કોમર્શિયલ એલપીજીમાં 250નો તોતિંગ વધારો : પેટ્રોલ ડીઝલ વધુ 80 પૈસા મોંઘા

19 કિલોના કોમર્શિયલ સિલિન્ડરનો ભાવ વધીને રૂ. 2253

ખેડૂતોના માથે બોજો વધ્યો: એનપીકે ખાતરનો ભાવ રૂ. 285 વધી 1,470 અને ડીએપીનો ભાવ રૂ. 150 વધી 1,350 થયો

વિમાન ઇંધણ (એટીએફ)ના ભાવમાં બે ટકાની વૃદ્ધિ : દિલ્હીમાં એક કિલો લિટર એટીએફનો ભાવ રૂ. 2258 વધીને 1,12,924 થયો

અમદાવાદમાં પેટ્રોલનો ભાવ વધીને રૂ. 102.24, ડીઝલ રૂ. 96.50

નવી દિલ્હી : કોમર્શિયલ એલપીજી સિલિન્ડરમાં રૂ. 250નો વધારો કરવામાં આવ્યો છે.પેટ્રોલ અને ડીઝલમાં બેનેમાં એક દિવસના વિરામ બાદ ફરી 80 પૈસાનો વધારો કરવામાં આવ્યો છે. આજના ભાવવધારાને પગલે અમદાવાદમાં એક લિટર પેટ્રોલનો ભાવ વધીને 102.24 રૂપિયા અને એક લિટર ડીઝલનો ભાવ વધીને 96.50 રૂપિયા થઇ ગયો છે.

દિલ્હીમાં એક લિટર પેટ્રોલનો ભાવ વધીને 102.61 રૂપિયા અને એક લિટર ડીઝલનો ભાવ વધીને 93.87 રૂપિયા થઇ ગયો છે. રશિયા-યુક્રેન યુદ્ધની અસર હવે ભારત પર પણ વર્તાવવા લાગી છે. પેટ્રોલ-ડીઝલ અને ગેસના ભાવમાં વધારો થયા પછી હવે ખાતરના ભાવમાં પણ વધારો થયો છે. ડીએપી ખાતરનો નવો ભાવ 150 રૂપિયા વધી 1,350 થયો છે અને એનપીકેનો નવો ભાવ 285 વધીને 1,470 રૂપિયા થયો છે.

આના પગલે ખેડૂતોએ હવે 50 કિલોગ્રામના ખાતર પેટે વધુ રકમ ચૂકવવાની આવશે. બીજી બાજુ આંતરરાષ્ટ્રીય બજારમાં ક્રૂડ ઓઇલના ભાવ વધવાની સાથે વિમાન ઇંધણ(એટીએફ)ના ભાવમાં આજે બે ટકાનો વધારો કરવામાં આવ્યો હતો. જેના કારણે સમગ્ર દેશમાં એટીએફના ભાવ વિક્રમજનક સપાટીએ પહોંચી ગયા છે. ચાલુ વર્ષે સાતમી વખત એટીએફના ભાવ વધારવામાં આવ્યા છે. 

દિલ્હીમાં એક કિલો સીએનજીમાં 80 પૈસાનો વધારો કરવામાં આવ્યો છે. એક મહિનામાં સીએનજીના ભાવમાં ચાર રૂપિયાનો વધારો થયો છે.  સરકારી ઓઇલ માર્કેટિંગ કંપનીઓ દ્વારા જારી કરાયેલા નોટિફિકેશન અનુસાર દિલ્હીમા એક કીલોલિટર એટીએફનો ભાવ 2258.54 રૂપિયા વધીને 1,12,924.83 રૂપિયા થઇ ગયો છે. એટલે કે એક લિટરનો ભાવ વધીને 112.92 રૂપિયા થઇ ગયો છે. 

આ દરમિયાન હોટલ અને રેસ્ટોરન્ટ દ્વારા ઉપયોગમાં લેવાતા કોમર્શિયલ એલપીજી સિલિન્ડરના ભાવમાં 249.50 રૂપિયાનો વધારો કરવામાં આવ્યો છે. આ સાથે 19 કિલોના કોમર્શિયલ સિલિન્ડરનો ભાવ વધીને 2253 રૂપિયા થઇ ગયો છે. 

જો કે ઘરના રસોડામાં ઉપયોગમાં લેવાતા એલપીજી સિલિન્ડરના ભાવમાં વૃદ્ધિ કરવામાં આવી નથી. આ સિલિન્ડરના ભાવમાં 22 માર્ચે 50 રૂપિયાનો વધારો કરવામાં આવ્યો હતો જેના કારણે 14.2 કિગ્રાના સિલિન્ડરનો ભાવ વધીને 949.50 રૂપિયા થઇ ગયો છે. 

આ અગાઉ 16 માર્ચના રોજ એટીએફના ભાવમાં 18.3 ટકા એટલે કે 17,135.63 રૂપિયાનો વધારો કરવામાં આવ્યો હતો. એક જાન્યુઆરીથી અત્યાર સુધી સાત વખત એટીએફના ભાવ વધારવામાં આવ્યા છે. જેમાં કુલ 38,902રૂપિયાનો વધારો કરવામાં આવ્યો છે. આ દરમિયાન કેન્દ્ર સરકાર દ્વારા કુદરતી ગેસના ભાવ વધારવામા આવતા દિલ્હીમાં એક કીલો સીએનજીના ભાવમાં 80 પૈસાનો વધારો કરવામાં આવ્યો છે.

from Top Stories News - Gujarat Samachar : World's Leading Gujarati Newspaper https://ift.tt/k1n7P3r
via IFTTT