રાજ્યસભામાં સાંસદો-માર્શલોની ધક્કા મુક્કીનો વીડિયો વાઈરલ થતાં હોબાળો

નવી દિલ્હી, તા.૧૨

સંસદનું આખું ચોમાસુ સત્ર આ વખતે સરકાર અને વિપક્ષ વચ્ચે ભારે હોબાળાને ભેટ ચઢી ગયું. ત્રણ સપ્તાહમાં એક પણ દિવસ સત્રની કાર્યવાહી યોગ્યરૃપે ચાલી શકી નહોતી. પેગાસસ જાસૂસી વિવાદ, કૃષિ કાયદા, બેરોજગારી અને મોંઘવારી મુદ્દે વિપક્ષે સતત સંસદના બંને ગૃહમાં ભારે હોબાળો કરતાં વારંવાર કાર્યવાહી ખોરવવી પડી હતી. જોકે, બુધવારનો દિવસ સંસદીય ઈતિહાસમાં સૌથી શરમજનક રહ્યો. રાજ્યસભાનો એક સીસીટીવી વીડિયો ગુરુવારે વાઈરલ થયો છે, જેમાં વિપક્ષના સાંસદો અને માર્શલો વચ્ચે ભારે ધક્કા-મૂક્કી થઈ રહી છે. આ હોબાળાના કારણે ચોમાસુ સત્ર નિશ્ચિત સમયના બે દિવસ પહેલાં બુધવારે સમાપ્ત કરી દેવાયું હતું.

રાજ્યસભામાં સાંસદો અને માર્શલો વચ્ચે ધક્કામૂક્કીનો વીડિયો વાયરલ થતાં વિપક્ષે માર્શલો પર મારામારીનો આક્ષેપ મૂક્યો હતો. બીજીબાજુ માર્શલોએ પણ વિરોધ પક્ષના સાંસદોએ તેમની સાથે બળજબરી કરવી હોવા અંગે લેખિતમાં ફરિયાદ કરી હતી. સરકારે પણ ધક્કા-મૂક્કી માટે વિપક્ષને જવાબદાર ઠેરવ્યો હતો. ચોમાસુ સત્ર વહેલાં પૂરું કરવા અને સાંસદો સાથે માર્શલો દ્વારા ગેરરીતિ આચરવાના વિરોધમાં ગુરુવારે વિપક્ષ દ્વારા દેખાવો કરવામાં આવ્યા હતા. 

કોંગ્રેસ સહિત વિરોધ પક્ષના ૧૧ નેતાઓ ગુરુવારે સંસદ બહાર મળ્યા હતા અને કેન્દ્ર સરકારના વિરોધમાં વિજય ચોક સુધી મોરચો કાઢ્યો હતો. કોંગ્રેસ સાંસદ રાહુલ ગાંધી અને અન્ય અનેક વિપક્ષી નેતા વિરોધ માર્ચ પછી રાજ્યસભાના અધ્યક્ષ વેંકૈયા નાયડુને પણ મળ્યા હતા. તેમણે નાયડૂને મળીને બુધવારે માર્શલો દ્વારા સાંસદો સાથે કરાયેલા ગેરવર્તનની ફરિયાદ કરી હતી. 

વિપક્ષે આક્ષેપ કર્યો કે સંસદની સુરક્ષામાં ન હોય તેવા બહારના લોકોને મહિલા સાંસદો સહિત વિપક્ષી નેતાઓ અને સભ્યો સાથે મારામારી કરવા માટે બોલાવાયા હતા. વિપક્ષે એક સંયુક્ત નિવેદનમાં જણાવ્યું કે કોઈપણ જાતની ઉશ્કેરણી વિના બહારના લોકોએ વિરોધ પક્ષના નેતાઓ અને સભ્યો સાથે દુર્વ્યવહાર કર્યો હતો. શિવસેનાના સાંસદ સંજય રાઉતે કહ્યું કે, વિપક્ષને સંસદમાં તેના વિચારો રજૂ કરવાની તક અપાઈ નથી. બુધવારે મહિલા સાંસદ વિરુદ્ધ થયેલી ઘટના લોકતંત્ર વિરુદ્ધ છે. અમને એવું લાગતું હતું જાણે અમે પાકિસ્તાનની સરહદે ઊભા છીએ.

બીજીબાજુ કેન્દ્ર સરકારે પણ બધા જ આક્ષેપો ફગાવી દીધા. કેન્દ્રીય મંત્રીઓએ પ્રેસ કોન્ફરન્સ કરીને સંસદમાં ચાલતા અવરોધો અંગે વિપક્ષ પાસે માફીની માગણી કરી હતી. સંસદીય કાર્યમંત્રી પ્રહલાદ જોશીએ વિપક્ષના આક્ષેપોને સંપૂર્ણપણે ખોટા ગણાવતા કહ્યું કે સીસીટીવી ફૂટેજમાં હકીકતો સ્પષ્ટ દેખાય છે. રાજ્યસભામાં બહારના લોકો આવ્યા હોવાના વિપક્ષના આક્ષેપને ફગાવીદેતાં કેન્દ્રીય મંત્રી પિયુષ ગોયલે કહ્યું કે, બુધવારે ગૃહમાં થયેલા હોબાળા માટે વિપક્ષ જવાબદાર છે. બહારના કોઈપણ માણસને ગૃહમાં આવવા દેવાયા નથી. ગૃહમાં ૧૨ મહિલા માર્શલ્સ સાથે કુલ ૧૮ માર્શલ હતા. વિપક્ષના આક્ષેપો ખોટા છે અને તેમના દેખાવો એક 'નાટક' છે.

જનરલ ઈન્સ્યોરન્સ બિલ પસાર કરતી વખતે હોબાળો થયો

રાજ્યસભામાં બુધવારે જનરલ ઈન્સ્યોરન્સ સુધારા બિલ વિરોધપક્ષના સાંસદોના હોબાળા વચ્ચે પસાર કરવામાં આવ્યું હતું. વિપક્ષે આ બિલને સ્થાયી સમિતિને મોકલી આપવા માગણી કરી હતી. આ વખતે હોબાળો શરૃ થઈ ગયો. સરકારે હોબાળા વચ્ચે બિલ પર ચર્ચા કરવા દબાણ કર્યું તો કેટલાક સાંસદો ટેબલ પર ચઢી ગયા અને કેટલાક સાંસદો વેલ તરફ ધસી ગયા હતા. આ સમયે સાંસદો અને માર્શલો સામ સામે આવી ગયા હતા. સાંસદો અને માર્શલો વચ્ચેના સંઘર્ષના ૨.૫ મિનિટના આ વીડિયોમાં દેખાય છે કે વિપક્ષના સાંસદો સૂત્રોચ્ચાર કરતાં ગૃહની વચ્ચે આવી જાય છે. જ્યાં સંસદની સલામતીની જવાબદારી સંભાળતા ગણવેશમાં રહેલા માર્શલો સાંસદોને રોકવાનો પ્રયાસ કરે છે. વિપક્ષના કેટલાક સાંસદો કાગળના ટૂકડા કરીને ફેંકતા જોવા મળી રહ્યા છે. એક સાંસદ ટેબલ પર ચઢી જાય છે.

from Top Stories News - Gujarat Samachar : World's Leading Gujarati Newspaper https://ift.tt/3skfAcI
via IFTTT