મોબાઈલ ફોન પર સમય બગાડવામાં ભારતીયો મોખરે, અમેરિકા-ચીન પાછળ

નવી દિલ્હી, તા.૧૪
દુનિયામાં સૌથી સસ્તો ઈન્ટરનેટ ડેટા ભારતમાં મળે છે.  આ જ કારણથી મોબાઈલ ફોન પર સમય બગાડવામાં ભારતીયો વિશ્વમાં ટોચે છે. ભારતે મોબાઈલ પર સમય પસાર કરવામાં અમેરિકા, ચીનને પણ પાછળ પાડી દીધા છે. ભારતમાં ૧ જીબી ડેટાની કિંમત ૧ કિલો લોટ કરતાં પણ ઓછી છે. તેથી જ ભારતીયો ઈન્ટરનેટ અને મોબાઈલનો અંધાધૂંધ ઉપયોગ કરી રહ્યા છે. વર્ષ ૨૦૨૧માં ભારતીયોમાં મોબાઈલ પર ઓનલાઈન ગેમિંગ, ઓટીટી વ્યૂના પ્રમાણમાં નોંધપાત્ર વધારો થયો છે.
વર્ષ ૨૦૨૧માં ભારતમાં ૧ જીબી ડેટા માટે ટેલિકોમ કંપનીઓ ૧૦.૯૩ રૂપિયા ચાર્જ કરી રહી છે, જે દુનિયાના કોઈપણ દેશના પ્રતિ જીબી ડેટા ચાર્જથી ઓછો છે. વર્ષ ૨૦૧૪ સુધી ભારતીયોએ પ્રતિ ૧ જીબી ડેટા માટે સરેરાશ રૂ. ૨૬૯નો ખર્ચ કરવો પડતો હતો. છેલ્લા છ વર્ષમાં ભારતમાં ઈન્ટરનેટ ડેટાના ભાવમાં અંદાજે ૯૬ ટકા સુધીનો ઘટાડો જોવા મળ્યો છે.
મોબાઈલ ડેટા એનાલિટિક્સ પ્લેટફોર્મ એપ એનીના મોબાઈલ માર્કેટ સ્પોટલાઈટ રિપોર્ટ ૨૦૨૧ મુજબ સૌથી સસ્તા મોબાઈલ ઈન્ટરનેટ ડેટા અને કોલિંગના કારણે વધુમાં વધુ ભારતીયો મોબાઈલ ઈન્ટરનેટ કનેક્ટિવિટી સાથે જોડાઈ રહ્યા છે અને મોબાઈલ પર આડેધડ તેમનો સમય પસાર કરી રહ્યા છે. આ બાબતમાં ભારતે અમેરિકા અને ચીન જેવા દેશોને પણ પાછળ પાડી દીધા છે.
રિપોર્ટ મુજબ વર્ષ ૨૦૨૧ના ત્રીજા ત્રિમાસિકમાં ભારતમાં પ્રત્યેક વ્યક્તિ સરેરાશ એક દિવસમાં ૪.૬ કલાક તેના સ્માર્ટફોન પર પસાર કર્યો હતો. વર્ષ ૨૦૧૯ સુધીમાં એક દિવસમાં એક ભારતીય સરેરાશ ૩.૩ કલાક જેટલો સમય મોબાઈલ પર બગાડતો હતો, જેમાં છેલ્લા એક વર્ષમાં ૪૪ ટકાનો વધારો નોંધાયો છે. ભારતીયો સૌથી વધુ યુટયુબ, વોટ્સએપ, મેસેન્જર અને ફેસબૂક સોશિયલ મીડિયાનો ઉપયોગ કરે છે. ભારતીયોએ વર્ષ ૨૦૨૦માં ૬૫,૧૦૦ કરોડ કલાક મોબાઈલ એપ્સ અને ઓનલાઈન ગેમિંગ પર બગાડયા હતા.
એરિક્સન મોબિલિટીના રિપોર્ટ મુજબ ૨૦૧૯માં ભારતમાં સરેરાશ માસિક ડેટા વપરાશ ૧૩ જીબી હતો, જે વર્ષ ૨૦૨૦માં વધીને માસિક ૧૪.૬ જીબી થઈ ગયો હતો. ૨૦૨૧ના પહેલા છ માસમાં સૌથી વધુ ગેમિંગ એપ ડાઉનલોડ ભારતમાં થઈ છે. આ બાબતમાં પણ ભારતે વિશ્વના અન્ય દેશોને પાછળ પાડી દીધા છે. ભારતમાં આ સમયમાં અંદાજે ૪૮૦ કરોડ ગેમિંગ એપ્સ ડાઉનલોડ કરવામાં આવી હતી. જોકે, ૨૦૨૧માં ઓનલાઈન સ્કૂલ અને વર્ક ફ્રોમ હોમ પણ મોબાઈલ વપરાશમાં વધારાના મહત્વના કારણ હતા.
દુનિયામાં સૌથી વધુ વસતીમાં બીજા ક્રમે આવતા ભારતમાં મોટાભાગની વસતી હજુ પણ ફીચર ફોન અને ૨જી સર્વિસનો ઉપયોગ કરી રહી છે તેવા સમયે ભારતમાં આ સ્થિતિ છે. ભારતમાં સ્માર્ટફોનની કિંમતો ઘટવાથી સ્માર્ટફોન વપરાશકારોની સંખ્યામાં નોંધપાત્ર વધારો થવાની સંભાવના છે. સાથે જ દરરોજ સરેરાશ મોબાઈલ વપરાશના કલાકમાં પણ નોંધપાત્ર વધારો જોવા મળી રહ્યો છે. આગામી વર્ષ સુધીમાં ભારતમાં ૫જી સર્વિસ શરૂ થવાની સંભાવના છે. એવામાં ડેટાનો વપરાશ પણ વધવાની આશા છે.
૨૦૨૧ના પ્રથમ છ માસમાં ગેમિંગ એપ ડાઉનલોડ
ભારત     ૪૮૦ કરોડ
અમેરિકા     ૨૩૦ કરોડ
બ્રાઝિલ    ૨૧૦ કરોડ
ઈન્ડોનેશિયા    ૧૭૦ કરોડ
રશિયા    ૧૩૦ કરોડ

from Top Stories News - Gujarat Samachar : World's Leading Gujarati Newspaper https://ift.tt/3HpKrvE
via IFTTT