ભારત સહિત ૩૩ દેશોના ૧૦૦ કરોડ બાળકો પર ક્લાઈમેટ ચેન્જનો ખતરો

(પીટીઆઈ) નવી દિલ્હી, તા. ૨૧
યુનિસેફે ક્લાઈમેટ રિસ્ક ઈન્ડેક્ષ જાહેર કર્યો હતો. એ પ્રમાણે સાઉથ એશિયાના ભારત, પાકિસ્તાન, બાંગ્લાદેશ અને અફઘાનિસ્તાન એમ ચાર દેશોના બાળકો ઉપર ક્લાઈમેટ ક્રાઈસિસનું સૌથી વધુ જોખમ છે. ભારતના કરોડો બાળકો ક્લાઈમેટ ચેન્જની આડઅસરનો ભોગ બને તેવી દહેશત વ્યક્ત થઈ હતી.
ધ ક્લાઈમેટ ક્રાઈસિસ ઈઝ અ ચાઈલ્ડ રાઈટ્સ ક્રાઈસિસ ઃ ચિલ્ડ્રન્સ ક્લાઈમેટ રિસ્ક ઈન્ડેક્ષમાં યુનિસેફે બાળકોના સ્વાસ્થ્ય અને શિક્ષણ ઉપર ક્લાઈમેટ ચેન્જની અસર અંગે ચિંતા વ્યક્ત કરી હતી. ઈન્ડેક્ષ હાઈરિસ્ક પ્રમાણે બનાવાયો હતો, જેમાં ભારતને ૨૫મો ક્રમ મળ્યો હતો. દક્ષિણ એશિયાના ચાર દેશો - ભારત-પાકિસ્તાન, બાંગ્લાદેશ અને અફઘાનિસ્તાન સૌથી વધુ પ્રભાવિત થશે એવી દહેશત વ્યક્ત કરીને ભારતને ૨૫મો ક્રમ અપાયો હતો. પાકિસ્તાનને ૧૪મો, બાંગ્લાદેશને ૧૫મો અને અફઘાનિસ્તાનને ૨૫મો ક્રમ મળ્યો હતો.
અહેવાલ પ્રમાણે વિશ્વના ૩૩ દેશોના ૧૦૦ કરોડ બાળકો પર ક્લાઈમેટ ચેન્જના કારણે થનારી અસરોનું જોખમ મંડરાઈ રહ્યું છે. પૂર, વાવાઝોડાં, વાયુ પ્રદૂષણ, દૂકાળ જેવી હોનારતો જ્યાં સૌથી વધુ થવાની શક્યતા છે એમાં ભારતનો પણ સમાવેશ થાય છે. અહેવાલ મુજબ ભારતમાં એક સમયે ૬૦ કરોડ લોકો પીવાના પાણીની અછત સામે ઝૂઝતા હશે ને બીજી તરફ કરોડો લોકો પૂર અને વાવાઝોડાં સામે ઝીંક ઝીલતા હશે. આવી પરસ્પર વિરોધાભાસી કુદરતી હોનારતોનું સાક્ષી ભારત બનશે તો ભારતના કરોડો બાળકો તેનાથી પ્રભાવિત થશે. એના કારણે આ બાળકોના હેલ્થ અને એજ્યુકેશન ઉપર તેની ગંભીર અસરો પડશે.
અહેવાલમાં ચિંતા વ્યક્ત કરવામાં આવી હતી કે દુનિયામાં હવાના કારણે પ્રદૂષિત ૩૦ શહેરોમાં ૨૧ શહેરો ભારતના છે. શહેરીકરણ અને ઔદ્યોગીકરણના કારણે ભારતમાં શહેરોનું જીવનધોરણ સતત કથળતું જાય છે.
યુનિસેફના ભારત સ્થિત પ્રતિનિધિ ડૉ. યાસ્મિન અલી હકે કહ્યું હતું કે ક્લાઈમેટ ચેન્જ એ બાળકોના અધિકારો ઉપર જોખમ છે. તેના કારણે હેલ્થકેર અને એજ્યુકેશન ઉપર અસર પડશે તો કરોડો બાળકો મૂળભૂત અધિકારોથી વંચિત રહેશે. આ સ્થિતિ નિવારવા બધા દેશોએ સંયુક્ત રીતે ગ્લોબલ વોર્મિંગ બાબતે તુરંત પગલાં લેવા જરૂરી છે.

from Top Stories News - Gujarat Samachar : World's Leading Gujarati Newspaper https://ift.tt/3mmSKju
via IFTTT