ઉત્તરાખંડઃ હેમકુંડ સાહિબ અને ફૂલોની ઘાટી વચ્ચેનો રસ્તો બન્યો સરળ, સ્ટીલ ગાર્ડર પુલ બનીને તૈયાર

- પ્રશાસને 2014માં હેમ ગંગા પર ચાલીને જઈ શકાય તેવા પુલના નિર્માણ માટે સ્વીકૃતિ આપી હતી અને 7 વર્ષ બાદ તે પુલ બનીને તૈયાર થઈ ગયો

નવી દિલ્હી, તા. 18 ઓગષ્ટ, 2021, બુધવાર

ઉત્તરાખંડમાં હેમકુંડ સાહિબ યાત્રા માર્ગ પર ભ્યૂંડાર ગામ પાસે હેમ ગંગા પર 135 મીટર લાંબો સ્ટીલ ગાર્ડર પુલ બનીને તૈયાર થઈ ગયો છે. તે ક્ષેત્રનો સૌથી લાંબો ગાર્ડર પુલ છે. તેના કારણે હેમકુંડ સાહિબ અને ફૂલોની ઘાટી વચ્ચેનો રસ્તો હવે થોડો સરળ બની ગયો છે. આ પુલ બનાવવા માટે 20.73 કરોડ રૂપિયાનો ખર્ચો થયો છે. 

વર્ષ 2013માં જળ પ્રલય દરમિયાન હેમ ગંગામાં પૂર આવવાના કારણે ત્યાં બનાવાયેલો પુલ વહી ગયો હતો. આ કારણે હેમકુંડ સાહિબ અને ફૂલોની ઘાટી જતા તીર્થયાત્રીઓ અને પર્યટકોને ભારે મુશ્કેલી પડી રહી હતી. હેમકુંડ સાહિબ જવા માટે તીર્થયાત્રી ગોવિંદઘાટથી પુલના ગામ સુધી 3 કિમી વાહન દ્વારા અને ત્યાંથી 16 કિમી સુધી ચાલતા ચઢાઈ પાર કરીને પહોંચતા હતા. તે ચાલીને જવા માટેનો ટ્રેક ફૂલોની ઘાટી માટે પણ જાય છે. ગોવિંદઘાટથી 13 કિમી ચાલતા જઈએ એટલે ઘાંઘરિયાથી એક રસ્તો ફૂલોની ઘાટી તરફ જાય છે. 

વર્ષ 2013ના જળ પ્રલય દરમિયાન હેમ ગંગામાં પૂર આવવાથી ભ્યૂંડાર ગામ સાથે જ ચાલીને જઈ શકાય તેવો પુલ પણ વહી ગયો હતો. આ કારણે હેમકુંડ સાહિબ સુધી જવા માટે નદી પર બનાવાયેલા લાકડાના પુલની મદદ લેવી પડતી હતી. લોનિવિએ ત્યાં હસ્તચાલિત ટ્રોલી પણ સ્થાપિત કરી હતી પરંતુ તે થોડા મહિનાઓમાં જ ખરાબ થઈ ગઈ હતી. 

મુશ્કેલીને ધ્યાનમાં રાખીને પ્રશાસને 2014માં હેમ ગંગા પર ચાલીને જઈ શકાય તેવા પુલના નિર્માણ માટે સ્વીકૃતિ આપી હતી. હવે 7 વર્ષ બાદ તે પુલ બનીને તૈયાર થઈ ગયો છે. ફૂલોની ઘાટી જનારા પર્યટકો પણ તે પુલ દ્વારા જ અવર-જવર કરી રહ્યા છે. જોશીમઠ ક્ષેત્રનો તે સૌથી લાંબો સ્ટીલ ગાર્ડર પુલ છે. 

from Top Stories News - Gujarat Samachar : World's Leading Gujarati Newspaper https://ift.tt/2VX52UF
via IFTTT