ઉત્તર ભારતમાં હીટવેવ : રાજસ્થાનમાં પારો ૪૬ ડિગ્રી

(તસવીર પ્રતીકાત્મક છે)

(પીટીઆઈ) નવી દિલ્હી, તા. ૧
ઉત્તર ભારતમાં ભારે તાપ અને ગરમી પડતાં લોકો પરેશાન થઈ ગયા હતા. સામાન્ય રીતે જુલાઈના પહેલા સપ્તાહમાં દેશભરમાં વરસાદ ગરજતો હોય છે, તેના બદલે આકાશમાંથી આગ ઝરતો તાપ વરસતા આખું ઉત્તર ભારત પરેશાન બની ગયું હતું. હવામાન વિભાગના કહેવા પ્રમાણે હજુય એકાદ સપ્તાહ સુધી ગરમીમાં રાહત મળવાની શક્યતા ઓછી છે.
ભારતીય હવામાન વિભાગના કહેવા પ્રમાણે જુલાઈના પહેલા સપ્તાહમાં આખાય ઉત્તર ભારતમાં હિટવેવની સ્થિતિ જોવા મળશે. પંજાબ, હરિયાણા, રાજસ્થાન, ઉત્તર પ્રદેશ, મધ્યપ્રદેશ, છત્તીસગઢ અને દિલ્હી સહિતના રાજ્યોમાં તાપમાનનો પારો ઊંચો ગયો હતો અને એપ્રિલ-મે માસમાં જેવી ગરમી પડતી હોય છે એવી ગરમી  જુલાઈ માસમાં અનુભવાઈ હતી.
હવામાન વિભાગના અધિકારીઓએ કહ્યું હતું કે પાકિસ્તાનના રણપ્રદેશમાંથી આવતો સૂકો વાયરો આખા ઉત્તર ભારતને ધમરોળી રહ્યો છે અને તેના કારણે વાતાવરણમાં હિટવેવનો અનુભવ થઈ રહ્યો છે. વળી, તાપમાનનો પારો લગભગ સાતેક રાજ્યોમાં સરેરાશ ૪૦ ડિગ્રી કરતાં પણ વધુ નોંધાતા લોકો પરેશાન થઈ ગયા હતા. જાણે અચાનક ઉનાળો ત્રાટક્યો હોય એવો માહોલ છેલ્લાં દિવસમાં થઈ ગયો હતો.
અધિકારીઓના કહેવા પ્રમાણે આમ તો દેશના ઘણાં વિસ્તારમાં ચોમાસું બેસી ગયું છે, પરંતુ હરિયાણા, પંજાબ, દિલ્હી, રાજસ્થાન, ઉત્તર પ્રદેશ, મધ્યપ્રદેશ, છત્તીસગઢ જેવા ઉત્તર ભારતના રાજ્યો ચોમાસાથી એક સપ્તાહ સુધી બાકાત રહેશે. જુલાઈના પ્રથમ સપ્તાહમાં આ રાજ્યોમાં વરસાદની શક્યતા નહીંવત છે એટલે ગરમીમાંથી પણ રાહત મળવાની શક્યતા નથી.
લૂ અને ગરમીથી બેહાલ થયેલા ઉત્તર ભારતમાં વીજળીની ડિમાન્ડ વધી ગઈ હતી. દિલ્હી ૪૩ ડિગ્રી તાપમાં શેકાયું હતું. તેના કારણે પાટનગર દિલ્હીમાં વીજળીની સર્વોચ્ચ ડિમાન્ડ ગુરુવારે ૭૦૨૬ મેગાવોટ સુધી પહોંચી હતી. બુધવારે ૬૯૨૧ મેગાવોટ અને મંગળવારે ૬૫૯૨ મેગાવોટની વીજળીની ડિમાન્ડ રહી હતી. આ ૨૦૨૦ અને ૨૦૨૧ એમ બે વર્ષમાં અત્યાર સુધીની સૌથી વધુ ડિમાન્ડ નોંધાઈ હતી. છેલ્લે ૨જી જુલાઈ ૨૦૧૯ના દિવસે દિલ્હીમાં વીજળીની ડિમાન્ડ ૭૪૦૯ મેગાવોટ હતી. પાટનગરમાં વીજળીના ખર્ચ પરથી અંદાજ લગાવી શકાય કે ઉનાળામાં જે રીતે એસી અને પંખાની જરૃરિયાત વધારે પડે છે એટલી જ કે તેનાથી પણ વધુ જરૃરિયાત અત્યારે પડી રહી છે.

સૌથી વધુ તાપમાન ક્યાં નોંધાયું?
ક્રમ    નામ    તાપમાન (ડિગ્રીમાં)
૧    ગંગાનગર (રાજસ્થાન)    ૪૬
૨    ચુરુ (રાજસ્થાન)    ૪૫.૪
૩    પિલાની (રાજસ્થાન)    ૪૪.૭
૪    બિકાનેર (રાજસ્થાન)    ૪૪.૪
૫    નારનોલ (હરિયાણા)    ૪૪
૬    હિસ્સાર (હરિયાણા)    ૪૩.૫
૭    દિલ્હી    ૪૩.૫
૮    ગ્વાલિયર (મધ્યપ્રદેશ)    ૪૩.૪
૯    રોહતક (હરિયાણા)    ૪૩.૪
૧૦    અલિગઢ (યુપી)    ૪૩.૨

બંગાળ, બિહાર, સિક્કિમમાં વરસાદ થશે
હવામાન વિભાગના કહેવા પ્રમાણે એક તરફ ઉત્તર ભારતના સાત-આઠ રાજ્યોમાં ભારે હિટવેવ અનુભવાશે, ત્યારે બીજી તરફ ઘણાં રાજ્યોમાં વરસાદ પણ પડશે. બંગાળની ખાડીમાં વાતાવરણ બદલ્યું હોવાથી તેની અસર હેઠળ પશ્વિમ બંગાળમાં આ સપ્તાહમાં વરસાદ થશે. તે ઉપરાંત બિહારમાં પણ ચોમાસાનું આગમન થઈ જશે. સિક્કિમ, નાગાલેન્ડ, મણિપુર, અરૃણાચલ પ્રદેશ, ઉત્તરાખંડ અને હિમાચલ પ્રદેશ જેવા રાજ્યોમાં પણ મેઘસવારી આવી પહોંચશે. હિમાલયન રેન્જમાં  આગામી પાંચ દિવસમાં ઠીક-ઠીક વરસાદ પડશે. જુલાઈના અંત સુધીમાં સરેરાશ વરસાદ સારો એવો પડી જશે એવી ધરપત પણ હવામાન વિભાગે બંધાવી હતી. દેશભરમાં જુલાઈ માસમાં ૯૪થી ૧૦૬ ટકા વરસાદ પડવાની ધારણા છે.



from Top Stories News - Gujarat Samachar : World's Leading Gujarati Newspaper https://ift.tt/3jyEC5x
via IFTTT