મધ્ય પ્રદેશમાં ડીઝલ અને સિક્કિમમાં પેટ્રોલે રૂ.૧૦૦ની સપાટી કુદાવી

(પીટીઆઈ) નવી દિલ્હી, તા.૪

આંતરરાષ્ટ્રીય સ્તરે ક્રૂડ ઓઈલના ભાવમાં મજબૂતીના પગલે ભારતમાં પેટ્રોલ અને ડીઝલના ભાવ દરરોજ નવી ઐતિહાસિક ટોચે પહોંચી રહ્યા છે તેમજ મોંઘવારીનો માર સહન કરતા મધ્યમ વર્ગ અને ગરીબો પર બોજ વધારી રહ્યા છે. દેશમાં રાજસ્થાન પછી હવે મધ્ય પ્રદેશમાં પણ ડીઝલે રૂ. ૧૦૦ની સપાટી વટાવી છે જ્યારે પેટ્રોલે રૂ. ૧૦૦ની સપાટી કુદાવી હોય તેવા રાજ્યોમાં સિક્કિમનો પણ સમાવેશ થયો છે. દેશમાં રવિવારે પેટ્રોલમાં પ્રતિ લીટર ૩૫ પૈસા અને ડીઝલમાં પ્રતિ લીટર ૧૮ પૈસાનો વધારો કરાયો છે.

ભારતમાં બે મહિનામાં પેટ્રોલમાં ૩૪મી વખત અને ડીઝલમાં ૩૩મી વખત ભાવવધારો થયો છે. આ સાથે પેટ્રોલ પ્રતિ લીટર રૂ. ૯.૧૧  અને ડીઝલ પ્રતિ લીટર રૂ. ૮.૬૩ મોંઘા થયા છે. દિલ્હીમાં પેટ્રોલનો ભાવ હવે પ્રતિ લીટર રૂ. ૯૯.૫૧ થયો છે જ્યારે ડીઝલની કિંમત પ્રતિ લીટર રૂ. ૮૯.૩૬ થઈ છે. અમદાવાદમાં પેટ્રોલનો ભાવ પ્રતિ લીટર ૩૪ પૈસા વધીને રૂ. ૯૬.૩૦ અને ડીઝલનો ભાવ પ્રતિ લીટર ૧૮ પૈસા વધીને રૂ. ૯૬.૧૬ થયો હતો.

દેશમાં હાલ રાજસ્થાન, મધ્ય પ્રદેશ, મહારાષ્ટ્ર, આંધ્ર પ્રદેશ, તેલંગાણા, કર્ણાટક, જમ્મુ અને કાશ્મીર, ઓડિશા, તામિલનાડુ, કેરળ, બિહાર, પંજાબ અને લદ્દાખમાં પેટ્રોલ રૂ. ૧૦૦ને પાર થઈ ગયું છે. રવિવારે ઈંધણના ભાવવધારાના પગલે આ યાદીમાં સિક્કિમ પણ જોડાયું છે, જ્યાં પાટનગર ગંગટોકમાં પેટ્રોલનો ભાવ પ્રતિ લીટર રૂ. ૧૦૦.૧૫ અને ડીઝલનો ભાવ રૂ. ૯૧.૫૫ થયો છે.

દેશમાં ડીઝલ રાજસ્થાનના શ્રીગંગાનગર અને હનુમાનગઢમાં તેમજ ઓડિશામાં કેટલાક સ્થળો પર પ્રતિ લીટર રૂ. ૧૦૦થી વધુની કિંમતે વેચાઈ રહ્યું છે. હવે રવિવારના ભાવવધારાના પગલે મધ્ય પ્રદેશના રેવા, શાહડોલ અને બાલાઘાટમાં પણ ડીઝલ પ્રતિ લીટર રૂ. ૧૦૦ને પાર થઈ ગયું છે. ભારતમાં પશ્ચિમ બંગાળ સહિત પાંચ રાજ્યોમાં ચૂંટણીના કારણે ૧૮ દિવસ સુધીના વિરામ પછી ૪થી મેથી પેટ્રોલ અને ડીઝલના ભાવમાં નિયમિત સમયાંતરે વધારો શરૂ થયો છે.

કોરોના મહામારીનો પ્રકોપ ઘટવાને પગલે અર્થતંત્ર ફરી શરૂ થવાથી પેટ્રોલ-ડીઝલની માગ વધવાની આશાએ વૈશ્વિક ઓઈલ બજારોમાં ક્રૂડ ઓઈલના ભાવમાં સાતત્યપૂર્ણ વધારાના કારણે દેશમાં પેટ્રોલ અને ડીઝલના ભાવમાં સતત વધારો થઈ રહ્યો છે. જોકે, પેટ્રોલ અને ડીઝલના ઊંચા ભાવની હકીકત તેમાં ટેક્સનું ખૂબ જ ઊંચું પ્રમાણ પણ છે. વૈશ્વિક સ્તરે ક્રૂડ ઓઈલનો ભાવ પ્રતિ બેરલ ૭૫ ડોલરની આજુબાજુ છે. ઑક્ટોબર ૨૦૧૮માં ક્રૂડનો ભાવ પ્રતિ બેરલ ૮૦ ડોલરથી વધુ હોવા છતાં દેશમાં પેટ્રોલનો ભાવ પ્રતિ લીટર રૂ. ૮૦ની આજુબાજુ હતો. તેથી નીચી ઓઈલ કિંમતો છતાં દેશના અનેક શહેરોમાં પેટ્રોલના ભાવે રૂ. ૧૦૦ની સપાટી વટાવી છે. નિષ્ણાતોનું માનવું છે કે કેન્દ્ર એક્સાઈઝ ડયુટી અને રાજ્યો વેટમાં ઘટાડો કરે તો જ પેટ્રોલ અને ડીઝલના ભાવમાં ઘટાડો આવી શકે છે.

from Top Stories News - Gujarat Samachar : World's Leading Gujarati Newspaper https://ift.tt/3wr4Jy9
via IFTTT