આસામમાં પણ નામકરણઃ રાજીવ ગાંધી નેશનલ પાર્ક હવે ઓરાંગ નેશનલ પાર્ક તરીકે ઓળખાશે

- આ પાર્ક રોયલ બેંગાલ ટાઈગર, ઈન્ડિયન રાઈનો, પિગ્મી હોગ અને જંગલી હાથીઓ માટે પ્રખ્યાત

નવી દિલ્હી, તા. 02 સપ્ટેમ્બર, 2021, ગુરૂવાર

આસામની હિમંતા બિસ્વા સરમા સરકારે નેશનલ પાર્ક પરથી પૂર્વ વડાપ્રધાન રાજીવ ગાંધીનું નામ દૂર કરવાનો નિર્ણય લીધો છે. બુધવારની કેબિનેટ મીટિંગમાં આ અંગેનો નિર્ણય લેવામાં આવ્યો હતો અને ત્યાર બાદ હવે તે ઓરાંગ નેશનલ પાર્ક તરીકે ઓળખાશે. 

આસામ સરકારના પ્રવક્તા અને જળ સંસાધન મંત્રી પીજૂષ હજારિકાએ આ નિર્ણયની જાણકારી આપતા જણાવ્યું કે, આદિવાસીઓ અને ચાય જનજાતિ સમુદાયની માગણી ધ્યાનમાં રાખીને સરકારે રાજીવ ગાંધી નેશનલ પાર્કનું નામ બદલીને ઓરાંગ નેશનલ પાર્ક રાખવાનો નિર્ણય લીધો છે. 

79.28 વર્ગ કિમી ક્ષેત્રમાં ફેલાયેલા આ પાર્કને 1985માં વાઈલ્ડલાઈફ સેન્ચ્યુરી અને 1999માં નેશનલ પાર્કનો દરજ્જો આપવામાં આવ્યો હતો. બ્રહ્મપુત્ર નદીના ઉત્તરી કિનારે આવેલો આ પાર્ક રોયલ બેંગાલ ટાઈગર, ઈન્ડિયન રાઈનો, પિગ્મી હોગ અને જંગલી હાથીઓ માટે પ્રખ્યાત છે. 

અન્ય નિર્ણયો

તે સિવાય કેબિનેટે કોવિડ-19 સાથે સંકળાયેલા ખર્ચા માટે 660 કરોડ રૂપિયા મંજૂર કર્યા હતા. પીજૂષ હજારિકાએ જણાવ્યું કે, કેબિનેટે 'પ્રાર્થના યોજના' અંતર્ગત કોરોનાથી જીવ ગુમાવનારા 6,500 કરતા વધારે લોકોના પરિવારજનોને આશરે 1 લાખ રૂપિયા આપવાનો પણ નિર્ણય લીધો છે. આ રકમ 2 ઓક્ટોબરના રોજ સોંપવામાં આવશે. 

આ સાથે જ કેબિનેટે આંતરરાષ્ટ્રીય બોક્સર જમુના બોરો અને આંતરરાષ્ટ્રીય તીરંદાજ ચેમ્પિયન સંજય બોરોને એક્સાઈઝ ઈન્સ્પેક્ટર તરીકે નિયુક્ત કરવાનો નિર્ણય પણ લીધો છે. તેમને આસામના પહેલા અર્જુન એવોર્ડી ભોગેશ્વર બરૂઆના જન્મદિવસના રોજ 3 સપ્ટેમ્બરે એપોઈન્ટમેન્ટ લેટર સોંપવામાં આવશે. 

આસામ કેબિનેટની બેઠક પહેલી વખત કોઈનાધારા ખાતે બનેલા ગેસ્ટ હાઉસમાં યોજાઈ હતી. તે પહેલા પૂર્વ મુખ્યમંત્રી તરૂણ ગોગોઈનું સત્તાવાર નિવાસસ્થાન હતું. 

from Top Stories News - Gujarat Samachar : World's Leading Gujarati Newspaper https://ift.tt/3gWXby9
via IFTTT