નવરાત્રીમાં દિલ્હી, યુપી, મહારાષ્ટ્રમાં હુમલાનું કાવતરૂં, બે પાકિસ્તાની સહિત છ આતંકી ઝડપાયા

દિલ્હી પોલીસ અને ઉત્તર પ્રદેશ એટીએસ દ્વારા પાક.ની આઇએસઆઇના મોડયૂલનો પર્દાફાશ

મહારાષ્ટ્રમાંથી એક, ઉત્તર પ્રદેશથી ત્રણ અને દિલ્હીમાંથી બે આતંકીઓ ઝડપાયા, પાક. જઇને તાલિમ લીધી હતી 

પુલવામા જેવા હુમલાની ઘાત ટળી, કાશ્મીરમાં હાઇવે પર બિછાવેલા છ ગ્રેનેડ જપ્ત, એક હુમલામાં ચાર નાગરિક ઘાયલ

ભારતમાં આતંકીઓને હુમલા માટે હથિયારો આપવાની જવાબદારી દાઉદના ભાઇની હતી

પાક.થી તાલિમ લઇને 15 બાંગ્લાદેશી આતંકીઓ ભારતમાં ઘુસ્યા, એજન્સીઓ અને પોલીસ એલર્ટ

નવી દિલ્હી : ઉત્તર પ્રદેશ એટીએસએ આઇએસઆઇ મોડયૂલનો પર્દાફાશ કર્યો છે અને ત્રણ આતંકીઓની ધરપકડ કરી છે. સાથે જ તેમની પાસેથી મોટા પ્રમાણમાં આઇઇડી પણ જપ્ત કર્યું છે.

આ આતંકીઓની ધરપકડ પહેલા લખનઉ, રાયબરેલી, પ્રયાગરાજ અને પ્રતાપગઢ એમ ચાર જિલ્લાઓમાં એટીએસએ દરોડા પાડયા હતા. જ્યારે દિલ્હી પોલીસ દ્વારા પણ નવરાત્રી દરમિયાન દિલ્હી, યુપી, મહારાષ્ટ્ર સહિત કેટલાક રાજ્યોમાં મોટા આતંકી હુમલાના કાવતરાનો પર્દાફાશ કરાયો છે અને કુલ છ આતંકીઓની ધરપકડ કરવામાં આવી છે.  

દિલ્હી પોલીસે જણાવ્યું હતું કે સૌથી પહેલા એક આતંકીની મહારાષ્ટ્રમાંથી ધરપકડ કરાઇ હતી, જેની પૂછપરછ બાદ યુપીમાથી ત્રણ અને દિલ્હીમાંથી બે આતંકીઓની ધરપકડ કરવામાં આવી છે. એટલે કે પુરા ઘટનાક્રમમાં કુલ છ આતંકીઓની ધરપકડ કરવામાં આવી છે. આતંકીઓના નિશાના પર નવરાત્રીની ઉજવણી દરમિયાન એકઠી થતી ભીડ હતી. ધરપકડ કરાયેલા પૈકી બે આતંકીઓને 15 દિવસની તાલિમ માટે પાકિસ્તાન મોકલવામાં આવ્યા હતા.

આ આતંકીઓ ફ્લાઇટથી મસ્કટ પહોંચ્યા અને બાદમાં બોટની મદદથી પાકિસ્તાન ગયા હતા. ઉત્તર પ્રદેશ એટીએસ ઉપરાંત દિલ્હી પોલીસની સ્પેશિયલ સેલે પાક.થી સંચાલિત આતંકી મોડયૂલનો ભાંડો ફોડયો હતો. પોલીસની ટીમે બે આતંકીઓની ધરપકડ કરી છે. ધરપકડ કરાયેલા આતંકીઓના નામ જીશાન, જાન મોહમ્મદ અલી, મોહમ્મદ અબૂ બકર, ઓસામા, મોહમ્મદ આમીર જાવેદ અને મૂલચંદ ઉર્ફ લાલા  છે.

ટ્રેનિંગ બાદ તેમને પાકિસ્તાનથી ભારત પરત મોકલી દેવામાં આવ્યા હતા. આ આતંકીઓની યોજના નવરાત્રી દરમિયાન યુપી, દિલ્હી, મહારાષ્ટ્ર તેમજ અન્ય રાજ્યોમાં મોટા આતંકી હુમલા કરવાની હતી. પાકિસ્તાનમાં રહી રહેલા અંડર વર્લ્ડ ડોન દાઉદના ભાઇ અનીસને ભારતમાં આ આતંકીઓને હિથયારો પુરા પાડવાની જવાબદારી સોપવામાં આવી હતી. 

આ સાથે જ પાકિસ્તાનમાં અન્ય 15 બાંગ્લાદેશી આતંકીઓેએ પણ તાલિમ લીધી હતી, જેને પણ આ આતંકીઓની સાથે ભારતમાં મોકલી દેવામાં આવ્યા છે. જેની શોધખોળ ચાલી રહી છે. બીજી તરફ જમ્મુ કાશ્મીરના પુલવામામાં આતંકીઓ દ્વારા સુરક્ષા જવાનો પર ગ્રેનેડ હુમલો કરવામાં આવ્યો હતો. આ હુમલામાં ચાર નાગરિકો ઘવાયા હતા.

આતંકીઓએ સુરક્ષા જવાનોના વાહન પર ગ્રેનેડ ફેક્યો હતો પણ તે નિશાન ચુકી જતા આમ નાગરિકો પર પડયો હતો, જેને પગલે જવાનો પરની મોટી ઘાત ટળી હતી પણ આમ નાગરિકો ઘવાયા હતા જેમને હાલ હોસ્પિટલમાં સારવાર અપાઇ રહી છે. બીજી તરફ આતંકીઓ દ્વારા અહીંના નેશનલ હાઇવે નંબર 44 પર છ ગ્રેનેડ બીછાવ્યા હતા, જેને શોધીને સુરક્ષા જવાનોએ નાશ કર્યો હતો. 

જાપાને છ દેશોમાં તેના નાગરિકોને આતંકી હુમલાની ચેતવણી આપી 

ફિલિપાઇન્સ, સિંગાપોર,મલેશિયા, ઇન્ડોનેશિયા, થાઇલેન્ડ અને મ્યાંમારમાં હુમલા થવાની આશંકા

જાપાનના વિદેશ મંત્રાલયે દક્ષિણપૂર્વ એશિયામાં આવેલા છ દેશોમાં ધાર્મિક સ્થળો અને ટોળાઓથી દૂર રહેવાની તેમના નાગરિકોને ચેતવણી આપી જણાવ્યું હતું કે આ દેશોમાં આતંકી આત્મઘાતી હુમલા થવાની સંભાવનાઓ છે. મંત્રાલયે જણાવ્યું હતું કે આત્મઘાતી હુમલા થવાનું જોખમ વધ્યું હોવાની તેમને માહિતી મળી છે. આ ચેતવણી ઇન્ડોનેશિયા, ફિલિપાઇન્સ, સિંગાપોર, મલેશિયા, થાઇલેન્ડ અને મ્યાંમારમાં વસતાં જાપાનીઓને લાગુ પડે છે. 

જે દેશોમાં આવા આતંકી હુમલા થવાની ચેતવણી આપવામાં આવી છે તે દેશોમાં આ ચેતવણીને કારણે અસંમજસની સ્થિતિ સર્જાઇ હતી. આ દેશોના અધિકારીઓએ તેમને આવું કોઇ જોખમ હોવાની જાણ ન હોવાનું જણાવ્યું હતું. જાપાને પણ તેની આ વિગતોની વિશેષ જાણકારી આપી નથી.

થાઇલેન્ડના પોલીસ પ્રવક્તાએ જણાવ્યું હતું કે જાપાને તેને આ માહિતી ક્યાંથી મળી તે જણાવ્યું નથી. જાપાનના રાજદૂતાવાસે પણ આ ચેતવણી થાઇલેન્ડ માટે ન હોવાનું જણાવ્યું હતું. સુરક્ષા સંસ્થાઓને પણ આ પ્રકારનું કોઇ જોખમ હોવાની જાણ નથી. ફિલિપાઇન્સ અને ઇન્ડોનેશિયાના વિદેશખાતાના પ્રવક્તાએ પણ આવી જ પ્રતિક્રિયા આપી હતી.

જાપાને તેની સલાહમાં તેના નાગરિકોને જણાવ્યું હતું કે  તેઓ સ્થાનિક સમાચારો પર ધ્યાન આપે તથા હાલ પૂરતા સાવચેતી રાખીને વર્તે. આંતકી હુમલો ક્યારે થશે કે અન્ય કોઇ વિગતો આપવામાં આવી નહોતી. જાપાનના વિદેશ મંત્રાલયે આ બાબતે કોઇ માહિતી આપવાની ના પાડી હતી. તેમણે જણાવ્યું હતું કે આ સલાહ સબંધિત દેશોના રાજદૂતાવાસોને મોકલી આપવામાં આવી છે જ્યાંથી તે જાપાની નાગરિકોને જણાવવામાં આવશે.

from Top Stories News - Gujarat Samachar : World's Leading Gujarati Newspaper https://ift.tt/2XhP4Wp
via IFTTT