કોરોનાની ત્રીજી લહેરની આશંકાને લઈ કેન્દ્ર એલર્ટ, રાજ્યોને 5 ફોલ્ડ ફોર્મ્યુલા પર અમલની સલાહ

- હિમાચલ પ્રદેશ, ઉત્તરાખંડ સહિત સહિત અનેક રાજ્યોમાં પર્યટકો કોવિડ પ્રોટોકોલ્સનું ભારે ઉલ્લંઘન 

નવી દિલ્હી, તા. 11 જુલાઈ, 2021, રવિવાર

થોડા દિવસથી કોરોનાની બીજી લહેર ધીમી પડી છે. જોકે પહેલી અને બીજી લહેરનું તાંડવ જોયા બાદ પણ લોકોએ બેદરકારી દાખવવાનું શરૂ કરી દીધું છે. હિમાચલ પ્રદેશ, ઉત્તરાખંડ સહિત સહિત અનેક રાજ્યોમાં પર્યટકો કોવિડ પ્રોટોકોલ્સનું ભારે ઉલ્લંઘન કરતા દેખાઈ રહ્યા છે. તેવામાં કેન્દ્રીય ગૃહ સચિવ અજય ભલ્લાએ રાજ્ય સરકારો દ્વારા હિલ સ્ટેશનો અને પર્યટન સ્થળોએ કોવિડ-19નો પ્રસાર રોકવા ભરવામાં આવેલા પગલાઓની સમીક્ષા કરી હતી. કેન્દ્રએ રાજ્યોને કોરોના સાથે સંકળાયેલી 5 ફોલ્ડ સ્ટ્રેટેજી ફોલો કરવા માટે કહ્યું છે.

બેઠક દરમિયાન ગોવા, હિમાચલ પ્રદેશ, કેરળ, મહારાષ્ટ્ર, રાજસ્થાન, તમિલનાડુ, ઉત્તરાખંડ અને પશ્ચિમ બંગાળ રાજ્યોમાં કોરોના સ્થિતિના મેનેજમેન્ટ અને વેક્સિનેશનની સ્થિતિ અંગે ચર્ચા કરવામાં આવી હતી. 

કેન્દ્રીય ગૃહ સચિવે હિલ સ્ટેશનો અને અન્ય પર્યટન સ્થળોમાં કોવિડ પ્રોટોકોલ્સના ઉલ્લંઘન અંગેના મીડિયા રિપોર્ટ્સ પર વાત કરી હતી અને રાજ્યોને સાવધાની રાખવા પણ કહ્યું હતું. સાથે જ તેમણે કોરોનાની બીજી લહેરનો હજુ અંત નથી આવ્યો તેમ ભાર આપીને કહ્યું હતું. રાજ્યોએ માસ્ક પહેરવા, સોશિયલ ડિસ્ટન્સિંગ અને અન્ય નિર્ધારિત પ્રોટોકોલનું આકરૂ પાલન સુનિશ્ચિત કરવું જોઈએ તેમ પણ કહ્યું હતું. 

અનેક રાજ્યોનો પોઝિટિવિટી રેટ 10 ટકાથી વધારે

કેન્દ્ર સરકારના કહેવા પ્રમાણે વિભિન્ન રાજ્યોમાં કોરોનાની બીજી લહેરમાં ઘટાડો વેરિએબલ સ્ટેજ પર છે તેમ જણાય છે. એક તરફ ઓવરઓલ પોઝિટિવિટી રેટમાં ઘટાડો નોંધાઈ રહ્યો છે ત્યાં રાજસ્થાન, કેરળ, મહારાષ્ટ્ર, તમિલનાડુ, પશ્ચિમ બંગાળ, ઉત્તરાખંડ અને હિમાચલ પ્રદેશમાં પોઝિટિવિટી રેટ 10 ટકાથી વધારે છે જે એક ચિંતાનું કારણ છે. 

5 ફોલ્ડ સ્ટ્રેટેજી ફોલો કરવા કહેવામાં આવ્યું

સરકારે રાજ્યોને ફાઈવ ફોલ્ડ સ્ટ્રેટેજી- ટેસ્ટ, ટ્રેક, ટ્રીટ, વેક્સિનેટ અને કોવિડ એપ્રોપ્રિએટ બિહેવિયરને ફોલો કરવા કહ્યું છે. ગૃહ મંત્રાલયે 29 જૂનના રોજ આ સંબંધી ઓર્ડર પણ બહાર પાડ્યો હતો. આ સાથે જ સંભવિત કેસની વૃદ્ધિનો સામનો કરવા માટે સ્વાસ્થ્ય ક્ષેત્રે પર્યાપ્ત માળખા તૈયાર કરવા પણ સલાહ આપવામાં આવી છે. 

from Top Stories News - Gujarat Samachar : World's Leading Gujarati Newspaper https://ift.tt/3e8lF6a
via IFTTT