ચીને ગલવાનના ઘાયલ સૈનિકને ઓલિમ્પિક માર્ચ થમાવતા ભારતે સમારોહનો બહિષ્કાર કર્યો

ચીને ગલવાન ઘાટીના સંઘર્ષને શરમજનક રાજકીય સ્વરૃપ આપ્યું છે. ગલવાન ઘાટીમાં ઘાયલ થયેલા સૈનિકને ઓલિમ્પિક માર્ચ થમાવીને ચીને વિવાદ સર્જ્યો છે. એ પછી હવે ભારતે વળતો જવાબ આપીને ચીનના ઓલિમ્પિકનો બહિષ્કાર કરવાની જાહેરાત કરી છે. ચીનમાં યોજાનારા ઓલિમ્પિકની ઓપનિંગ અને ક્લોઝિંગ સેરેમનીમાં ભારતીય દૂતાવાસના અધિકારીઓ હાજર રહેશે નહીં. અમેરિકાએ પણ ચીનની આ અવળચંડાઈને વખોડી કાઢીને ટીકા કરી હતી.
ગલવાન ઘાટીમાં જૂન-૨૦૨૦માં ભારત-ચીનના સૈનિકો વચ્ચે હિંસક અથડામણ થઈ હતી. એમાં ચીનના પાંચ સૈનિકો માર્યા ગયા હોવાનું ચીને સ્વીકાર્યું હતું, પરંતુ ભારતીય સૈન્યએ આંકડો ઘણો મોટો હોવાનું અનુમાન રજૂ કર્યું હતું. ભારતીય સૈન્યના એ દાવાને હવે સમર્થમ મળ્યું છે. ઓસ્ટ્રેલિયન અખબારના અહેવાલમાં દાવો કરાયો હતો કે ગલવાન ઘાટીના સંઘર્ષમાં ચીનના ચાર-પાંચ નહીં, પરંતુ ૩૮ સૈનિકો માર્યા ગયા હતા.  આ આંકડો ૪૫ સુધીનો હોવાની પણ શક્યતા છે. ઓસ્ટ્રેલિયન અખબાર ધ ક્લેક્સનના અહેવાલમાં દાવો થયો હતો કે ચીનના ૩૮ સૈનિકો ધસમસતા પાણીમાં તણાઈને ડૂબી ગયા હતા.
હવે આ ગલવાન ઘાટીના સંઘર્ષને ચીને રાજકીય સ્વરૃપ આપ્યું છે. ચીને ગલવાન ઘાટીમાં ઘાયલ થયેલા સૈનિકના હાથમાં ઓલિમ્પિકની મશાલ થમાવી દેતા વિવાદ સર્જાયો છે. એ પછી ભારતે પણ વળતો જવાબ આપીને ચીનના ઓલિમ્પિકની ઓપનિંગ અને ક્લોઝિંગ સેરેમનીના બહિષ્કારની જાહેરાત કરી હતી. વિદેશ મંત્રાલયે એક નિવેદનમાં કહ્યું હતું કે ચીને ગલવાન ઘાટીમાં ઘાયલ થયેલા સૈનિકને ઓલિમ્પિકની માર્ચ આપી છે તે અહેવાલો ધ્યાનમાં આવ્યા છે. આ ગંભીર અને શરમજનક બાબત છે. ચીનનું આ પગલું બિલકુલ અયોગ્ય છે. ઓલિમ્પિક જેવી ઈવેન્ટમાં પણ ચીને રાજકારણ કર્યું તે આઘાતજનક છે. પ્રસારભારતીના સીઈઓએ જાહેરાત કરી હતી કે ડીડી સ્પોર્ટ્સમાં ચીનના વિન્ટર ઓલિમ્પિકની ઓપનિંગ અને ક્લોઝિંગ સેરેમનીનું લાઈવ પ્રસારણ થશે નહીં.
અમેરિકાએ પણ ચીનની આ અવળચંડાઈની ઝાટકણી કાઢી હતી. અમેરિકાના વિદેશી બાબતોની સમિતિના સભ્ય જિમ રિશે જણાવ્યું હતું કે ચીનનું આ પગલું રાજકારણથી પ્રેરિત છે. ઓલિમ્પિક જેવી ગેઈમ્સમાં આવું કરવું શરમજનક અને અયોગ્ય છે. ભારતીય જવાનો ઉપર હુમલો કરનારા સૈનિકને ઓલિમ્પિકની મશાલ થમાવવી ન જોઈએ. ચીન ઉઈઘુરોનો નરસંહાર કરે છે તે જગજાહેર છે. અમેરિકા તેનો વિરોધ નોંધાવે છે. અમેરિકા આ ઘટનાનો પણ વિરોધ કરે છે. અમેરિકા ભારતની સંપ્રભુતાનું સમર્થન કરવા કટિબદ્ધ છે.

from Top Stories News - Gujarat Samachar : World's Leading Gujarati Newspaper https://ift.tt/dCY197Tug
via IFTTT