એલપીજી સિલિન્ડરના ભાવમાં રૂ. ૨૫નો તોતિંગ વધારો : આ વર્ષે રૂ.175 વધ્યા
નવી દિલ્હી, તા.૧
દેશમાં પેટ્રોલ અને ડીઝલના ભાવ સાતમા આકાશે પહોંચ્યા પછી હવે રાંધણ ગેસના સિલિન્ડરના ભાવમાં પણ વધારો થયો છે. દેશમાં ૧લી જુલાઈથી પ્રતિ ૧૪.૨ કિલોના એલપીજી સિલિન્ડર ઉપર રૂ. ૨૫.૫૦નો વધારો થયો છે. ડિસેમ્બર ૨૦૨૦ પછી એલપીજીના ભાવમાં પાંચમી વખત વધારો થયો છે. વધુમાં એક વર્ષમાં એલપીજી સિલિન્ડરના ભાવમાં રૂ. ૨૪૦નો વધારો થયો છે. ૩૧મી માર્ચે તેમાં રૂ. ૧૦નો સાધારણ કાપ મૂકાયો હતો. દરમિયાન ગુરુવારે પેટ્રોલ અને ડીઝલના ભાવમાં કોઈ વધારો કે ઘટાડો થયો નહોતો.
કોરોનાકાળમાં લોકો પેટ્રોલ અને ડીઝલના આકાશને આંબતા ભાવ તેમજ ભારે મોંઘવારીનો સામનો કરી રહ્યા છે ત્યારે હાલમાં એલપીજી સિલિન્ડર પર રિટેલ ગ્રાહકોને કોઈ સબસિડી મળતી ન હોવાથી મધ્યમ વર્ગ પર મોંઘવારીનો બોજ વધશે. એલપીજીના આંતરરાષ્ટ્રીય બેન્ચમાર્ક અને યુએસ ડોલર તથા રૂપિયાના વિનિમય દરના આધારે પ્રત્યેક મહિનાની શરૂઆતમાં એલપીજીના ભાવમાં ફેરફાર કરવામાં આવે છે.
સરકારી ઓઈલ કંપનીઓના જણાવ્યા મુજબ નવા ભાવ વધારા સાથે મુંબઈ અને દિલ્હીમાં પ્રતિ ૧૪.૨ કિલોના સિલિન્ડરનો ભાવ રૂ. ૮૦૯થી વધીને રૂ. ૮૩૪.૫૦ થયો છે. એલપીજી સિલિન્ડરનો ભાવ કોલકાતામાં રૂ. ૮૩૫.૫૦ જ્યારે ચેન્નઈમાં રૂ. ૮૫૦.૫૦ થયો છે. અમદાવાદમાં એલપીજી સિલિન્ડરનો ભાવ રૂ. ૮૪૧.૫૦ થયો છે.
ઘરેલુ રાંધણ ગેસની સાથે કોમર્શિયલ સિલિન્ડરના ભાવમાં પણ રૂ. ૭૬નો તોતિંગ વધારો થયો છે. દિલ્હીમાં ૧૯ કિલોના કોમર્શિયલ સિલિન્ડરનો ભાવ હવે રૂ. ૧,૫૫૦ થશે. દેશમાં અન્ય સ્થળો પર વિવિધ સ્થાનિક કરના કારણે તે વધુ મોંઘો થશે.
ડિસેમ્બર ૨૦૨૦ પછી રાંધણ ગેસના ભાવમાં પ્રતિ સિલિન્ડર રૂ. ૧૭૫નો વધારો થયો છે. જોકે, માર્ચમાં રૂ. ૧૦નો કાપ મૂકાયો હતો. આમ, ગુરુવારના ભાવ વધારા સાથે એલપીજી સિલિન્ડરના ભાવમાં સાત મહિનામાં કુલ રૂ. ૧૯૦ જ્યારે એક વર્ષમાં અંદાજે રૂ. ૨૪૦નો વધારો થયો છે. અગાઉ રાંધણ ગેસમાં ૪થી ફેબુ્રઆરીએ પ્રતિ સિલિન્ડર રૂ. ૨૫, ૧૫મી ફેબુ્રઆરીએ રૂ. ૫૦, ૨૫મી ફેબ્રુઆરીએ રૂ. ૨૫ અને ૨જી માર્ચે રૂ. ૨૫નો ભાવવધારો થયો હતો.
ગ્રાહકોએ હાલ રાંધણ ગેસ બજાર ભાવે ખરીદવો પડી રહ્યો છે. છેલ્લા કેટલાક વર્ષોમાં કેન્દ્ર સરકારે એલપીજી સિલિન્ડર પર અપાતી સબસિડીમાં ક્રમશઃ ઘટાડો કર્યો છે. પરિણામે મે ૨૦૨૦થી મેટ્રો અને મોટા શહેરોમાં લોકોને એલપીજી પર કોઈ સબસિડી અપાતી નથી. સરકારી ઓઈલ કંપનીના એક અધિકારીએ જણાવ્યું હતું કે, દેશમાં અંતરિયાળ અને દૂરના વિસ્તારોમાં ઊંચા ફ્રેઈટ ચાર્જીસને સરભર કરવા માટે કેન્દ્ર દ્વારા ગ્રાહકોને સામાન્ય સબસિડી ચૂકવવામાં આવે છે.
રાંધણ ગેસમાં ભાવવધારાના પગલે કોંગ્રેસના વરિષ્ઠ નેતા પી. ચિદમ્બરમે ટ્વીટર પર મોદી સરકારની ટીકા કરતાં નવેમ્બર ૨૦૨૦થી અત્યાર સુધીમાં એલપીજીના ભાવ જાહેર કરતાં એક વર્ષમાં એલપીજી પર રૂ. ૨૪૦નો વધારો થયો હોવાનો દાવો કર્યો હતો. તેમણે ટ્વીટર પર શૅર કરેલા એલપીજીના ભાવ મુજબ નવેમ્બર ૨૦૨૦માં એલપીજીનો પ્રતિ સિલિન્ડર ભાવ રૂ. ૫૯૪ હતો, જે ૧લી ડિસેમ્બરે ભાવ રૂ. ૬૪૪ થયો હતો. ત્યાર પછી ૧લી જાન્યુઆરી ૨૦૨૧ના રોજ ભાવ રૂ. ૬૯૪, ૪થી ફેબ્રુઆરીએ રૂ. ૭૧૯, ૧૫મી ફેબ્રુઆરીએ રૂ. ૭૬૯, ૧લી માર્ચે રૂ. ૮૧૯ અને ૧લી જુલાઈએ રૂ. ૮૩૪ થયો હતો.
from Top Stories News - Gujarat Samachar : World's Leading Gujarati Newspaper https://ift.tt/2Tvb0Lv
via IFTTT
ટિપ્પણીઓ નથી: