મુંબઇમાં ધોધમાર વરસાદથી ત્રણ હોનારત : 30નાં મોત
ભારે વરસાદને લીધે બચાવ કામગીરીમાં અડચણ ઊભી થઇ
વડાપ્રધાન, રાષ્ટ્રપતિ, ગૃહમંત્રીએ શોક વ્યકત કર્યો : મૃતકોના પરિવારોને મહારાષ્ટ્ર અને કેન્દ્ર સરકારની કુલ રૂ. સાત લાખની સહાય
મુંબઇ : મુંબઇ ગઇકાલે રાતે મૂશળધાર વરસાદને લીધે હાહાકાર મચી ગયો હતો વરસાદને લીધે વિવિધ બનાવમાં 30 જણ મોતના મુખમાં ધકેલાય ગયા હતા. ચેમ્બુરમાં ભેખડ ધસી પડતા મહિલા, બાળકો સહિત 19 જણ ઊઘમાં જ મૃત્યુ પામ્યા હતા વિક્રોલીમાં પાંચકે ઘર તૂટી પડતા 10 જણ અને ભાંડુપમાં દીવાલ તૂટી જતા 16 વર્ષનો કિશોર મોતને ભેટયા હતા.
કાટમાળ નીચે દબાઇ ગયેલા લોકોને ભારે જહેમત બાદ બહાર કાઢવામાં આવ્યા હતા. આ બનાવ બદલ વડાપ્રધાન નરેન્દ્ર મોદી, રાષ્ટ્રપતિ રામનાથ કોવિંદ, ગૃહમંત્રી અમિત શાહે શોક વ્યકત કર્યો હતો. પ્રત્યકે મૃતકના પરિવારને વડાપ્રધાને બે લાખ રૂપિયા અને મહારાષ્ટ્રના મુખ્ય પ્રધાન ઉધ્ધવ ઠાકરેએ પાંચ લાખ રૂપિયાની મદદ જાહેર કરી હતી.
મુંબઇમાં વરસાદમાં ઇમારત, ઘર, દીવાલ, ઝાડ તૂટી પડવાની ઘટનામાં અનેક જણ જીવ ગુમાવતા હોય છે. દર વર્ષે આ પ્રકારના બનાવ બનતા હોવાથી લોકોની સુરક્ષા બાબતે જરૂરી પગલા ભરવા જોઇએ એવી ચર્ચા થઇ રહી છે. મુંબઇમાં ગઇકાલે રાતે ધોધમાર વરસાદને લીધે ઠેર ઠેર પાણી ભરાઇ ગયા હતા.
જયારે ચેમ્બુરમાં માહુલ ખાતે વાંઝાર દાંડા, વાશી નાકા, ન્યૂ ભારત નગર ખાતે રાતે અંદાજે એક વાગ્યે ભેખડ ધસી પડતા અને દીવાલ તૂટી પડતા સાતથી આઠ ઘરમાં સૂતેલા લોકો કાટમાળ નીચે દબાઇ ગયા હતા. તેઓ જીવ બચાવવા ઘરની બહાર આવી શકયા નહોતા. આ બનાવની જાણ થતા મહાનગર પાલિકાના કર્મચારી, ફાયરબ્રિગેડ, પોલીસ, એનડીઆરએફની ટીમ બચાવ કામગિરી માટે પહોંચી ગઇ હતી.
કાદવના લીધે, સાંકડી જગ્યાને લીધે લોકોને બચાવવામાં મુશ્કેલી થઇ હતી. કાટમાળમાંથી બહાર કાઢીને આશરે છ જણનો જીવ બચાવી લેવામાં આવ્યો હતો. ભાંડુપમાં પણ આવી જ એક ઘટના બની હતી. ભાંડુપમાં દીવાલ તૂટી પડતા 16 વર્ષીય કિશોરનું મોત થયુ હતુ. ભાંડુપના અમરકોટ ભાગમાં વનવિભાગની દીવાલ હતી.
આ કિશોર ઘરમાંથી પાણી બહાર કાઢતો હતો. ત્યારે ભેખડ સાથે દીવાલ પડી હતી. સ્થાનિક લોકોએ સોહમને બહાર કાઢયો હતો. પણ તે મૃત્યુ પામ્યો હતો. ઉલ્લેખનીય છે કે, મુંબઇ પર છેલ્લા 48 કલાકથી અફાટ આકાશ તેની પૂરી તાકાથી વરસી રહ્યું છે. ખાસ કરીને 15 અને 17,જુલાઇની રાતે ફક્ત ચાર-પાંચ કલાકમાં જ લગભગ 20 ઇંચ જેટલો ભારે તોફાની વરસાદ વરસ્યો છે.
from Top Stories News - Gujarat Samachar : World's Leading Gujarati Newspaper https://ift.tt/3xQiNTg
via IFTTT
ટિપ્પણીઓ નથી: