અમેરિકામાં 24 કલાકમાં કોરોનાના 1.60 લાખથી વધુ કેસ : સપ્તાહમાં 2.50 લાખ બાળકોને ચેપ

અમેરિકાની કોરોનાથી મુક્તિની આશા ઠગારી નીવડી, ડેલ્ટાએ કેર મચાવ્યો

અમેરિકામાં અનેક નિયંત્રણો લદાયા : સરકારી-ખાનગી કર્મીઓ માટે રસી ફરજિયાત, રસી નહીં લેનારે નોકરી ગુમાવવી પડશે

ખાનગી કર્મચારી રસી નહીં લે તો 14,000 ડોલરનો દંડ, વિમાનમાં માસ્ક નહીં પહેરનારને દંડની રકમ બમણી કરાઈ

અમેરિકામાં એક દિવસમાં કોરોનાથી 2,000નાં મોત સાથે મૃત્યુઆંક 6.74 લાખ, એક્ટિવ કેસ 91.41 લાખને પાર

વોશિંગ્ટન, તા.૧૦

અમેરિકામાં અમેરિકન પ્રમુખ જો બાઈડેને જુલાઈમાં વ્હાઈટ હાઉસમાં સમારંભ યોજી કોરોનાથી આઝાદીનો ઉત્સવ ઉજવ્યો હતો અને ઑગસ્ટ સુધીમાં દેશને કોરોનાથી મુક્તિ મળી જશે તેવી આશા વ્યક્ત કરી હતી, પરંતુ અમેરિકાની આ આશા ઠગારી નીવડી છે. અમેરિકામાં કોરોનાના ડેલ્ટા વેરિઅન્ટે માથું ઊંચકતા કેટલાક દિવસથી દૈનિક સરેરાશ દોઢ લાખથી વધુ કેસ આવી રહ્યા છે અને અંદાજે ૧,૫૦૦ લોકો મોતને ભેટી રહ્યા છે. એવામાં અમેરિકા ફરી પાછું કોરોનાની ભયાનક સ્થિતિમાં પહોંચી ગયું છે. વધુમાં અમેરિકામાં સ્કૂલો ખૂલતાં જ છેલ્લા સાત દિવસમાં ૨.૫૦ લાખથી વધુ બાળકો કોરોનાની ઝપેટમાં આવી ગયા છે.

અમેરિકામાં કેટલીક જગ્યાઓ પર કોરોનાથી થતાં મોતના આંકડા આખી મહામારી દરમિયાન હાલમાં સર્વોચ્ચ સ્તરે પહોંચી ગયા છે. કોરોનાના કેસ ઘટતાં એક સમયે શરૂ થયેલી સ્કૂલો ફરી બંધ થવા લાગી છે. માસ્ક અને રસીની જરૂરિયાતો અંગે કાયદાકીય લડાઈ અને હિંસા શરૂ થઈ ગઈ છે. એક સમયે કોરોનાના કેસ ઘટતાં નિયંત્રણોમાં ભારે છૂટછાટ આપનારા બાઈડેન તંત્રે નવા નિયંત્રણોની જાહેરાત કરવી પડી છે, જેમાં રસીકરણ અને માસ્કને ફરજિયાત બનાવવાનો સમાવેશ થાય છે.

અમેરિકામાં કોરોનાના નવા ૧.૬૦ લાખથી વધુ કેસ આવ્યા હતા અને વધુ ૨,૦૦૦ જેટલા લોકોનાં મોત નીપજ્યાં હતા. આ સાથે અમેરિકામાં કોરોનાના કુલ કેસ ૪.૧૫ કરોડને પાર થઈ ગયા છે અને એક્ટિવ કેસની સંખ્યા પણ વધીને ૯૧.૪૧ લાખને પાર થઈ ગઈ છે. દેશમાં કોરોનાથી કુલ મૃત્યુઆંક ૬.૭૪ લાખથી વધુ થયો છે. એક અંદાજ મુજબ ૧લી ડિસેમ્બર સુધીમાં અમેરિકામાં મૃત્યુઆંક ૭.૫ લાખથી વધુ થઈ શકે છે.  જુલાઈમાં પ્રમુખ જો બાઈડેને વ્હાઈટ હાઉસમાં સમારંભ યોજી કોરોનાથી મુક્તિનો ઉત્સવ ઊજવ્યો હતો, પરંતુ થોડાક જ સમયમાં કોરોનાના ડેલ્ટા વેરિઅન્ટે દેશને ફરીથી કોરોનાના અજગર ભરડામાં ધકેલી દીધો. આખા જૂન મહિનામાં કોરોનાના અંદાજે ચાર લાખ કેસ સામે આવ્યા હતા જ્યારે ઑગસ્ટમાં આ આંકડો ૪૨ લાખને પાર પહોંચી ગયો. આ સમય દરમિયાન ૨૬,૮૦૦ લોકોનાં મોત થઈ ગયા હતા. ડેલ્ટા વેરિઅન્ટથી પહેલાની સરખામણીમાં નાની વયના લોકોના મોતનું પ્રમાણ વધ્યું છે.

વધુમાં અમેરિકન એકેડમી ઓફ પીડિયાટ્રિક્સ એન્ડ ધ ચિલ્ડ્રન હોસ્પિટલ એસોસિએશનના તાજા સાપ્તાહિક રિપોર્ટ મુજબ અમેરિકામાં સ્કૂલો ખૂલ્યા પછી છેલ્લા એક સપ્તાહમાં ૨.૫૦ લાખથી વધુ બાળકો કોરોનાની ઝપટમાં આવી ગયા છે અને દેશમાં અત્યાર સુધીમાં કોરોના સંક્રમિત કુલ બાળકોની સંખ્યા ૫૦ લાખને પાર થઈ ગઈ છે. છેલ્લા એક મહિનામાં ૭.૫૦ લાખથી વધુ બાળકો કોરોનાથી સંક્રમિત થયા છે.

વેસ્ટ વર્જિનિયાના સ્વાસ્થ્ય અધિકારીએ જણાવ્યું હતું કે કેટલાક ગ્રામીણ વિસ્તારોમાં હોસ્પિટલોની બેડ ભરાઈ ગઈ છે. જ્યોર્જિયાના પાટનગર એટલાન્ટાની હોસ્પિટલોમાં પણ આ જ સ્થિતિ છે. અહીં કોરોના સિવાયના દર્દીઓની સર્જરી હાલ અટકાવી દેવાઈ છે. માત્ર કોરોનાના દર્દીઓની જ ભરતી કરાઈ રહી છે. અન્ય શહેરોમાં પણ હોસ્પિટલોમાં દર્દીઓની સંખ્યા વધી રહી છે.

અમેરિકામાં કોરોનાની સ્થિતિ વકરતાં પ્રમુખ બાઈડેને કોરોના સામેની લડાઈમાં બાકીના અમરિકનોને પણ રસી લગાવવાનું અભિયાન શરૂ કર્યું છે. તેમણે કહ્યું કે કેન્દ્રીય કર્મચારીઓ માટે રસી લેવાનું ફરજિયાત કરાયું છે. વધુમાં ૧૦૦થી વધુ કર્મચારીઓ ધરાવતી કંપનીઓના કર્મચારીઓ માટે પણ રસી લેવાનું ફરજિયાત કરાયું છે. કર્મચારીઓને રસી લેવા માટે ૭૫ દિવસનો સમય અપાયો છે. આ સમયમાં તેઓ રસી નહીં લે તો તેમણે નોકરી ગુમાવવી પડી શકે છે. અન્યથા દર સપ્તાહે તેમની કોરોના તપાસ થશે. વિમાનમાં પ્રવાસ દરમિયાન યોગ્ય રીતે માસ્ક નહીં પહેરનારા પર દંડ બમણો કરી દેવાયો છે. વર્તમાન દંડ ૨૫૦થી ૧૫૦૦ ડોલરનો છે, જે વધારીને ૩,૦૦૦ ડોલર સુધીનો કરાયો છે. ખાનગી કંપનીના કર્મચારીઓ માટે પણ રસી ફરજિયાત કરાઈ છે. રસી નહીં લેનારા કર્મચારીઓને ૧૪,૦૦૦ ડોલરનો દંડ કરવાની જોગવાઈ કરાઈ છે.

from Top Stories News - Gujarat Samachar : World's Leading Gujarati Newspaper https://ift.tt/3E9WWcK
via IFTTT