રાંધણ ગેસના ભાવમાં રૂ. 50નો વધારો, ગુજરાતમાં રૂ. 1,000ને પાર

- એલપીજી બાટલાના ભાવમાં દોઢ મહિનામાં રૂ.100નો વધારો, દોઢ વર્ષમાં કિંમત ત્રણ ગણી વધી

- નવે.20માં રૂ. 600, જૂન 2021માં રૂ.814નું સિલિન્ડર હવે રૂ.1007નું થયું : દિલ્હીમાં ભાવ રૂ. 999.50

નવી દિલ્હી : દેશમાં અતિ મોંઘવારીના મારનો સામનો કરી રહેલી સામાન્ય જનતા પર શનિવારે વધુ એક બોજ આવી પડયો છે. સરકારી ઓઈલ કંપનીઓએ માત્ર છ સપ્તાહમાં બીજી વખત ઘરેલુ રાંધણ ગેસના ભાવમાં પ્રતિ સિલિન્ડર રૂ. ૫૦નો વધારો કર્યો છે, જેને પગલે દેશના મોટાભાગના શહેરોમાં ૧૪.૨ કિલોના સબસિડી વગરના સિલિન્ડરની કિંમત રૂ. ૧,૦૦૦ને પાર થઈ ગઈ છે. ગુજરાતમાં પણ દોઢ મહિનામાં એલપીજી સિલિન્ડરનો ભાવમાં ૧૦૦ રૂપિયાનો વધારો થતાં કિંમત રૂ. ૧,૦૦૦ને પાર થયો છે. અગાઉ, ૧૯ કિલોના કોમર્શીયલ સિલિન્ડરના ભાવમાં રૂ. ૧૦૨.૫નો વધારો થતા કિંમત રૂ. ૨૩૫૫ને પાર થઈ હતી.

આંતરરાષ્ટ્રીય સ્તરે ક્રૂડના ભાવ વધતા અને દેશમાં સરકારે ઘરેલુ રાંધણગેસ પરની સબસિડી પરોક્ષ રીતે ખતમ કરતા એલપીજીના ભાવ રૂ. ૧,૦૦૦ને પાર થઈ ગયા છે. એલપીજીના ભાવમાં વધારો  શનિવારથી અમલી કરાયો છે. આ વધારાના પગલે ગુજરાતમાં મોટાભાગના શહેરોમાં ૧૪.૨ કિલોના ઘરેલુ રાંધણ ગેસનો ભાવ રૂ. ૧,૦૦૦ને પાર થઈ ગયો છે. નવેમ્બર-૨૦૨૦માં કોરોના કાળ વખતે રાંધણગેસ બાટલાનો ભાવ રૂ.૬૦૦ હતો, જે જૂન-૨૦૨૧માં વધીને રૂ.૮૧૪ થયો હતો. પેટ્રોલ, ડીઝલ, એલપીજી સહિતની પેટ્રોલિયમ પેદાશોના ભાવમાં સામાન્ય રીતે દરેક મહિનાની પહેલી અને ૧૫મી તારીખે ભાવમાં ફેરફાર કરવામાં આવે છે. જોકે, માર્ચ ૨૦૨૨માં ૨૨મી તારીખે પેટ્રોલ અને ડીઝલના ભાવમાં વધારાની સાથે ઘરેલુ એલપીજીના ભાવમાં પણ રૂ.૫૦નો વધારો કરાયો હતો. ત્યાર પછી એપ્રિલમાં એલપીજીમાં કોઈ વધારો કરાયો નહોતો. હવે આજે તા.૭ મેની મધ્યરાત્રિથી ૫૦નો વધારો ઝીંકી દેવાયો છે. આમ, માત્ર દોઢ વર્ષના સમયમાં રાંધણગેસ રૂ.૬૦૦થી વધીને રૂ.૧૦૦૫ ઉપર થઈ ગયો છે. એટલે કે આ સમયમાં એલપીજીના ભાવમાં ૨૦૦ ટકાનો ભાવ વધારો થયો છે. આમ આ સમયમાં એલપીજી સિલિન્ડર ત્રણ ગણા કરતા વધુ મોંઘો થયો છે. 

રાષ્ટ્રીય રાજધાની દિલ્હીમાં હવે સબસિડી વગરના ૧૪.૨ કિલોના એલપીજી સિલિન્ડરનો ભાવ રૂ. ૯૯૯.૫૦ થઈ ગયો છે, જે અગાઉ રૂ. ૯૪૯.૫૦ હતો. અગાઉ માર્ચ ૨૨માં ઘરેલુ રાંધણ ગેસના ભાવમાં પ્રતિ સિલિન્ડર રૂ. ૫૦નો વધારો કરાયો હતો. એપ્રિલ ૨૦૨૧થી અત્યાર સુધીમાં ઘરેલુ રાંધણ ગેસના ભાવમાં પ્રતિ સિલિન્ડર રૂ. ૧૯૦નો વધારો કરાયો છે.

અગાઉ આ મહિનાની શરૂઆતમાં કોમર્શિયલ એલપીજી, કે જે કારખાના ઉપરાંત ખાસ કરીને હોટલ-રેસ્ટોરાંમાં વપરાય છે, તેના ભાવમાં ૧૦૨.૫૦ રૂપિયાનો વધારો કરવામાં આવ્યો હતો. આથી ૧૯ કિલોના કોમર્શિયલ એલપીજીનો ભાવ પ્રતિ સિલિન્ડર રૂ. ૨૩૫૫.૫૦ થયો હતો. વધુમાં પાંચ કિલોના એલપીજી કોમર્શિયલ સિલિન્ડરના ભાવ વધારીને રૂ. ૬૫૫ કરી દેવાયા હતા. આ પહેલાં એપ્રિલના પ્રારંભમાં ૧૯ કિલોના કોમર્શિયલ એલપીજી સિલિન્ડરના ભાવમાં રૂ. ૨૫૦નો વધારો કરાયો હતો, ત્યાર પછી તેની કિંમત રૂ. ૨,૨૫૩ થઈ ગઈ હતી.

બીજીબાજુ છેલ્લા એક મહિનાથી પેટ્રોલ અને ડીઝલના ભાવમાં કોઈ વધારો કરાયો નથી. દેશમાં ઉત્તર પ્રદેશ, પંજાબ સહિત પાંચ રાજ્યોની ચૂંટણીના પરિણામો પછી ૨૨મી માર્ચથી ૧૬ દિવસમાં પેટ્રોલ અને ડીઝલ પર અંદાજે પ્રતિ લીટર રૂ. ૧૦નો વિક્રમી વધારો કરાયા પછી હાલ તેના ભાવ સ્થિર રાખવામાં આવ્યા છે.

from Top Stories News - Gujarat Samachar : World's Leading Gujarati Newspaper https://ift.tt/KprC59v
via IFTTT