વડાપ્રધાનને ખીસ્સા કાતરુ કહેવા અયોગ્ય, ચૂંટણી પંચ રાહુલ સામે પગલાં લે : હાઈકોર્ટ

- કોંગ્રેસ નેતાએ રાજસ્થાનની રેલીમાં મોદી-અદાણી પર આક્ષેપ કર્યો હતો

- ચૂંટણી પંચને પગલાં લેવા આઠ સપ્તાહનો સમય આપ્યો

નવી દિલ્હી : વડાપ્રધાન નરેન્દ્ર મોદી પર કોંગ્રેસ સાંસદ રાહુલ ગાંધીએ કરેલી ટીપ્પણી પર દિલ્હી હાઈકોર્ટે વાંધો ઉઠાવ્યો છે. વધુમાં હાઈકોર્ટે આ કેસમાં રાહુલ ગાંધી વિરુદ્ધ યોગ્ય નિર્ણય લેવા માટે ચૂંટણી પંચને આઠ સપ્તાહનો સમય આપ્યો છે. સાથે જ હાઈકોર્ટે આ પ્રકારના નિવેદનો અંગે નિયમ વધુ કડક કરવા પણ નિર્દેશ આપ્યા છે. દિલ્હી હાઈકોર્ટે જાહેર હિતની એક અરજીની સુનાવણી કરતાં આ નિર્દેશો આપ્યા હતા.

કોંગ્રેસ નેતા રાહુલ ગાંધીએ રાજસ્થાનમાં વિધાનસભા ચૂંટણી પહેલાં એક કાર્યક્રમમાં ગૌતમ અદાણીનો ઉલ્લેખ કરતા વડાપ્રધાન નરેન્દ્ર મોદી અને ગૃહમંત્રી અમિત શાહ પર વિવાદાસ્પદ ટીપ્પણી કરી હતી. કાર્યવાહક મુખ્ય ન્યાયાધીશ મનમોહનના અધ્યક્ષપદે બેન્ચે કહ્યું કે, રાહુલ ગાંધીનું કથિત નિવેદન યોગ્ય નથી તેથી ચૂંટણી પંચે આ બાબતે તપાસ કરવી જોઈએ. આ સંબંધમાં રાહુલ ગાંધીને પણ નોટિસ પાઠવવામાં આવી છે.દિલ્હી હાઈકોર્ટની બેન્ચે આદેશ આપ્યો કે, ચૂંટણી પ્રચાર સમયે થયેલી ફરિયાદનો જવાબ આપવાની સમય મર્યાદા પૂરી થઈ ગઈ છે અને કોઈ જવાબ મળ્યો નથી, તેથી હાઈકોર્ટ ચૂંટણી પંચને આ કેસમાં યોગ્ય કાર્યવાહી કરવાનો નિર્દેશ આપે છે.

હાઈકોર્ટે કહ્યું કે, ૨૩ નવેમ્બરે મોકલવામાં આવેલી નોટિસમાં ચૂંટણી પંચે પોતે જ કહ્યું હતું કે, તે આ કેસમાં યોગ્ય કાર્યવાહી કરશે. અરજદાર ભરત નાગરે હાઈકોર્ટને જણાવ્યું કે રાહુલ ગાંધીએ ૨૨ નવેમ્બરે વડાપ્રધાન સહિત ઉચ્ચ સરકારી પદો પર બેઠેલા લોકો વિરુદ્ધ અન્ય જધન્ય આરોપ મૂક્યા હતા અને વડાપ્રધાન મોદીને ખીસ્સા કાતરુ કહ્યા હતા.

કોંગ્રેસ સાંસદ રાહુલ ગાંધીએ ૨૧ નવેમ્બરે રાજસ્થાનના ઝાલોરમાં ચૂંટણી રેલીમાં કહ્યું હતું કે, પીએમનો અર્થ પનૌતી મોદી છે. મોદી ટીવી પર આવે છે અને હિન્દુ-મુસ્લિમ કહે છે અને ક્યારેક-ક્યારેક ક્રિકેટ મેચમાં જતા રહે છે, એ અલગ બાબત છે કે તેમણે હરાવી દીધા. મોદીનું કામ પોતાનું ધ્યાન અહીં-તહીં કરવાનું હોય છે. આવું જ બે ખીસ્સા કાતરુ હોય છે, એક આવે છે, તમારી સામે તમારી સાથે વાત કરે છે, તમારું ધ્યાન ભટકાવે છે. ત્યારે પાછળથી બીજો કોઈ ખીસ્સા કાતરુ તમારું ખીસ્સુ કાપી લે છે. મોદીનું કામ તમારું ધ્યાન બીજે ખેંચવાનું છે. અદાણીનું કામ તમારું ખીસ્સુ કાપવાનું છે. 

from Top Stories News - Gujarat Samachar : World's Leading Gujarati Newspaper https://ift.tt/4PUxn2p
via IFTTT