સરકારની બેદરકારી : આઈટીની વેબસાઈટમાં અઢી મહિનાથી ધાંધિયા

અનેક વખત રિમાઇન્ડર છતાં ખામીઓ યથાવત્, વેબસાઇટ છેલ્લા બે દિવસથી ઠપ : લોકોને ભારે હાલાકી 

ઇન્ફોસીસના સીઈઓને સમન્સ : સરકારે નવી વેબસાઇટના કરાર પેટે કંપનીને જૂન, ૨૦૨૧ સુધીમાં  રૂ. ૧૬૪.૫ કરોડ ચૂકવ્યા છે

કરદાતાઓની મુશ્કેલીઓ દૂર કરવા ઇન્ફોસીસ પર સિતારામનનું સતત દબાણ છતાં સ્થિતિ જૈસે થે 

વેબસાઈટ રાબેતા મુજબ ચાલુ થઈ ગયાનો ઇન્ફોસીસનો દાવો

(પીટીઆઇ) નવી દિલ્હી, તા. ૨૨

સળંગ બે દિવસ આવકવેરા વિભાગની વેબસાઇટ ઠપ રહેતા નાણા મંત્રાલયે ઇન્ફોસિસના એમડી અને સીઇઓ સલીલ પારેખને સોમવારે નાણા પ્રધાન નિર્મલા સિતારમનને મળવા બોલાવવા માટે સમન્સ પાઠવ્યા છે. વેબસાઇટ લોન્ચ થયાને બે મહિના થઇ ગયા હોવા છતાં વપરાશકારોને અનેક સમસ્યાઓનો સામનો કરવો પડતો હોવાથી આ સમન્સ પાઠવવામાં આવ્યા છે. આ મુલાકાત દરમિયાન પારેખને નાણા પ્રધાનને આ સમસ્યા અંગેના કારણો રજૂ કરવા પડશે. 

ઉલ્લેખનીય છે કે આવકવેરા વિભાગે સાત જૂને નવી વેબસાઇટ લોન્ચ કરી હતી. આ વેબસાઇટની રચના ઇન્ફોસિસે કરી છે. લોન્ચ થયાના પ્રથમ દિવસથી જ આ વેબસાઇટમાં લોકોને અનેક મુશ્કેલીઓનો સામનો કરવો પડી રહ્યો છે. 

વેબસાઇટ ઠપ થઇ જવાના કારણે આવકવેરા વિભાગને કેટલાક રેમિટન્સ ફોર્મ મેન્યુઅલી ભરવાની પરવાનગી આપવાની ફરજ પડી છે. આ ઉપરાંત પેન્શન ફંડ અને સોવેરિયન વેલ્થ ફંડ માટે પણ કેટલીક તારીખોમાં વધારો કરવામાં આવ્યો છે. 

આવકવેરા વિભાગે ટ્વિટર પર જણાવ્યું છે કે નાણા મંત્રાલયે સોમવારે ઇન્ફોસિસના એમડી અને સીઇઓ સલીલ પારેખને સમન્સ પાઠવ્યા છે. વેબસાઇન્ટ લોન્ચ થયાને ૨.૫ મહિના થઇ ગયા હોવા છતાં અનેક સમસ્યાઓ ચાલુ રહેવા પાછળના કારણ જાણવા માટે આ સમન્સ પાઠવવામાં આવ્યા છે. ઉલ્લેખનીય છે કે ૨૧ ઓગસ્ટથી આવકવેરા વિભાગની વેબસાઇટ સંપૂર્ણ ઠપ થઇ ગઇ છે. 

વેબસાઇટ લોન્ચ થવાની સાથે જ અનેક સમસ્યાઓ શરૃ થઇ જતાં નાણા પ્રધાને ૨૨ જૂનના રોજ ઇન્ફોસિસના ઉચ્ચ અધિકારીઓની બેઠક બોલાવી વહેલી તકે સમસ્યાઓ દૂર કરવા જણાવ્યું હતું. 

ઉલ્લેખનીય છે કે ૨૦૧૯માં ઇન્ફોસિસને આવકવેરા વિભાગની નવી વેબસાઇટ લોન્ચ કરવાનો કોન્ટ્રાક્ટ આપવામાં આવ્યો હતો. રિફંડની પ્રક્રિયા ૬૩ દિવસને બદલે એક દિવસમાં પૂર્ણ થાય તે હેતુથી આ નવી વેબસાઇટ રચવાનો નિર્ણય લેવામાં આવ્યો હતો. આ વેબસાઇટની રચના માટે જૂન, ૨૦૨૧ સુધીમાં સરકારે ઇન્ફોસિસને ૧૬૪.૫ કરોડ રૃપિયાની ચુકવણી કરી છે. 

જીએસટી માટેની વેબસાઇટની રચના પણ ઇન્ફોસિસ દ્વારા કરવામાં આવી છે અને તેમાં પણ શરૃઆતના દિવસોમાં વેપારીઓને અનેક સમસ્યાઓનો સામનો કરવો પડયો  હતો.

from Top Stories News - Gujarat Samachar : World's Leading Gujarati Newspaper https://ift.tt/3j7Mjif
via IFTTT