તાલિબાનોનો વધુ ચાર શહેરો પર કબજો, હવે કાબૂલ હાથવેંતમાં

(પીટીઆઈ) કાબુલ, તા.૧૩

તાલિબાનોએ શુક્રવારે વધુ ચાર શહેરો પર કબજો જમાવવાની સાથે સમગ્ર દક્ષિણ અફઘાનિસ્તાન પર કબજો જમાવ્યો છે અને તેઓ હવે તિવ્ર ગતિએ કાબુલ તરફ આગળ વધી રહ્યા છે. અમેરિકાએ બે દાયકા લાંબા યુદ્ધના અંતની સત્તાવાર જાહેર કર્યાના બે સપ્તાહમાં જ તાલિબાનો આખા અફઘાનિસ્તા પર પ્રભુત્વ જમાવવા સક્રિય થઈ ગયા છે. તેમણે સત્તામાં ભાગીદાર બનવાની વર્તમાન રાષ્ટ્રપતિ અબ્દુલ ગનિની ઓફર પણ ફગાવી દીધી હતી. તાલિબાનોએ હેલમંદ પ્રાતની રાજધાની પર પણ કબજો જમાવી દીધો છે. તાલિબાનો સામે પરાજયના ડરથી રાષ્ટ્રપતિ અબ્દુલ ગનીએ રાજીનામુ આપી દીધું હોવાની આશંકા વ્યક્ત થઈ રહી છે.

તાલિબાનોએ તાજેતરના સમયમાં અફઘાનિસ્તાનના બીજા અને ત્રીજા ક્રમના શહેરો હેરાત અને કંદહાર સહિત ૩૪ પ્રાંતિય પાટનગરો પર કબજો જમાવી લીધો છે. અમેરિકાએ તેના દળો પાછા ખેંચવાની યોજના જાહેર કર્યાના કેટલાક સપ્તાહમાં જ તાલિબાનોએ બે તૃતિયાંશ અફઘાનિસ્તાન પર કબજો જમાવી લીધો છે. હવે તાલિબાનો કાબુલ તરફ આગળ વધી રહ્યા છે. અમેરિકન સૈન્ય ગુપ્તચર અહેવાલો મુજબ તાલિબાનો ૩૦ દિવસની અંદર કાબુલ પર કબજો જમાવી શકે છે. તાલિબાનો જે રીતે આગળ વધી રહ્યા છે તે જોતાં તેઓ ટૂંક સમયમાં જ આખા અફઘાનિસ્તાન પર કબજો જમાવી શકશે.

દરમિયાન ભારતે અફઘાનિસ્તાનમાંથી હિન્દુઓ અને શીખોને વહેલી તકે બહાર કાઢવાની તૈયારી હાથ ધરી છે. ભારતે હજી કાબુલનું તેનું દૂતાવાસ બંધ કરવા અંગે કોઈ નિર્ણય કર્યો નથી, પરંતુ તાલિબાનો જે તિવ્ર ગતિએ કાબુલ તરફ આગળ વધી રહ્યા છે તેને ધ્યાનમાં રાખીને ભવિષ્યમાં તે અંગે નિર્ણય લેવાઈ શકે છે. ભારતે તાજેતરમાં જ મઝાર-એ-શરીફમાંથી ૫૦થી વધુ કર્મચારીઓ અને અધિકારીઓને બહાર કાઢ્યા હતા. ગયા વર્ષે પણ ૩૮૦ લઘુમતીઓને ભારત લવાયા હતા. અફઘાનિસ્તાનની બગડતી સ્થિતિને જોતાં ભારત સરકારે ભારતીય નાગરિકોને આંતરરાષ્ટ્રીય ઉડ્ડયનો ચાલુ છે ત્યાં સુધીમાં અફઘાનિસ્તાનમાંથી બહાર નિકળી જવાની સૂચના આપી દીધી છે. ભારતે તાલિબાનોના પ્રભુત્વવાળા વિસ્તારમાંથી ત્રણ ભારતીય એન્જિનિયરોને બચાવ્યા હતા.

તાલિબાનોએ દક્ષિણમાં હેલમંદ ઉપરાંત ઝાબુલ અને ઉરુઝગાન પ્રાંતોના પાટનગર પર કબજો જમાવી દીધો છે. હેલમંદમાં પ્રાંતિય પરિષદના વડા અતાઉલ્લાહ અફઘાને જણાવ્યું હતું કે તાબિલાનોએ ભારે લડત પછી લશ્કર ગાહ પર કબજો જમાવી દીધો છે અને સરકારી ઈમારતો પર તેમનો સફેદ ધ્વજ ફરકાવી દીધો છે. જોકે, લશ્કર ગાહની બહાર ત્રણ રાષ્ટ્રીય આર્મી બેઝ હજી પણ સરકારના નિયંત્રણ હેઠળ છે. ઝાબુલ પ્રાંતના વડા અતા જન હકબાયને જણાવ્યું કે સ્થાનિક પાટનગર કલાત તાબિલાનોના હાથમાં જતું રહ્યું છે. ઉરુઝગાન પ્રાંતના બિસ્મિલ્લાહ જન મોહમ્મદ અને કુદ્રાતુલ્લા રહિમિએ પણ કહ્યું હતું કે તિરિન કોટમાં સરકારી અધિકારીઓએ તાલિબાનો સામે આત્મસમર્પણ કરી દીધું છે.

તાલિબાનોએ હેરાત પ્રાંત પર કબજો કરવાની સાથે 'હેરાતના શેર' તરીકે ઓળખાતા ઈસ્માઈલ ખાનને પકડી લીધા છે. અફઘાનિસ્તાનના અધિકારીઓએ જણાવ્યું કે, તાલિબાનોએ પશ્ચિમી શહેર હેરાત પર કબજો જમાવી દીધો છે. ઈસ્માઈલ ખાનની સાથે તાલિબાનોએ ઉપગૃહમંત્રી જનરલ રહેમાન અને ટોચના પોલીસ અધિકારીઓને પણ પકડી લીધા છે. ઈસ્માઈલ ખાન, પોલીસ અને સ્થાનિક સૈન્યના પ્રમુખ હેલિકોપ્ટરથી કાબુલ રવાના થવાની તૈયારી કરતા હતા, પરંતુ એક સમજૂતી હેઠળ અફઘાન સૈનિકોએ જ ઈસ્માઈલ ખાન અને ટોચના અધિકારીઓને તાલિબાનોને સોંપી દીધા હતા. ઈસ્માઈલ ખાનને અમેરિકા તરફી માનવામાં આવે છે.

અફઘાનિસ્તાનની પશ્ચિમે ઘોર પ્રાંતમાં પ્રાંતિય પરિષદના વડા ફઝિલ હક એહસાને કહ્યું હતું કે, તેમનું પાટનગર ફીરોઝ કોહ પણ તાલિબાની આતંકીઓના હાથમાં જતું રહ્યું છે. અફઘાનિસ્તાનમાં તાલિબાનોના વધતા પ્રભુત્વના પગલે રાષ્ટ્રપતિ અબ્દુલ ગનિએ રાજીનામુ આપી દીધું હોવાની અફવા ફેલાઈ હતી. જોકે, અફઘાનિસ્તાનની સરકારે આ અફવાઓને નકારી કાઢી છે. દરમિયાન અફઘાનિસ્તાનના ઉપરાષ્ટ્રપતિ સાલેહ પણ તાજિકિસ્તાન ભાગી ગયા હોવાની અફવા ફેલાઈ હતી. જોકે, અમરુલ્લાહ સાલેહની ઓફિસે આ અફવાઓને ફગાવી દેતાં કહ્યું કે અમરુલ્લાહ કાબુલમાં જ છે.

પાકતિકામાં કોરોનાની રસી પર તાલિબાનોનો પ્રતિબંધ

અફઘાનિસ્તાનમાં તાલિબાનોનું પ્રભુત્વ વધવાની સાથે તેઓ તેમના કાયદા લોકો પર થોપી રહ્યા છે. મહિલાઓને બહાર નિકળવા પર પ્રતિબંધ મૂકવાથી લઈને પુરુષોને દાઢી વધારવા જેવા તાલિબાની કાયદાઓ ફરીથી અફઘાનિસ્તાનમાં અમલમાં મુકાઈ રહ્યા છે. એવામાં પૂર્વ અફઘાનિસ્તાનમાં તેમના પ્રભૂત્વ હેઠળના પાકતિકામાં તાલિબાનોએ લોકોને કોરોનાની રસી લેવા પર પ્રતિબંધ મૂકી દીધો છે. આ સંદર્ભમાં તેમણે પાકતિકા રિજનલ હોસ્પિટલમાં એક બોર્ડ પણ મૂકાવ્યું હોવાનું અફઘાનિસ્તાન સ્થિત રેડિયો અને ટેલિવિઝન પ્લેટફોર્મ શમશાદ ન્યૂઝના અહેવાલમાં જણાવ્યું હતું. તાલિબાનોએ ગયા સપ્તાહે આ વિસ્તાર પર કબજો જમાવ્યો હતો.

from Top Stories News - Gujarat Samachar : World's Leading Gujarati Newspaper https://ift.tt/3jW4Xsy
via IFTTT