ડેટા આપો નહી તો સોદો રદ્દ: ટ્વીટરને ઈલોન મસ્કની ચેતવણી

 

અમદાવાદ, 6 જુન : વિશ્વના સૌથી ધનિક વ્યક્તિ ઈલોન મસ્કે માઈકોબ્લોગીંગ વેબ્સાઈટ ટ્વીટર ખરીદવા માટે કરેલી ઓફર પોતે પરત ખેચી લેશે એવા અહેવાલ મળી રહ્યા છે. ટ્વીટરના કુલ યુઝર્સમાં ૨૫ ટકા જેટલા લોકો ખોટા નામે છે અથવા તો એક જ વ્યક્તિના અનેક ટ્વીટર હેન્ડલ છે એવું મસ્ક માની રહ્યા છે. આ અંગે મે મહિનામાં ટ્વીટરને ચોક્કસ માહિતી આપવા માટે મસ્કે ચેતવણી આપી હતી. બીજી તરફ, ટ્વીટર જણાવે છે કે માત્ર ચારથી પાંચ ટકા હેન્ડલ જ એવા છે કે જે ખોટા છે અને તેને દૂર કરવામાં આવી રહ્યા છે. મસ્કે ટ્વીટર ખરીદવા માટે ૫૪.૨૦ ડોલર પ્રતિ શેર ખરીદી ૪૪ અબજ ડોલરની ઓફર કરી હતી.

આ પણ વાંચો : 'જો હું શંકાસ્પદ સ્થિતિમાં મરી જાઉં તો...', એલોન મસ્કની ટ્વિટથી ખળભળાટ

ટ્વીટરને એક પત્રમાં મસ્કે પોતાની કંપની ટેસ્લા મારફત જાણ કરી છે કે ટ્વીટર ખરીદવા માટે જે માહિતી જોઈએ છે તે મળી રહી નથી અને કંપની જવાબદારી આપવામાં નિષ્ફળ ગઈ છે. આ સ્થિતિમાં ઈલોન મસ્ક અને ખરીદદારો માર્ચ મહિનામાં કરેલી ઓફર રદ્દ કરવાના હક્કદાર છે. અગાઉ, મસ્કે માહિતી મેળવવા માટે થઇ સોદાને કામચલાઉ રીતે અટકાવી દેવાની જાહેરાત કરી હતી. 

ટેસ્લાના સીઈઓ ઈલોન મસ્ક અને ટ્વિટરના સીઈઓ પરાગ અગ્રવાલ વચ્ચે ટ્વિટરમાં નકલી એકાઉન્ટ્સ (બોટ્સ) મુદ્દે વિવાદ સતત વકરી રહ્યો છે. પહેલાં ઈલોન મસ્કે અચાનક જ ટ્વિટરના નકલી એકાઉન્ટ્સ પાંચ ટકા કરતાં વધુ હોવાનો દાવો કરીને ડીલ અટકાવી દેવાની જાહેરાત કરી હતી. બાદમાં મસ્કે ટ્વિટર ખરીદવા માટે અગાઉ ઓફર કરેલી ૪૪ અબજ ડોલર કરતાં ઓછી કિંમત ચૂકવવાના સંકેત આપ્યા હતા. મસ્કે શરત મુકી હતી કે જ્યાં સુધી બોટના સાચા આંકડા નહિ આપવામાં આવે અને 5% સુધી તેને સીમિત કરવામાં નહિ આવે ત્યાં સુધી સોદો ‘હોલ્ડ’ પર રહેશે.

આજે મસ્કના પત્ર અંગે માહિતી બહાર આવતા અમેરિકન શેરબજાર ખુલતા પહેલા ટ્વીટરના શેર ૫.૫ ટકા ઘટી ૩૭.૯૫ ડોલર થઇ ગયા હતા. મસ્કની અગાઉ, કામચલાઉ રીતે સોદો અટકાવી દેવાની જાહેરાતથી શેર સતત ઘટી રહ્યા છે. ટ્વીટરના વર્તમાન શેરહોલ્ડરે મેં મહિનામાં ટ્વીટરના શેર ૨૩ ટકા ઘટી ગયા હોવાથી મસ્ક આ રીતે કંપની ઉપર દબાણ લાવી શેરહોલ્ડરની સંપત્તિનો વિનાશ કરી રહ્યા હોવાનો એક કેસ પણ અમેરિકન કોર્ટમાં થયો છે. 

આ પણ વાંચો : ટ્વિટર ખરીદવા મસ્કે રકઝક શરૂ કરી: હવે ૪૪ અબજ ડોલર નહિ ચૂકવે?

from Top Stories News - Gujarat Samachar : World's Leading Gujarati Newspaper https://ift.tt/sRQPKx3
via IFTTT