અનિશ્ચિતતાનો આખરે અંત :ટોક્યોમાં રમતોના મહાકુંભનો રંગારંગ પ્રારંભ

કોરોનાની કટોકટી વચ્ચે જાપાનના સમ્રાટ નારૂહિતોએ ઓલિમ્પિક ખુલ્લો મૂક્યો

અમેરિકાના ફર્સ્ટ લેડી જિલ બાઈડેન સહિત 15 નેતાઓ જ હાજર રહ્યા : બોક્સર મેરી કોમ અને હોકી કેપ્ટન મનપ્રીત સિંઘના નેતૃત્વમાં ભારતની માર્ચ પાસ્ટ

ઓલિમ્પિકના ઈતિહાસમાં સૌપ્રથમ વખત પ્રેક્ષકો વગર સમારંભ અને રમતોત્સવ

ટોક્યો : કોરોનાના વધતા કેસને લીધે એક તરફ ટોક્યોમાં સરકારે ઈમરજન્સી લોકડાઉન જાહેર કર્યું છે. બીજી તરફ બહુમતિ નાગરિકોના ભારે વિરોધ વચ્ચે અંતે આજે ઓલિમ્પિક રમતોત્સવને સાદગીભર્યા અને જૂજ આમંત્રિતોની હાજરીમાં યોજાયેલ ઉદઘાટન સમારંભ બાદ ખુલ્લો મુકવામાં આવ્યો હતો.

સ્ટેડિયમ ખાલી હોઈ ઉદઘાટન સમારંભ જાપાનના નાગરિકો માટે પણ ટીવી શો બની રહ્યો હતો. ભારતની ટીમનો માર્ચ પાસ્ટમાં જાપાનીઝ આલ્ફાબેટ પ્રમાણે 21મો ક્રમ હતો. 19 એથ્લેટ્સના ડેલીગેશનનું નેતૃત્વ બોક્સર મેરી કોમ અને હોકીના કેપ્ટન મનપ્રીત સિંઘે કર્યું હતું. ભારતે કુલ 120 એથ્લેટ અને 108 ઓફિસિયલ જાપાનમાં મોકલ્યા છે.

ઉદઘાટન સમારંભમાં કલાકારો નજીક ન આવે તેથી અમુક આઈટમો અગાઉથી રેકોર્ડિંગ કરીને સ્ટેડિયમના જાયન્ટ સ્ક્રીન પર રજૂ કરાઈ હતી જે દર્શકો ઘેર બેઠા નિહાળતા હતા ત્યારે તેઓને એવું લાગતું હતું કે તેઓ સ્ટેડિયમનું જીવંત પર્ફોરમન્સ જ જુએ છે. જોકે સોશ્યલ ડિસ્ટન્સ સાથેની કોરિયોગ્રાફી જેવી રંગારંગ આઈટમો હતી પણ તે જાપાન કેવા પડકારો સામે ઝઝૂમી બેઠુ થયું છે તેની થીમ બેઝ્ડ થોડી ગંભીર આઈટમો હતી.

નોંધપાત્ર અંતર સાથે વીવીઆઈપી ગેલેરીમાં જાપાનના સમ્રાટ નારૂહિતો, જાપાનના વડાપ્રધાન સુગા, ઈન્ટરનેશનલ ઓલિમ્પિક કમિટિના પ્રમુખ થોમસ બાચ અને આયોજક સમિતિના વડા મ્યુટો બેઠા હતા. તેઓએ એકબીજાનું  જાપાનની પરંપરા પ્રમાણે ગરદનથી ઝૂકીને અભિવાદન કર્યું હતું.

અમેરિકાના ફર્સ્ટ લેડી જીલ બાઈડન અને ફ્રાંસના પ્રમુખ માક્રોન સૌથી મહત્વના મોંઘેરા મહેમાન હતા. વિશ્વના મોટાભાગના દેશોના વડાપ્રધાન કે પ્રમુખે ટોક્યો જવાનું ટાળ્યું હતું. વિશ્વના 15 દેશોના નેતાઓએ જ હાજરી આપી હતી. જાપાનના ભૂતપૂર્વ વડાપ્રધાન શિન્ઝો આબે કે જેમના પ્રયત્નથી જ ઓલિમ્પિકના યજમાન બનવાની જીત મેળવી હતી. તેઓ હાજર ન હતા રહ્યા.

ઉદઘાટન સમારંભનો પ્રારંભ થતાં જ જાપાન ઓલિમ્પિકની થીમનો જે રંગ છે તે જાંબુડા અને સફેદ રંગની આતશબાજીથી આકાશ રાત્રિ પ્રકાશમાં ઝળહળી ઉઠયું હતું. ઉદઘાટન સમારંભમાં 1000થી પણ ઓછા આમંત્રિતો હતા અને તેઓ પણ એકબીજાથી ઘણા દૂરના અંતરે બેઠા હતા. એટલે સ્ટેડિયમ ખાલી અને સૂનકાર ભાસતું હતું. મોટાભાગના પ્રાયોજકો પણ ખસી રહ્યા હોઈ કોર્પોરેટ હસ્તીઓ પણ જોઈ નહતી શકાઈ.

ટોક્યો પર યજમાન તરીકેની પસંદગી ઢોળવામાં આવી ત્યારથી જાપાનને કેવી કેવી કુદરતી આપત્તિ જેવી કે ધરતીકંપ, સૂનામી અને છેલ્લાં વર્ષમાં કોરોનાનો ઐતિહાસિક પડકાર સહન કરવો પડયો અને તેમાંથી બેઠા થતાં જાપાન આજે આ ઘડી પર પહોંચ્યું હતું તે થીમ આધારીત પર્ફોરમન્સ જોઈને બધાની આંખો ભીની થઈ ગઈ હતી.

અગાઉ 1964ની ટોક્યો ઓલિમ્પિકમાં જાપાને બીજા વિશ્વયુદ્ધ દરમ્યાન તેઓ કઈ હદે ખતમ થઈ ગયા હતા અને બેઠા થઈને પ્રગતિ કરી તેના પૂરાવાઓ ગણાવી હતી. તેવી જ રીતે કોરોના પછી બદલાઈ ગયેલા વિશ્વમાં નાગરિકોએ પ્રસંશનીય રીતે સંવેદના વ્યક્ત કરી અને તેઓ વર્ચ્યુઅલ વેબથી કનેક્ટ રહ્યા તે આઈટમ લેસર એન્ડ સાઉન્ડ શો થકી જાપાનની ટેકનોલોજીની અગ્રીમતાની પ્રતિતી કરાવતી હતી.

વિશ્વભરના ખેલાડીઓએ આ ઓલિમ્પિકની તૈયારી, પ્રેકટિસ પણ કોરોનાથી બચતા લગભગ એકલા રહીને જ કરી છે. એક આઈટમમાં જાપાનની બોકસર નર્સ અરિસા સુબાતા સાવ જ એકલી, ભગ્ન હૃદયે ટ્રેડમીલ પર ચાલે છે.

વિશ્વના એથ્લેટ્સની તે પ્રતિક હતી. ઓલિમ્પિકના ઉદઘાટન સમારંભ વખતે સ્ટેડિયમની બહાર તેના બહિષ્કારના બેનર સાથે નાગરિકો દેખાવ કરતા જોઈ શકાતા હતા. આશા રાખીએ કે ઓલિમ્પિક હેમખેમ પૂરી થાય. 8 ઓગસ્ટ સુધી ચાલનારી ઓલિમ્પિકમાં 204 દેશોના 11,000 એથ્લીટ્સ ભાગ લેવા આવ્યા છે.

from Top Stories News - Gujarat Samachar : World's Leading Gujarati Newspaper https://ift.tt/3rvLClu
via IFTTT