અફઘાનિસ્તાનઃ કંધાર-ગજની-હેરાત પણ હવે તાલિબાનના કબજામાં, અફઘાની સૈનિકોએ સરેન્ડર કરીને બચાવ્યો જીવ

- તાલિબાન ફરી એક વખત 20 વર્ષ જૂની સ્થિતિમાં આવી ગયું છે જ્યારે દેશના સૌથી મહત્વના વિસ્તારો પર ફક્ત તેનું જ વર્ચસ્વ હતું

નવી દિલ્હી, તા. 13 ઓગષ્ટ, 2021, શુક્રવાર

અફઘાનિસ્તાનમાં દરેક નવા દિવસ સાથે તાલિબાનનું વર્ચસ્વ વધતું જઈ રહ્યું છે. છેલ્લા એક સપ્તાહમાં તાલિબાને ખૂબ જ ઝડપથી અફઘાનિસ્તાનના અનેક શહેરો પર કબજો જમાવી લીધો છે અને હવે તે રાજધાની કાબુલની ખૂબ જ નજીક છે. અફઘાનિસ્તાનના મોટા શહેરોમાં સામેલ કંધાર, ગજની અને હેરાત પર પણ તાલિબાની ફાઈટર્સે કબજો જમાવી લીધો છે જેની વિશ્વએ નોંધ લીધી છે. 

અફઘાનિસ્તાનમાંથી અમેરિકી સેના પાછી ફરવાની પ્રક્રિયા શરૂ થઈ ત્યારથી તાલિબાનનો કબજો વધી રહ્યો છે. અફઘાનિસ્તાનના કુલ 34 પ્રાંત પૈકીના 12 કરતા વધારે પ્રાંત પર હવે સંપૂર્ણપણે તાલિબાનનો કબજો છે. કંધાર અફઘાનિસ્તાનનું બીજું સૌથી મોટું શહેર છે અને તાલિબાને તેના પર કબજો જમાવી લીધો તે ખૂબ જ ખતરનાક બાબત છે. 

જાણવા મળ્યા મુજબ ગુરૂવારે મોડી રાતે તાલિબાનીઓએ કંધાર પર હુમલો કર્યો હતો. સરકારી કર્મચારીઓ અને અન્ય લોકો મોડી રાતે જ શહેર છોડીને ભાગી ગયા હતા. 

કંધાર બાદ અફઘાનિસ્તાનનું ત્રીજું મોટું શહેર હેરાત પણ તાલિબાની આતંકવાદીઓના કબજામાં આવી ગયું છે. હેરાતમાં તાલિબાની ફાઈટર્સે ત્યાંની ઐતિહાસિક મસ્જિદ પર કબજો જમાવ્યો, આ વિસ્તાર એલેકઝાન્ડર ધ ગ્રેટ સાથે સંબંધ ધરાવે છે. જોકે હવે ત્યાંની તમામ સરકારી ઈમારતો પર તાલિબાનનો કબજો છે. 

ગજની વિસ્તારની વાત કરીએ તો તે પણ હવે તાલિબાનના કબજામાં છે. ગજની પર તાલિબાનના કબજાનો અર્થ હવે તેઓ સીધા કાબુલના સંપર્કમાં છે. યાનીથી હાઈવે સીધો રાજધાનીને લિંક કરે છે. આ સાથે જ તાલિબાન ફરી એક વખત 20 વર્ષ જૂની સ્થિતિમાં આવી ગયું છે જ્યારે દેશના સૌથી મહત્વના વિસ્તારો પર ફક્ત તેનું જ વર્ચસ્વ હતું. 

એજન્સીના અહેવાલ પ્રમાણે હેરાત અને ગજનીના અમુક વિસ્તારોમાં અફઘાની સૈનિકો અને કેટલાક સરકારી કર્મચારીઓએ તાલિબાની ફાઈટર્સ સામે સરેન્ડર કરી દીધું હતું અને ત્યાર બાદ ત્યાંથી ભાગી ગયા હતા. તાલિબાનીઓ દ્વારા એક વીડિયો પણ જાહેર કરવામાં આવ્યો છે જેમાં સૈનિકોએ તેમના સામે સરેન્ડર કર્યું અને પછી તેમની મંજૂરી લઈને ત્યાંથી સુરક્ષિત જતા રહ્યા. 

from Top Stories News - Gujarat Samachar : World's Leading Gujarati Newspaper https://ift.tt/2VPbqNW
via IFTTT