બ્રિટનમાં છ મહિના પછી પહેલીવાર 54 હજાર કેસ

દુનિયામાં ત્રીજી લહેર : કોરોનાના કેસોની સંખ્યા 19.06 કરોડને પાર, કુલ મૃત્યુઆંક 41 લાખ નજીક

યુકેના આરોગ્ય પ્રધાન સાજિદ જાવિદને બે રસી લીધા પછી પણ કોરોના 

સપ્ટેમ્બરમાં યુકેમાં રોજ સરેરાશ 68,000 કોરોના કેસ નોંધાવાની આગાહી

ભારતીય બનાવટની એસ્ટ્રાઝેનેકાની કોરોના રસી લેનારા પ્રવાસીઓને ફ્રાન્સમાં  પ્રવેશ મળશે

યુકેમાં નિયંત્રણો હટાવવાના મામલે સરકારની ટીકા

લંડન : બ્રિટનમાં  જાન્યુઆરી પછી પહેલીવાર દૈનિક કોરોના કેસની સંખ્યા 54 હજાર  કરતા વધારે નોંધાઈ છે છતાં યુકેની સરકાર કોરોના નિયંત્રણોને 19 જુલાઇથી હળવા કરવાના નિર્ણયને વળગી રહી હોવાથી તેની ચોતરફથી ટીકા થઇ રહી છે.

બ્રિટિશ સરકારના ટોચના મેડિકલ સલાહકારે પણ થોડા સપ્તાહોમાં જ હોસ્પિટલોમાં કોરોનાના દર્દીઓની સંખ્યા ભયજનક હદે વધવાની ચેતવણી આપી છે. સરકારી આંકડાઓ અનુસાર કોરોનાના નવા 54 હજાર  કેસો અને 41 મૃત્યુ નોંધાયા છે. તાજેતરના સપ્તાહોમાં જે યુવાનોએ કોરોનાની રસી લીધી નથી તેમનામાં ડેલ્ટા વેરિઅન્ટના ચેપનું પ્રમાણ વધ્યું છે. 

કોરોનાના દૈનિક કેસો ભયનજક હદે વધી રહ્યા હોવા છતાં બ્રિટિશ સરકાર ઇંગ્લેન્ડમાં કોરોના નિયંત્રણો હટાવવાના મામલે મક્કમ છે. જો કે, ઘરોમાં, દુકાનોમાં, ટ્રેનોમાં, બસોમાં અને સબ વેમાં ફેસ માસ્ક પહેરવાનું ચાલુ રાખવામાં આવ્યું છે. સરકારને આશા છે કે ઝડપી રસીકરણ કરવાથી ગંભીર રીતે માંદા પડનારા દર્દીઓની સંખ્યાને કાબૂમાં રાખી શકાશે.

સરકારના આ વલણની આંતરરાષ્ટ્રીય સ્તરે વિજ્ઞાાનીઓ બેદરકારીભર્યું ગણાવી આકરી ટીકા કરી છે. ઇટાલી, ન્યુઝિલેન્ડ અને તાઇવાનની સરકારોના સલાહકારોના જૂથે જણાવ્યું હતું કે અમે બ્રિટિશ પ્રજા દ્વારા ડેલ્ટા વેરિઅન્ટ ગ્લોબલ સ્તરે ફેલાવાના આકરાં પરિણામો સામે ચેતવણી આપવા માટે અમે આ વલણ લીધું છે. 

દરમ્યાન યુકેના આરોગ્ય પ્રધાન સાજિદ જાવિદે જણાવ્યું હતું કે કોરોનાની રસીના બંને ડોઝ લીધા બાદ તેમને ફરી કોરોનાનો હળવો ચેપ લાગ્યો હોવાના લક્ષણો વરતાયા છે. હાલ સાજિદ તેમની બીજા કોરોના ટેસ્ટના પરિણામની રાહ જોતા આઇસોલેટ રહીને કામ કરે છે. ગયા મહિને સામાજિક અંતર જાળવવાના નિયમોનો ભંગ કરતા ઝડપાઇ ગયેલા મેટ્ટ હેન્કોક રાજીનામું આપ્યા બાદ તેમની પાસેથી સાજિદે આરોગ્ય ખાતાનો ભાર સંભાળ્યો હતો.

ર્યુકે સરકારે ફ્રાન્સમાંથી આવતા લોકોએ બ્રિટનમાં આવ્યા બાદ તેમણે કોરોનાની રસીના બંને ડોઝ લીધા હશે તો પણ દસ દિવસ માટે ક્વોરન્ટાઇન થવું પડશે તેવી જાહેરાત કરી હતી. યુએસએ, કેનેડા અને યુરોપના મોટાભાગના દેશોના નાગરિકોને હાલ યુકેમાં પ્રવેશ કર્યા બાદ ક્વોરન્ટાઇન થવાની જરૂર નથી તેમાં ફ્રાન્સને અલગ પાડવામાં આવતાં લોકોમાં રોષ ફેલાયો હતો.

સરકારે જણાવ્યું હતું કે ફ્રાન્સમાં બિટા વેરિઅન્ટસના કેસોની સંખ્યા દસ ટકા છે.  જે વેરિઅન્ટ કોરોનાની રસીનો વધારે પ્રતિકાર કરે છે એટલે ફ્રાન્સને અલગ પાડવામાં આવ્યું છે. હાલ બ્રિટનમાં બિટા વેરિઅન્ટના કેસોની સંખ્યા એક ટકા કરતાં પણ ઓછી છે. બિટા વેરિઅન્ટ એસ્ટ્રાઝેનેકાની કોરોના રસીને વધારે અસરકારક રીતે નકારી કાઢે છે. હાલ બ્રિટનમાં મોટાભાગની પ્રજાને એસ્ટ્રાઝેનેકાની કોરોના રસીઓ આપવામાં આવેલી છે. 

ભૂતપૂર્વ આરોગ્ય પ્રધાન જેરેમી હન્ટે જણાવ્યું હતું કે હોસ્પિટલાઇઝેેશનનો દર વધી રહયો છે અને આરોગ્ય સેવા તરફથી દબાણ વધી રહ્યું હોવાના સંકેતો મળી રહ્યા છે.  તેમણે બીબીસીને જણાવ્યું હતું કે મારા મતે આગામી સપ્ટેમ્બર સુધીમાં દૈનિક કોરોના કેસોની સંખ્યા 68,000 કરતાં વધારે થઇ જશે. જે જાન્યુઆરીમાં દૈનિક કેસોની સંખ્યાની નજરે રેકોર્ડ હતો. 

દરમ્યાન યુએસમાં જ્હોન હોપકિન્સ યુનિવર્સિટી દ્વારા જારી કરવામાં આવેલા આંકડાઓ અનુસાર દુનિયામાં હાલ કુલ કોરોના કેસોની સંખ્યા 189,441,350 છે કોરોનાનો કુલ મરણાંક 4,074,20 થયો છે અન કોરોનાની રસીના  કુલ 3,567,645,976 ડોઝ આપવામાં આવ્યા છે.

દુનિયામાં કોરોનાના કેસોની સંખ્યાના મામલે યુએસ 334,051,023 કેસો સાથે પ્રથમ ક્રમે છે. મરણાંકના મામલે પણ 608,809 કેસો સાથે યુએસ પ્રથમ છે. કોરોનાના કેસોના મામલે બીજા ક્રમે 31,026,829 કેસો સાથે ભારત આવે છે.  દરમ્યાન ફ્રાન્સે ભારતીય બનાવટની એસ્ટ્રાઝેનેકાની કોરોના રસી મેળવનારા ઇન્ટરનેશનલ પ્રવાસીઓને રવિવારથી પ્રવેશ આપવાનું નક્કી કર્યું છે.

યુરોપિયન યુનિયન માત્ર યુરોપમાં બનેલી એસ્ટ્રાઝેનેકાની કોરોના રસીને માન્ય રાખે છે તેવા અહેવાલ બાદ દુનિયાભરમાં ઉહાપોહ થવાને પગલે ફ્રાન્સે ભારતની સેરમ ઇન્સ્ટિટયુટ ઓફ ઇન્ડિયા દ્વારા ઉત્પાદિત કોરોના રસી મેળવનારા પ્રવાસીઓને પણ સ્વીકારવાનો નિર્ણય લીધો હતો.  ફ્રાન્સે હજી પણ ચીની કે રશિયન બનાવટની રસીને માન્યતા આપી નથી. ઇયુ ડ્રગ રગ્યુલેટર દ્વારા જેને માન્યતા આપવામાં આવી છે તે ફાઇઝર-બાયોએનટેક, મોડર્ના, જ્હોન્સન એન્ડ જ્હોન્સન અને એસ્ટ્રાઝેનેકાની કોરોના રસીઓને જ માન્ય રાખવામાં આવે છે.

રવિવારથી બ્રિટન, સ્પેન, પોર્ટુગલ અને નેધરલેન્ડઝમાંથી આવનારા રસી ન લેનારાઓએ ફ્રેન્ચ સરહદ પાર કરવા માટે 24 કલાક કરતા ઓછા સમયમાં કરાવેલો કોરોના નેગેટિવ ટેસ્ટ રજૂ કરવો પડશે. ફ્રાન્સના જોખમી દેશોની રેડ યાદીમાં હવે ટયુનિશિયા, ઇન્ડોનેશિયા, ક્યુબા અને મોઝામ્બિકનો પણ સમાવેશ કરવામાં આવ્યો છે. જો કે, આ દેશોમાંથી આવનારાઓએ કોરોનાની રસીના બંને ડોઝ લીધા હોય તો તેમને પ્રવાસી તરીકે ફ્રાન્સમાં પ્રવેશ આપવામાં આવશે.

from Top Stories News - Gujarat Samachar : World's Leading Gujarati Newspaper https://ift.tt/3io3Px8
via IFTTT