ટીમ ઇન્ડિયાનો ફ્લોપ શો : વર્લ્ડ કપના ઈતિહાસમાં પ્રથમ વખત પાક. સામે હાર

152 રનનો ટાર્ગેટ પાકિસ્તાને વિના વિકેટે પાર પાડતા ચાહકો વધુ હતાશ થયા

ભારત તરફથી કોહલીના 57 રન : પ્લેયર ઓફ ધ મેચ શાહીન આફ્રીદીની 3 કિંમતી વિકેટ : રિઝવાન 79* અને આઝમ 68*

દુબઇ : પાકિસ્તાને આજે ટી-20 વર્લ્ડ કપની મેચમાં ભારતને ભારે શરમજનક રીતે 10 વિકેટથી પરાજય આપીને વર્લ્ડ કપમાં તેઓ એક પણ મેચ જીત્યા નથી તે કલંક મીટાવ્યું હતું. 

ભારતે તેઓની 20 ઓવરમાં 7 વિકેટે 151 રન કર્યા હતા. ટી-20 વર્લ્ડ કપનાં ઈતિહાસમાં આ અગાઉના પાંચેય મુકાબલા ભારત જીત્યું છે. તેવી જ રીતે વન ડે વર્લ્ડ કપમાં પણ ભારત સામે પાકિસ્તાન જીત્યું નથી. આમ ભારતની આ વર્લ્ડ કપમાં પાકિસ્તાન સામેની સૌ પ્રથમ હાર છે.

ભારતના આઈપીએલના કરોડપતિ ક્રિકેટ સ્ટાર્સનો ફ્લોપ શો જોઇને ક્રિકેટ ચાહકો ભારે હતાશા સાથે રોષ ઠાલવતા હતા. મેચ અગાઉ ભારત જીતવા માટે ફેવરિટ મનાતું હતું. શાહીન આફ્રીદીને રોહિત શર્મા, રાહુલ અને કોહલીની ત્રણ વિકેટ ઝડપવા બદલ પ્લેયર ઓફ ધ મેચ જાહેર કરાયો હતો.

ભારત હાર્યું તે ચાહકોએ સ્વીકારી લીધું હોત પણ જે રીતે વિશેષ કરીને 10 વિકેટથી એટલે કે એકપણ વિકેટ જ ના પાડી શકતા હાર્યું તેનાથી વધુ રોષ જોઇ શકાતો હતો. ભારત તેના ટી-20 ઈતિહાસની પ્રથમ મેચ આ રીતે 10 વિકેટથી હાર્યું છે. પાકિસ્તાન તરફથી ઓપનર રિઝવાને અણનમ 79 અને કેપ્ટન બાબર આઝમે 68 અણનમ રન  કર્યા હતા.  શમીએ 3.5 ઓવરોમાં 43 રન આપ્યા હતા.

પાકિસ્તાને ટોસ જીતીને ફિલ્ડિંગ લીધી હતી. આ જ ગ્રાઉન્ડ પર પ્રથમ બેટિંગ કરતા ગઈકાલે વેસ્ટ ઈંડિઝ 55 રનમાં ખખડયું હોઈ પાકિસ્તાનના કેપ્ટન બાબર આઝમની એવી ધારણા હોઈ શકે કે પ્રથમ બેટિંગ કરનાર ટીમ માટે બેટિંગ મુશ્કેલ બનશે.

શાહીન આફ્રીદીની ઈનિંગની 19મી અને તેની આખરી ઓવરમાં ભલે 17 રન તેણે આપ્યા આમ છતાં ભારત પ્રભુત્વભર્યા સ્કોરથી વંચિત રહ્યું તેમાં તેની ઈનિંગની પ્રથમ અને ત્રીજી ઓવરમાં જ તેણે ભારતના બે ધરખમ બેટ્સમેનો રોહિત શર્મા (0) અને કે.એલ. રાહુલ (3)ની વિકેટ ઝડપી હતી. 

રોહિત શર્મા તેણે રમેલ પ્રથમ બોલે જ લેગ બીફોર થયો હતો. આઈપીએલના સ્ટાર સૂર્યકુમાર યાદવને પણ પીચમાં ફાવટ નહોતી જણાઈ અને તે પણ 11 રને આઉટ થતાં ભારતે 31 રનમાં જ 3 વિકેટ 5.4 ઓવરમાં ગુમાવતા એમ નક્કી થઈ ગયું હતું કે ભારતના ખેલાડીઓ આઈપીએલના ફોર્મને અનુરૂપ જે ધારદાર ઈમેજ હતી તેટલો મોટો સ્કોર નહીં કરી શકે.

કોહલી 49 બોલમાં પાંચ ચોગ્ગા અને 1 છગ્ગા સાથે 57 રન તેમજ પંતે 30 બોલમાં બે ચોગ્ગા અને બે છગ્ગા સાથે 39 રન જ કર્યા હોત તો ભારતનો સ્કોર 120 રન પણ માંડ થાય તેવી હાલત હતી. બંનેએ ચોથી વિકેટની 53 રનની ભાગીદારી નોંધાવી હતી.

આફ્રીદીની આખરી અને ઇનિંગની 19મી ઓવરમાં ઓવર થ્રો સહિત પાંચ રન, નો બોલ મળીને 17 રન ભારતને કંઈક સન્માનજનક સ્કોરે પહોંચાડી શક્યું હતું. આફ્રીદીએ જોકે તે ખર્ચાળ ઓવરમાં પણ કોહલીની કિંમતી વિકેટ ઝડપી હતી.

પાકિસ્તાનના બોલરો નિયમિત અંતરે વિકેટ મેળવતા હતા. ભયજનક બનેલી પંતની વિકેટ સૌથી કિંમતી હતી. હસન અલી 4 ઓવરમાં 44 રન આપી ખર્ચાળ પૂરવાર થયો હતો. જોકે તેણે બે વિકેટ ઝડપી હતી. સ્પિનર શદાબ ખાને 4 ઓવરમાં 22 રન જ આપીને 1 વિકેટ તેમજ રઉફે 4 ઓવરોમાં 25 રન આપ્યા હતા.

આખરી પાંચ ઓવરમાં ભારતે 54 રન લીધા હતા. ભારતના 100 રન 15 ઓવરમાં 4 વિકેટ નોંધાયા હતા. પાકિસ્તાનના ઓપનર વિકેટકિપર બેટ્સમેન રિઝવાન અને કેપ્ટન બાબર આઝમે પોઝિટિવ અને 152નો પડકાર તેઓના ધાર્યા કરતા ઘણો ઓછો છે તેમ માની સંગીન પાયો નાંખ્યો હતો.

from Top Stories News - Gujarat Samachar : World's Leading Gujarati Newspaper https://ift.tt/3jzs9NX
via IFTTT