ગુજરાતના ત્રણ શહેરોમાં પેટ્રોલ ફરી ૧૦૦ને પાર, ડીઝલે ૯૯ની સપાટી કૂદાવી

નવી દિલ્હી, તા.૧

દેશમાં સતત બીજા દિવસે પેટ્રોલ અને ડીઝલના ભાવમાં વધારો કરવામાં આવતાં અનેક શહેરોમાં પેટ્રોલનો ભાવ સર્વોચ્ચ સપાટીએ પહોંચ્યો હતો જ્યારે મધ્ય પ્રદેશ, રાજસ્થાન, ઓડિશા, આંધ્ર પ્રદેશમાં ડીઝલનો ભાવ રૂ. ૧૦૦ને પાર થઈ ગયો હતો. ગુજરાતમાં પણ કેટલાક શહેરોમાં પેટ્રોલ રૂ. ૧૦૦ને પાર થઈ ગયું છે જ્યારે ડીઝલે પણ રૂ. ૯૯ની સપાટી વટાવી દીધી છે. સરકારી ઓઈલ કંપનીઓએ શુક્રવારે પેટ્રોલમાં ૨૫ પૈસા અને ડીઝલમાં ૩૦ પૈસાનો વધારો કર્યો હતો.

આ સપ્તાહે ઈંધણના ભાવમાં ત્રીજી વખત વધારો કરવામાં આવતાં પેટ્રોલે દેશના મોટાભાગના શહેરોમાં રૂ. ૧૦૦ની સપાટી વટાવી દીધી છે જ્યારે ડીઝલમાં પણ છેલ્લા આઠ દિવસમાં છઠ્ઠી વખત ભાવ વધારો થતાં મધ્ય પ્રદેશ, રાજસ્થાન, ઓડિશા, આંધ્ર પ્રદેશ અને તેલંગાણાના અનેક શહેરોમાં ડીઝલે રૂ. ૧૦૦ની સપાટી વટાવી છે. 

ગુજરાતમાં પણ ભાવનગર, બોટાદ સહિત કેટલાક શહેરોમાં ફરી એક વખત પેટ્રોલે રૂ. ૧૦૦ની સપાટી વટાવી છે. ડીઝલ પણ રૂ. ૯૯ને પાર થઈ ગયું છે. ગુજરાતમાં સૌથી મોંઘું પેટ્રોલ અને ડીઝલ ભાવનગરમાં વેચાઈ રહ્યું છે, જ્યાં શુક્રવારે પેટ્રોલનો ભાવ ૨૫ પૈસા વધીને પ્રતિ લીટર રૂ. ૧૦૦.૬૦ થયો હતો. ડીઝલનો ભાવ ૩૩ પૈસા વધીને પ્રતિ લીટર રૂ. ૯૯.૦૪ થયો હતો. એ જ રીતે વેરાવળમાં પેટ્રોલ ૨૪ પૈસાના વધારા સાથે પ્રતિ લીટર રૂ. ૧૦૦.૪૦ થયું હતું જ્યારે ૩૩ પૈસા વધતાં ડીઝલનો ભાવ પ્રતિ લીટર રૂ. ૯૮.૮૮ થયો હતો. બોટાદમાં પણ પેટ્રોલનો ભાવ ૨૪ પૈસા વધીને રૂ. ૧૦૦.૦૮ થયો હતો જ્યારે ડીઝલનો ભાવ ૩૪ પૈસાના વધારા સાથે પ્રતિ લીટર ૯૮.૫૪ થયો હતો. જોકે, ગુજરાતના ચાર મહાનગરોમાં પેટ્રોલ અને ડીઝલનો ભાવ રૂ. ૧૦૦થી નીચે રહ્યો છે. 

દેશની રાજધાની દિલ્હીમાં પેટ્રોલ રૂ. ૧૦૧.૮૯ અને મુંબઈમાં રૂ. ૧૦૭.૯૫ની સર્વોચ્ચ સપાટીએ પહોંચ્યો હતો ડીઝલ પણ દિલ્હીમાં રૂ. ૯૦.૧૭ અને મુંબઈમાં ૯૭.૮૪ની વિક્રમી સપાટીએ પહોંચ્યા હતા. દેશમાં સૌથી મોંઘું પેટ્રોલ રાજસ્થાનના શ્રીગંગાનગરમાં મળે છે, જ્યાં પેટ્રોલનો ભાવ પ્રતિ લીટર રૂ. ૧૧૩.૭૩ થયો હતો અને ડીઝલ પ્રતિ લીટર રૂ. ૧૦૩.૯ થયો હતો. 

આંતરરાષ્ટ્રીય ક્રૂડ ઓઈલનો ભાવ ત્રણ વર્ષની ટોચ નજીક પહોંચતા સરકારી માલિકીની ઓઈલ કંપનીઓએ ૨૪મી સપ્ટેમ્બરે પેટ્રોલ-ડીઝલના ભાવની દૈનિક સમિક્ષા શરૂ કરી હતી અને આ સપ્તાહમાં ત્રીજી વખત ભાવ વધાર્યા હતા. પરિણામે પેટ્રોલમાં પ્રતિ લીટર ૭૫ પૈસાનો વધારો થયો છે. સરકારી ઓઈલ કંપનીઓએ ૨૪મી સપ્ટેમ્બરથી અત્યાર સુધીમાં ડીઝલમાં છ વખત ભાવ વધારતાં પ્રતિ લીટર રૂ. ૧.૫૫નો ભાવ વધારો થયો છે.

વૈશ્વિક સ્તરે પુરવઠો ખોરવાઈ જતાં આંતરરાષ્ટ્રીય સ્તરે ક્રૂડનો ભાવ ત્રણ વર્ષની ટોચ નજીક પહોંચતા પેટ્રોલ અને ડીઝલમાં વધારો થયો છે. અગાઉ જુલાઈ અને ઓગસ્ટમાં આંતરરાષ્ટ્રીય સ્તરે ક્રૂડના ભાવ ઘટતાં પેટ્રોલ અને ડીઝલના રીટેલ ભાવમાં અનુક્રમે પ્રતિ લીટર ૬૫ પૈસા અને રૂ. ૧.૨૫નો ઘટાડો થયો હતો. તે પહેલાં ૪ મેથી ૧૭ જુલાઈ વચ્ચે પેટ્રોલનો ભાવ પ્રતિ લીટર રૂ. ૧૧.૪૪ અને ડીઝલ રૂ. ૯.૧૪ મોંઘા થયા હતા.

ગુજરાતમાં ચાર મેટ્રોના ભાવ

અમદાવાદમાં પેટ્રોલનો ભાવ પ્રતિ લીટર રૂ. ૯૮.૭૦ અને ડીઝલનો ભાવ પ્રતિ લીટર રૂ. ૯૭.૧૫ થયો છે. વડોદરામાં પેટ્રોલ રૂ. ૯૮.૨૪ અને ડીઝલ રૂ. ૯૬.૬૯ થયા હતા. સુરતમાં પેટ્રોલનો ભાવ રૂ. ૯૮.૫૫ અને ડીઝલનો ભાવ રૂ. ૯૭.૦૩ થયો છે. રાજકોટમાં પેટ્રોલનો ભાવ પ્રતિ લીટર રૂ. ૯૮.૪૧ અને ડીઝલનો ભાવ રૂ. ૯૬.૮૮ થયો હતો.

from Top Stories News - Gujarat Samachar : World's Leading Gujarati Newspaper https://ift.tt/3kYwUBW
via IFTTT