કાબુલ એરપોર્ટ પર તાલિબાનોના ગોળીબારમાં સાત અફઘાનોનાં મોત

કાબુલ, તા.૨૨

તાલિબાનોના શાસનના ડરથી વિદેશીઓની સાથે અફઘાન નાગરિકો પણ જીવ બચાવવા માટે દેશ છોડી રહ્યા છે. આવી પરિસ્થિતિમાં રવિવારે કાબુલ એરપોર્ટમાં પ્રવેશવાની મથામણ વખતે તાલિબાનોએ કરેલા ગોળીબારમાં સાત લોકોના મોત થયા હતા. બે દાયકા પછી ફરી અફઘાનિસ્તાન પર શાસન કરવાનું સપનું જોઈ રહેલા તાલિબાનો આ વખતે પોતાને વધુ મોડરેટ ગણાવી રહ્યા છે, પરંતુ તેમનો અસલી ચહેરો હવે સામે આવી રહ્યો છે. બીજીબાજુ તાલિબાનોએ પોતાનું શાસન સ્થાપવાના ચક્રો ગતિમાન કરી દીધા છે.

બ્રિટિશ સંરક્ષણ મંત્રાલયે રવિવારે એક નિવેદનમાં જણાવ્યું હતું કે અમેરિકા, બ્રિટન, ભારત સહિતના દેશો પોતાના નાગરિકો તેમજ અફઘાન નિરાશ્રીતોને અફઘાનિસ્તાનમાંથી બહાર કાઢવાનું અભિયાન ચલાવી રહ્યા હોવાથી હજારોની સંખ્યામાં અફઘાન નાગરિકો કાબુલ એરપોર્ટ તરફ ધસી રહ્યા છે. કાબુલ આંતરરાષ્ટ્રીય એરપોર્ટ પાસે ભીડ જમા થતાં તાલિબાનોએ ગોળીબાર કરતાં લોકોમાં ભાગદોડ મચી ગઈ હતી. આ ભાગદોડ દરમિયાન સાત લોકોનાં મોત નીપજ્યાં હતાં અને અનેક લોકો ઘાયલ થયા હતા. 

બ્રિટિશ સૈન્યે કહ્યું કે, આ લોકોના મોત તાલિબાનોના ગોળીબારથી થયા છે કે ભાગદોડથી તે સ્પષ્ટ થઈ શક્યું નથી. અફઘાનિસ્તાનમાં સ્થિતિ ખૂબ જ પડકારજનક છે, પરંતુ અમે શક્ય સલામત રીતે લોકોને અફઘાનિસ્તાનમાંથી બહાર કાઢવાનો પ્રયાસ કરી રહ્યા છે. 

નાટોના રાજદ્વારીએ જણાવ્યું હતું કે છેલ્લા એક સપ્તાહમાં તાલિબાનોના ભયથી અફઘાનિસ્તાન છોડવા માટે કાબુલ એરપોર્ટની આજુબાજુમાં અંદાજે ૨૦ લોકોનાં મોત નીપજ્યાં છે. બીજીબાજુ તાલિબાનોએ અફઘાનિસ્તાનમાં તેમના શાસન માટેની કવાયત શરૃ કરી દીધી છે. તાલિબાન કમાન્ડરોએ અફઘાનિસ્તાનના ૩૪માંથી ૨૦ પ્રાંતોમાં ભૂતપૂર્વ ગવર્નરો અને અધિકારીઓ સાથે આગામી દિવસોમાં બેઠકોનું આયોજન કર્યું છે.

તાલિબાનના એક કમાન્ડરે નામ જાહેર નહીં કરવાની શરતે જણાવ્યું હતું કે, અમે અગાઉની સરકારના અધિકારીઓને અમારી સાથે જોડાવા અથવા અમારા પ્રત્યે તેમની નિષ્ઠા સાબિત કરવા માટે કોઈ દબાણ કરી રહ્યા નથી. અમારી સાથે સરકારમાં જોડાવું કે નહીં તેનો નિર્ણય તેમણે કરવાનો છે. તેઓ દેશ છોડવા માગતા હોય તો તેમ પણ કરી શકે છે. અમે માત્ર વિદેશી દળોની અફઘાનિસ્તાનમાંથી વિદાયની યોજના અંગે સંપૂર્ણ સ્પષ્ટતા ઈચ્છીએ છીએ.

જોકે, કાબુલ એરપોર્ટ બહારના દૃશ્યો કંઈક અલગ જ વાત કહે છે. તાલિબાનોના ભયથી હજારો અફઘાન નાગરિકો દેશ છોડવાનો પ્રયાસ કરી રહ્યા છે ત્યારે તાલિબાન લડાકાઓ તેમને અટકાવી રહ્યા છે. અફઘાનિસ્તાનમાંથી બહાર નીકળનારા સેંકડો લોકો તાલિબાનોની ક્રૂરતાની કંઈક અલગ જ વાતો કરી રહ્યા છે.

બે દાયકા અગાઉ તાલિબાનોનું ક્રૂર શાસન જોઈ ચૂકેલા અફઘાન નાગરિકો ખાસ કરીને મહિલાઓમાં તાલિબાનોનો ભય યથાવત્ છે. તેમજ છેલ્લા બે દાયકામાં તાલિબાનો સામે અમેરિકન અને નાટો દળોને મદદ કરનારા લોકોને પણ તાલિબાનો તેમની સામે બદલો લેશે તેવો ભય સતાવી રહ્યો છે. પરિણામે તાલિબાનોએ ગયા રવિવારે કાબૂલ કબજે કર્યા પછી એક સપ્તાહથી દેશ છોડવા માટે કાબુલ એરપોર્ટ પર લોકોની ભારે ભીડ જમા થઈ રહી છે અને ત્યાં અરાજક્તાની સ્થિતિ સર્જાઈ છે.

from Top Stories News - Gujarat Samachar : World's Leading Gujarati Newspaper https://ift.tt/3kwyOsb
via IFTTT