૧૩ રાજ્યની ૨૯ વિધાનસભા બેઠકમાંથી ભાજપનો ૭માં વિજય

નવી દિલ્હી, તા.૨
દેશમાં આગામી વર્ષે પાંચ રાજ્યોની વિધાનસભા ચૂંટણી પહેલાં ૧૩ રાજ્યોની ૨૯ વિધાનસભા અને ત્રણ લોકસભા બેઠકો પર મંગળવારે જાહેર થયેલા પરિણામો ભાજપ માટે આંખ ઉઘાડનારા સાબિત થયા છે. હિમાચલ અને બંગાળમાં ભાજપે કારમા પરાજયનો સામનો કરવો પડયો છે. જોકે, આસામે ભાજપની લાજ રાખી હતી તેમજ બિહાર અને પૂર્વોત્તરના રાજ્યોએ એનડીએને વધુ બેઠકો અપાવી હતી. ૨૯ વિધાનસભા બેઠકોમાં કોંગ્રેસે સૌથી વધુ આઠ બેઠક જીતીને ભાજપને આગામી ચૂંટણીઓ માટે સીધો પડકાર ફેંક્યો છે. વિધાનસભા બેઠકોમાં પક્ષ તરીકે કોંગ્રેસે સૌથી વધુ બેઠકો જીતી છે જ્યારે સાથી પક્ષોની મદદથી એનડીએએ ૩૦માંથી કુલ ૧૧ બેઠકો જીતી હતી. પેટા ચૂંટણીઓમાં હિમાચલ સિવાય મોટાભાગે રાજ્યોના શાસક પક્ષોનું પ્રભુત્વ રહ્યું હતું.

દેશમાં ૧૩ રાજ્યોની ૨૯ વિધાનસભા બેઠકોમાંથી એનડીએએ ૧૬, કોંગ્રેસે આઠ, તૃણમૂલ કોંગ્રેસે ચાર બેઠકો કબજે કરી હતી જ્યારે બે બેઠકો અન્ય પક્ષોના ખાતામાં ગઈ હતી. લોકસભાની ત્રણમાંથી ભાજપ, કોંગ્રેસ, શિવસેનાએ એક-એક બેઠક જીતી હતી. વિધાનસભા ચૂંટણીઓમાં કોંગ્રેસે હિમાચલ ઉપરાંત રાજસ્થાન અને કર્ણાટકમાં પણ ભાજપને પછાડયો છે. રાજસ્થાનમાં કોંગ્રેસે પોતાની બેઠક જાળવી રાખવાની સાથે ભાજપની એક બેઠક પણ આંચકી લીધી છે.
હિમાચલ પ્રદેશમાં કોંગ્રેસે દિવાળી પહેલાં ભાજપને આંચકો આપતા તેના સુપડા સાફ કરી દીધા છે. હિમાચલમાં લોકસભાની એક અને વિધાનસભાની ત્રણ બેઠકો પર ચૂંટણી યોજાઈ હતી. આ બધી જ બેઠકો પર કોંગ્રેસે વિજય મેળવીને ભાજપનો સફાયો કરી નાંખ્યો હતો. રાજ્યમાં ફતેહપુર, જુબ્બલ કોટખાઈ, અર્કી વિધાનસભા બેઠકો કોંગ્રેસે જીતી લીધી એટલું જ નહીં, જુબ્બલ કોટખાઈ બેઠક પર તો ભાજપના ઉમેદવારની ડિપોઝીટ પણ જપ્ત થઈ ગઈ હતી. હિમાચલમાં આગામી વર્ષે વિધાનસભાની ચૂંટણી યોજાવાની છે ત્યારે આ પરાજયથી વિપક્ષ ભાજપ સામે આક્રમક મોડમાં આવી ગયું છે. ભાજપની હારની સીધી અસર મુખ્યમંત્રી જયરામ ઠાકુરના રાજકીય કદ પર પડશે. જોકે, હિમાચલમાં પક્ષના પરાજયના કારમા પરાજયનું ઠીકરું મુખ્યમંત્રી જયરામ ઠાકુરે કેન્દ્ર પર ફોડયું છે. તેમણે કહ્યું કે વધતી મોંઘવારીના કારણે ભાજપે કારમા પરાજયનો સામનો કરવો પડયો છે.
પશ્ચિમ બંગાળમાં વિધાનસભાની પેટા-ચૂંટણીમાં શાસક તૃણમૂલ કોંગ્રેસે ચારેય બેઠક પર કબજો જમાવ્યો છે. તૃણમૂલે પેટા ચૂંટણીમાં પોતાની બે બેઠક બચાવવાની સાથે બે બેઠકો ભાજપ પાસેથી આંચકી લીધી છે. તૃણમૂલે બે બેઠકો પર એક લાખ તેમજ અન્ય બે બેઠકો પર ૫૦ હજારથી વધુ મતોના તફાવતથી વિજય નોંધાવ્યો છે. બંગાળમાં તૃણમૂલે ચાર બેઠકો પર ૭૫ ટકાથી વધુ મતો મેળવ્યા છે જ્યારે બાકીના ૨૫ ટકા મત ભાજપ અને અન્ય પક્ષોને મળ્યા છે.

બંગાળમાં તૃણમૂલ કોંગ્રેસના જંગી વિજયથી ૨૦૨૪ની લોકસભા ચૂંટણી પૂર્વે ભાજપના વિરોધમાં વિપક્ષને એકત્ર કરવાના મમતા બેનરજીના અભિયાનને બળ મળશે. મમતા બેનરજીએ વિજયની ઊજવણી કરતાં ટ્વીટ કરીને જણાવ્યું કે, વિજેતા ચારેય ઉમેદવારોને અભિનંદન. આ વિજય દર્શાવે છે કે બંગાળ હંમેશા ખોટા પ્રચાર અને ધિક્કારના રાજકારણ કરતાં વિકાસ અને એકતાને પસંદ કરશે. બીજીબાજુ બંગાળ ભાજપના પ્રમુખ સુકાન્તા મજુમદારે રાજ્યમાં તૃણમૂલના 'આતંકના ભય'ને કારણે ભાજપનો પરાજય થયો હોવાનો દાવો કર્યો હતો. તેમણે ઉમેર્યું કે, પેટા ચૂંટણીમાં એક લાખ કરતાં વધુ મતોના અંતરનો વિજય સ્પષ્ટપણે દર્શાવે છે કે લોકો શાસક પક્ષથી એટલા બધા ભયભીત થઈ ગયા છે કે તેઓ મુક્ત અને ન્યાયી રીતે મતદાન પણ કરી શકતા નથી.
દરમિયાન બિહાર અને પૂર્વોત્તરના ચાર રાજ્યોમાં પેટા ચૂંટણીના પરિણામોએ ભાજપના નેતૃત્વમાં એનડીએની પ્રતિષ્ઠા બચાવી હતી. પૂર્વોત્તરના ચાર રાજ્યોમાં વિધાનસભાની ૧૦ બેઠકોની પેટા ચૂંટણીમાં બધી જ બેઠકો ભાજપ અને તેના સાથી પક્ષોએ કબજે કરી છે. આસામમાં પાંચ બેઠકોમાંથી ૩ ભાજપે જીતી જ્યારે બાકીની બે તેના સહયોગી પક્ષ યુનાઈટેડ પીપલ્સ પાર્ટી લિબરલે જીતી હતી. આ વિજય પછી આસામના મુખ્યમંત્રી હેમંત બિશ્વા સરમાએ કહ્યું કે, આજનો વિજય આશ્વસ્ત કરનારો છે. અમે પીએમ મોદીના વિઝન પર વિકાસના માર્ગે આગેકૂચ ચાલુ રાખવાનું વચન આપીએ છીએ. મેઘાલયમાં ભાજપના સાથી પક્ષ નેશનલ પીપલ્સ પાર્ટીએ ૩માંથી બે બેઠકો જીતી જ્યારે એક બેઠક યુનાઈટેડ ડેમોક્રેટિક પાર્ટીના ખાતામાં ગઈ હતી. મિઝોરમમાં પણ ભાજપના સાથી પક્ષ મિઝો નેશનલ ફ્રન્ટે બેઠક જીતી હતી. એમએનએફ પાસે હવે રાજ્યની ૪૦ વિધાનસભા બેઠકોમાંથી ૨૮ બેઠકો છે. બિહારમાં વિધાનસભાની કુશેશ્વરસ્થાન અને તારાપુર બે બેઠકો એનડીએના સાથી જેડીયુએ જીતી લીધી છે.

from Top Stories News - Gujarat Samachar : World's Leading Gujarati Newspaper https://ift.tt/3EFU3Qs
via IFTTT