પુત્રના અપહરણની ફરિયાદ કરવા ગયેલી મહિલાને પોલીસે કરી અપમાનિત, ફેસબૂક લાઈવ પર કર્યો આપઘાત

નવી દિલ્હી,તા.11.જુલાઈ.2021

ભારતમાં પોલીસ દ્વારા લોકોને મદદ કરવાની જગ્યાએ તેમને દબડાવવામાં અને ધમકાવવામાં આવતા હોવાના કિસ્સા સામાન્ય છે.

વર્ષોથી આ સિસ્ટમ ચાલી આવે છે અને પોલીસ સુધરવા માટે તૈયાર નથી.યુપીના બાંદામાં તો પુત્રના અપહરણની ફરિયાદ લખાવવા ગયેલી મહિલાને પહેલા તો પોલીસે સવારથી સાંજ સુધી બેસાડી રાખી હતી.એ પછી ફરિયાદ લખવાની જગ્યાએ મહિલાના ભાઈને જ લોકઅપમાં પૂરી દીધો હતો.એવો આરોપ છે કે, પોલીસે અપહરણ કરવાનો જેમના પર આરોપ હતો તેમના કહેવા પર મહિલાના ભાઈને લોકઅપમાં નાંખી દીધો હતો.

પોલીસ સ્ટેશનમાં થયેલા અપમાન બાદ ઘરે પાછી ફરેલી મહિલાને એટલુ લાગી આવ્યુ હતુ કે, તેણે ફેસબૂક લાઈવ કરીને સુસાઈડ કરી લીધો હતો.આ મહિલાને બે પુત્રીઓ છે , જેમાં એક મોડેલ છે અને ઘણા ફેશન શોમાં ભાગ લઈ ચુકી છે.

આત્મહત્યા કરનાર મહિલાનુ નામ સુધા ચંદ્રવશી રૈકવાર છે.તેમના પુત્ર દિપકનુ શુક્રવારે કેટલાક લોકોએ અપહરણ કર્યુ હતુ.તેમની સામે ફરિયાદ કરવા માટે સુધા ચંદ્રવંશી પોલીસ મથકે ગયા હતા.જોકે પોલીસે ઉલટાની તેમની જ હેરાનગતી કરી હતી.સુધા ચંદ્રવંશીના મોત બાદ તેમના પરિવારજનોએ પોલીસ પર ગુનેગારો સાથે મળીને કામ કરવાનો આરોપ મુક્યો છે.હોસ્પિટલમાં પરિવારજનો અને પોલીસ વચ્ચે ટપાટપી પણ થઈ હતી.

પોલીસે આ મામલાની ગંભીરતા પર ઢાંકપિછોડો કરવાના પણ પૂરા પ્રયાસો કર્યા હતા.ઉહાપોહ વધી ગયો છે ત્યારે હવે ઉપરી અધિકારીઓ મામલાની તપાસ કરવામાં આવશે તેવુ કહી રહ્યા છે.

from Top Stories News - Gujarat Samachar : World's Leading Gujarati Newspaper https://ift.tt/3B0Tvns
via IFTTT