ભારતના ભાલ પર નીરજ ચોપરાનું સુવર્ણ તિલક

અત્યાર સુધીના તમામ ઑલિમ્પિકમાં આ વખતે ભારતનો શ્રેષ્ઠ દેખાવ : એક ગોલ્ડ, બે સિલ્વર, ચાર બ્રોન્ઝ

નીરજ ચોપરાનો 87.58 મીટરના થ્રો સાથે ભાલા ફેંકમાં ગોલ્ડ મેડલ : ગૌરવ સાથે દેશભરમાં ખુશીનો માહોલ

શૂટર અભિનવ બિન્દ્રા (2008) પછી નીરજ ચોપરા વ્યક્તિગત ગોલ્ડ જીતનાર બીજો ભારતીય

ઑલિમ્પિક ઇતિહાસમાં ભારતનો એથ્લેટિક્સમાં સૌ પ્રથમ ગોલ્ડ મેડલ

ટોક્યો : નીરજ ચોપરાએ ઑલિમ્પિકમાં ભારત માટે ઇતિહાસ સર્જતા ભાલા ફેંકના ઇવેન્ટમાં 87.58 મીટર થ્રો ફેંકી ગોલ્ડ જીત્યો છે. ઑલિમ્પિકમાં આ અગાઉ ભારતે ક્યારેય ટ્રેક એન્ડ ફિલ્ડ એટલે કે એથ્લેટિક્સ ઇવેન્ટમાં ગોલ્ડ મેડલ નહતો જીત્યો આમ ઇતિહાસમાં તેનું નામ સોનેરી અક્ષરે લખાશે. ભારતના ઑલિમ્પિક ઇતિહાસનો આ ભારતનો બીજો જ વ્યક્તિગત ગોલ્ડ મેડલ છે.

અગાઉ 2008માં શુટિંગમાં અભિનવ બિન્દ્રાએ ગોલ્ડ મેડલ જીત્યો હતો. ભારતનો હોકીમાં આઠ ગોલ્ડ મેડલ મળ્યા છે પણ તે ટીમ ઇવેન્ટ કહેવાય છે. ભારત માટે જોગાનુજોગ આ ઑલિમ્પિકનો ભાલા ફેંક આખરી ઇવેન્ટ હતો અને તેમાં જ ભારતે ગોલ્ડ મેડલ જીતીને સુખદ, સીમાચિહ્નરૂપ મહોર સાથે અભિયાન પૂર્ણ કર્યું હતું.

આજે ભારતના કુસ્તીબાજ બજરંગ પુણિયાએ 65 કિલોગ્રામ વજન ગુ્રપમાં ફ્રી સ્ટાઇલમાં બ્રોન્ઝ મેડલ જીત્યો હતો. આમ આજના એક જ દિવસમાં ભારતે એક ગોલ્ડ અને એક બ્રોન્ઝ મેડલ જીત્યો હતો. ભારતે આ ઑલિમ્પિકમાં એક ગોલ્ડ, બે સિલ્વર અને ચાર બ્રોન્ઝ મેડલ જીત્યા છે જે અત્યાર સુધીની તમામ ઑલિમ્પિકમાં તેઓનો સર્વશ્રેષ્ઠ દેખાવ છે.

છેલ્લા વર્ષોનો દેખાવ તેમજ તેમની રમતમાં પ્રભુત્વ જોતાં ભારત પી.વી. સિંધુ (બેડમિંટન), બજરંગ પુણિયા (કુસ્તી) અને નીરજ ચોપરા (ભાલા ફેંક) ગોલ્ડ મેડલ જીતી શકે તેવી આશા સાથે ઉતર્યા હતા તેવી રીતે શુટિંગ અને તિરંદાજીમાં પણ ભારત ગોલ્ડ મેડલ જીતી શકે તેવા રેકોર્ડ અને રેન્કિંગ સાથે ઉતર્યું હતું. નીરજ ચોપરાએ તેના એશિયન ગેમ્સ, વર્લ્ડ જુનિયર કોમન વેલ્થના થ્રોના મીટરનું સાતત્ય જાળવી રાખ્યું હતું.

આ ઓલિમ્પિકમાં તેણે ક્વોલિફાય થતા પણ સૌથી વધુ અંતરનો થ્રો (86.59 મીટર) ફેંક્યો હતો. 23 વર્ષીય નીરજ ચોપરા તેની કારકિર્દીની આ પ્રથમ ઓલિમ્પિકમાં જ ઉતર્યો હતો અને તેણે આ સિધ્ધી પ્રાપ્ત કરી હતી.

નીરજ ચોપરાએ પ્રથમ થ્રો 87.03 મીટર, બીજો 87.58 મીટર, ત્રીજો 76.79 મીટર, ચોથો અને પાંચમો ફાઉલ અને છઠ્ઠો અને આખરી થ્રો 84.24 મીટરનો ફેંક્યો હતો. આખરી આઠ ફાઇનલિસ્ટોને વારાફરતી વધુ ત્રણ થ્રો આપવામાં આવતા હતા. કુલ છમાંથી જે સૌથી વધુ મીટરનો હોય તે ગણવામાં આવે.

બીજા ક્રમે ચેક રિપબ્લીકના જાકુબ વાડલેચ (86.67) અને ત્રીજા ક્રમે વીટ્ેઝેવ વેસેલી (85.44) સાથે રહ્યા હતા. નીરજે બીજા થ્રોમાં 87.58 મીટરનો આંક પ્રાપ્ત કર્યો હતો તે કોઇ હરિફ પાર પાડી નહતું શક્યું.

જર્મનીનો વેટર તમામ હરિફોમાં એકમાત્ર ખેલાડી હતો જે નીરજને માટે ઈવેન્ટ પહેલા ચિંતાજનક હતો કેમ કે વેટર 90 મીટરથી ઉપર થ્રો તેની કારકિર્દીમાં ઘણી વખત ફેંકી ચૂક્યો છે. પણ આજે નિર્ણાયક સમયે ફ્લોપ નીવડયો હતો. નીરજ ચોપરાએ ગોલ્ડ મેડલ જીત્યો તે સમાચાર દેશભરમાં ફરી વળતા ઉજવણી અને અભિનંદનની વર્ષાનો માહોલ છવાઇ ગયો હતો.

સોશિયલ મીડિયા પ્લેટફોર્મ પણ ભારતની અને નીરજની સિધ્ધીથી છલકાઇ ગયું હતું. વડાપ્રધાન મોદીએ નીરજ ચોપરા જોડે ફોન પર વાત કરી અભિનંદન પાઠવ્યા હતા. 1984માં સ્હેજ માટે એથ્લેટિક્સ ઈવેન્ટમાં મેડલ ચૂકી જનાર પી.ટી. ઉષાએ નીરજને અભિનંદન આપતા કહ્યું હતું કે મારૂ અધૂરૂ સ્વપ્ન પૂરૂ થયું.

ભારતનો આ અગાઉનો ઓલિમ્પિક શ્રેષ્ઠ દેખાવ 2012માં છ મેડલ હતો જેમાં બે સિલ્વર વિજય કુમાર (શુટિંગ), સુશીલ કુમાર (કુસ્તી) અને ચાર બ્રોન્ઝ ગગન નારંગ (શુટિંગ), યોગેશ્વર દત્ત (કુસ્તી), મેરી કોમ (બોક્સિંગ) અને સાયના નેહવાલનો (બેડમિંટન) સમાવેશ થતો હતો.

આ વખતે નીરજ ચોપરા (ભાલા ફેંક)એ ગોલ્ડ, રવિ દહિયા (કુસ્તી) અને મીરાબાઇ ચાનુ (વેઇટ લિફ્ટીંગ)એ સિલ્વર તેમજ પી.વી. સિંધુ (બેડમિંટન), લવલિના (બોક્સિંગ), બજરંગ પુણિયા (કુસ્તી) અને ભારતની મહિલા હોકીએ બ્રોન્ઝ જીત્યા. આમ ભારતે કુલ સાત મેડલ જીત્યા છે તે સર્વોચ્ચ દેખાવ છે.

નીરજ પર શુભેચ્છાઓનો વરસાદ

નીરજે ભારતના ટ્રેક એન્ડ ફિલ્ડમાં ગોલ્ડ મેડલના દૂકાળનો અંત લાવ્યો હતો. આ ગોલ્ડ મેડલ દેશના લાખો યુવાનોને પ્રેરણા આપતો રહેશે. 

- રાષ્ટ્રપતિ રામનાથ કોવિંદ

ટોક્યો ઓલિમ્પિકમાં નીરજે ઈતિહાસ લખી નાખ્યો. શું કમાલની રમત બતાવી. આખો દેશ આ સફળતા પર ગર્વ કરી રહ્યો છે. ભવિષ્ય માટે શુભેચ્છાઓ

- ઉપરાષ્ટ્રપતિ વૈંકેયા નાયડુ

આ દિવસ દેશ ક્યારેય ભૂલશે નહીં. નીરજે છેક સુધી જોશપૂર્વક રમત બતાવી હતી. મેં નીરજ સાથે વાત કરીને તેને શુભેચ્છા પાઠવી હતી. આ તેની સખત મહેનત અને ટેલેન્ટનું પરિણામ છે.

- વડાપ્રધાન નરેન્દ્ર મોદી

રમતગમત ક્ષેત્રે ઓલિમ્પિક ગોલ્ડ સૌથી મોટી સિદ્ધિ છે. નીરજ મને ખાતરી છે કે નીરજ ચોપરાનો આ ગોલ્ડ મેડલ અન્ય ભારતીય ખેલાડીઓને પણ પ્રેરણા આપશે.

- સોનિયા ગાંધી

નીરજે ઇતિહાસ રચ્યો. ગોલ્ડમેડલ અંકે કરીને નીરજે દેશવાસીઓનું માથું ગૌરવથી ઊંચું કર્યું છે.

- રાહુલ ગાંધી

એ માતા-પિતાને ધન્ય છે, જેમણે આવો સપૂત દેશને આપ્યો. ટોક્યોમાં તિરંગો ફરકાવનારા હરિયાણાના સપૂત નીરજને ગોલ્ડ મેડલ માટે ખૂબ ખૂબ શુભેચ્છાઓ

- મનોહરલાલ ખટ્ટર, હરિયાણાના મુખ્યમંત્રી

વેલ્ડન ગોલ્ડન બોય! ભારતનો ઓલિમ્પિક ઈતિહાસ આજે નવેસરથી લખાયો. નીરજનું નામ ઈતિહાસના પાને હંમેશા માટે અંકિત થઈ ગયું. ખૂબ ખૂબ આભાર અને શુભેચ્છાઓ.

- અનુરાગ ઠાકુર, કેન્દ્રીય રમતગમત મંત્રી

નીરજ તેં દેશનું સપનું સાકાર કર્યું છે તેના માટે આભાર. ગોલ્ડ ક્લબમાં તારૂં સ્વાગત છે.

- અભિનવ બિન્દ્રા - પ્રથમ વ્યક્તિગત ગોલ્ડ મેડલ વિજેતા ખેલાડી

નીરજે ભાલાફેંકને દેશમાં સુરજ જેટલી ઊંચાઈ આપી. ઇન્ડિયન સ્પોર્ટ્સ માટે આ યાદગાર ક્ષણ હતી. 

- સચિન તેંડુલકર

ભારતના ઓલિમ્પિકના ઇતિહાસની ગૌરવપૂર્ણ અને ઐતિહાસિક ક્ષણ. નીરજને અભિનંદન. 

- અમિત શાહ - ગૃહમંત્રી

'હું ગોલ્ડ મેડલ સાથે મિલ્ખા સિંઘને મળવા ઈચ્છતો હતો'

નીરજ ચોપરાએ તેનો ગોલ્ડ મેડલ મિલ્ખા સિંઘને અર્પણ કર્યો

1960ના રોમ ઓલિમ્પિકમાં 0.01 સેકન્ડથી મેડલ ચૂકેલા મિલ્ખા સિંઘની આખરી ઈચ્છા તેમના નિધન બાદ નીરજે પુરી કરી

ટોક્યો : ઓલિમ્પિકમાં ભારતને સૌપ્રથમ એથ્લેટિક્સનો ગોલ્ડ મેડલ અપાવનારા નીરજ ચોપરાએ તેનો ગોલ્ડ મેડલ લેજન્ડરી એથ્લીટ મિલ્ખા સિંઘને અર્પણ કર્યો હતો. ભારતીય એથ્લીટને ઓલિમ્પિકમાં ગોલ્ડ મેડલ જીતતો જોવો છે તેવી આખરી ઈચ્છા વ્યક્ત કરનારા મિલ્ખા સિંઘનું  નિધન 18મી જુનના રોજ થયું હતુ. 

નીરજે કહ્યું હતું કે, હું ગોલ્ડમેડલ સાથે મિલ્ખા સિંઘને મળવા માટે ઈચ્છતો હતો. ભારતના લેજન્ડરી એથ્લીટ મિલ્ખા સિંઘ 1960ના રોમ ઓલિમ્પિકમાં 0.01 સેકન્ડના સમયથી મેડલ ચુકી ગયા હતા. જે પછી તેમણે અનેક ઈન્ટરવ્યૂમાં જણાવ્યું હતુ કે, મારા જીવનની આખરી ઈચ્છા છે કે, હું ભારતીય એથ્લીટને ઓલિમ્પિકની એથ્લેટિક્સ સ્પર્ધામાં ગોલ્ડ મેડલ જીતતો જોઉં. અલબત્ત, મિલ્ખા સિંઘની આખરી ઈચ્છા તેમના જીવનકાળમાં પુરી થઈ શકી નહતી અને તેમનું 18 જુનના રોજ નિધન થયું હતુ.

from Top Stories News - Gujarat Samachar : World's Leading Gujarati Newspaper https://ift.tt/2VD0a7f
via IFTTT