi Development Authority)એ FIR નોંધાવી છે. ઈન્કમટેક્સની ટીમે વિનાયક ગ્રુપના પાર્ટનર અબૂ આસિમ આજમીના ઠેકાણાઓ પર તાજેતરમાં જ દરોડા પાડ્યા હતા, જેમાં વારાણસી ડેવલપમેન્ટ ઓથોરિટીના નામના નકલી દસ્તાવેજો મળી આવ્યા છે, ઉપરાંત તે દસ્તાવેજો પરની સહીઓ પણ નકલી છે, ત્યારે VDAની ફરિયાદ બાદ કેન્ટ પોલીસે વિનાયક ગ્રુપ વિરુદ્ધ એફઆઈઆર નોંધી છે.

IT વિભાગે મુંબઈ, લખનઉ, વારાણસીમાં પાડ્યા હતા દરોડા

ઈન્કમટેક્સ વિભાગની ટીમે વારાણસીમાં તાજેતરમાં જ સમાજવાદી પાર્ટીના મહારાષ્ટ્ર અધ્યક્ષ અબૂ આજમીના ઠેકાણાઓ પર દરોડા પાડ્યા હતા, જેમાં વિનાયક ગ્રુપ દ્વારા ઉભી કરાયેલી પ્રોપર્ટી પણ સામેલ હતી. વિભાગે પહેલા મુંબઈ અને લખનઉમાં દરોડા પાડ્યા હતા, ત્યારબાદ વારાણસીમાં એક સાથે ઘણા ઠેકાણાઓ પર દરોડા પડાયા હતા, જેમાં તપાસ દરમિયાન ઘણી લેવડ-દેવડ પર આશંકા થઈ હતી. IT વિભાગની ટીમે 100થી વધુ ફાઈલો અને બેંકના દસ્તાવેજો પણ જપ્ત કર્યા હતા. ટીમે વિભાગને માહિતી આપી છે કે, દરોડા દરમિયાન જપ્ત કરાયેલા દસ્તાવેજોમાંથી VDAના નામના દસ્તાવેજો નકલી હોવાનું સામે આવ્યું છે.

દસ્તાવેજો અને હસ્તાક્ષર નકલી હોવાનું સામે આવ્યું

વિનાયક ગ્રુપના ડાયરેક્ટરે વારાણસીમાં તપાસ દરમિયાન ઈન્કમટેક્સ વિભાગની ટીમને VDAની મંજુરીવાળા દસ્તાવેજો દેખાડ્યા હતા, જેને વિભાગે તપાસ માટે જપ્ત કર્યા હતા. વિભાગે આ દસ્તાવેજો VDAને મોકલ્યા તો તમામ દસ્તાવેજો નકલી હોવાનું સામે આવ્યું છે, તે દસ્તાવેજો પરની સહીઓ પણ નકલી છે. ઉપરાંત દસ્તાવેજોમાં ખોટી માહિતી પણ અપાઈ છે. આ ખુલાસા બાદ આયકર વિભાગે ઓથોરિટીને પત્ર લખી આરોપીઓ વિરુદ્ધ કાર્યવાહી કરવાની વાત કહી હતી. ઓથોરિટીએ આયકર વિભાગને કેટલાક નામો પણ આપ્યા હતા.

from Top Stories News - Gujarat Samachar : World's Leading Gujarati Newspaper https://ift.tt/Ce9t52h
via IFTTT