અફઘાનિસ્તાનમાં તાલિબાનો સરકાર રચવામાં ડખે ચડયા

(પીટીઆઈ) કાબુલ, તા. ૪

અફઘાનિસ્તાનમાંથી અમેરિકન દળોની વિદાય નિશ્ચિત થતાં એક પખવાડિયામાં જ બંદૂકની અણીએ આખા દેશ પર કબજો કરનારા તાલિબાનો નવી સરકારની રચના કરવામાં અટવાયા છે. તાલિબાનોએ ૧૫મી ઑગસ્ટે કાબુલ કબજે કર્યા પછીથી નવી સરકારની રચના માટેની કાર્યવાહી શરૂ કરી હતી અને શુક્રવારે નવી સરકારની જાહેરાત થવાની હતી, પરંતુ તેને પહેલાં શનિવાર પર અને હવે આગામી અઠવાડિયા પર મુલતવી રાખવામાં આવી છે. નવી સરકારની રચનામાં વૈશ્વિક સ્તરે સ્વીકૃતિ મળે તેવા સમાવેશક વહીવટીતંત્રની રચનામાં તાલિબાનો કયા જૂથોને સ્થાન આપવું તે અંગે અસમંજસમાં છે. બીજીબાજુ તાલિબાન કમાન્ડરોએ પંજશીર પર કબજો કરી લીધો હોવાના દાવા સાથે વિજયના ઉન્માદમાં આવી જઈ શુક્રવારે રાત્રે ઊજવણી માટે હવામાં કરેલા ગોળીબારમાં 70 લોકો માર્યા ગયા હતા. જોકે, પંજશીર પર કબજાના દાવાને અહેમદ મસૂદે ફગાવી તાલિબાનનો વિરોધ ચાલુ રહેશે તેવી જાહેરાત કરી હતી.

ગયા મહિને અફઘાનિસ્તાન પર નિયંત્રણ મેળવી લેનારા તાલિબાનોએ સતત બીજા દિવસે નવી સરકારની રચનાની જાહેરાત મુલતવી રાખી છે. તાલિબાનના ઈસ્લામિક અમિરાત ઓફ અફઘાનિસ્તાનમાં ઈરાની શાસન પદ્ધતિ હેઠળ ધાર્મિક વડા હિબતુલ્લાહ અખુંદજાદા સર્વેસર્વા હશે અને મુલ્લા અબ્દુલ ગની બરાદર સરકારના વડા હશે તે નિશ્ચિત મનાય છે. પરંતુ નવી સરકાર અને કેબિનેટના સભ્યોના નામ નિશ્ચિત કરવામાં મડાગાંઠ સર્જાઈ છે. 

નવી સરકારને વૈશ્વિક સ્વીકૃતિ માટે તાલિબાનોની કવાયત

તાલિબાનના પ્રવક્તા ઝબિઉલ્લાહ મુજાહિદે શનિવારે જણાવ્યું હતું કે, નવી સરકાર અને કેબિનેટના સભ્યોના નામની જાહેરાત હવે આગામી સપ્તાહે થશે. સરકારની રચનામાં વિલંબ માટે તેણે કોઈ કારણ જણાવ્યું નહોતું. જોકે, સૂત્રોના જણાવ્યા મુજબ એકલા તાલિબાનોના શાસનને વૈશ્વિક સ્તરે સ્વીકૃતિ નહીં મળે. પરિણામે આંતરરાષ્ટ્રીય સ્તરે સ્વીકૃત સમાવેશક સરકાર બનાવવા માટે બધા જ પક્ષો, સામાજિક જૂથો અને સમાજના બધા જ વર્ગોને યોગ્ય પ્રતિનિધિત્વ મળે તે માટે વિવિધ જૂથો સાથે ચર્ચા ચાલી રહી છે.

સરકાર ચલાવવા શિક્ષિત અફઘાનોની જરૂર પડશે : હક્કાની

કાબુલમાં સલામતી બાબતોના ઈનચાર્જ ખલિલ હક્કાનીએ જણાવ્યું હતું કે, નવી સરકારમાં અફઘાનિસ્તાનના ભૂતપૂર્વ વડાપ્રધાન ગુલબુદ્દિન હિકમતયાર અને દેશ છોડી ભાગી જનારા રાષ્ટ્રપતિ અશરફ ગનીના ભાઈ હસમત ગની અહમદઝાઈનો સરકારમાં સમાવેશ કરાશે. તાલિબાનો દેશની સલામતી કરવા માટે સક્ષમ છે, પરંતુ સરકાર ચલાવવા માટે યુવાન, શિક્ષિત અફઘાનોની જરૂર પડે છે. કથિત જૂના રાજકારણીઓની નવી સરકારમાં સંપૂર્ણપણે બાદબાકી કરાશે.

તાલિબાનોના શાસનમાં અધિકારો માટે મહિલાઓનો સંઘર્ષ યથાવત્

દરમિયાન અફઘાનિસ્તાનમાં હવે મહિલાઓ તેમના અધિકારો માટે તાલિબાનો સામે રસ્તા પર ઉતરી છે. છેલ્લા કેટલાક દિવસથી મહિલાઓ છેલ્લા ૨૦ વર્ષમાં તેમને મળેલા અધિકારો જાળવી રાખવા માટે દેખાવો કરી રહી છે. એવામાં શનિવારે કાબુલમાં મહિલાઓના દેખાવો હિંસક બન્યા હતા. તાલિબાનોના શાસનમાં રાજકીય વ્યવસ્થામાં મહિલાઓને અધિકાર આપવાની માગણી કરતી મહિલાઓની તાલિબાનોએ મારપીટ કરી હતી. તેમણે રાષ્ટ્રપતિ ભવન સામે દેખાવો કરનારી મહિલાઓ પર ટીયરગેસના શેલ છોડયા હતા. તાલિબાન શરૂઆતથી જ મહિલાઓના આ દેખાવોનો વિરોધ કરી રહ્યું છે. કેટલાક પ્રત્યક્ષદર્શીઓના જણાવ્યા મુજબ મહિલાઓને વેરવીખેર કરવા માટે તાલિબાનોએ ગોળીઓ પણ ચલાવી હતી.

પંજશીર કબજા અંગે અહેમદ મસૂદ-તાલિબાનના સામસામે દાવા

દરમિયાન અફઘાનિસ્તાનમાં તેમના નિયંત્રણ હેઠળ નહીં આવેલા એકમાત્ર પ્રાંત પંજશીર પર પોતે કબજો કરી લીધો છે તેવો દાવો કરતાં તાલિબાનોએ શુક્રવારે રાતે આ વિજયની ઊજવણી કરવા માટે હવામાં અંધાધૂંધ ગોળીબાર કર્યો હતો, જેમાં બાળકો સહિત 70 લોકોનાં મોત નીપજ્યાં હતા અને ૪૧ લોકોને ઈજા પહોંચી હતી. જોકે અહેમદ મસૂદ અને અમરુલ્લાહ સાલેહના નેતૃત્વમાં રેસિસ્ટન્સ ફોર્સે તાલિબાનોનો દાવો નકારી કાઢ્યો હતો અને કહ્યું કે પંજશીર પર તાલિબાનો કબજો જમાવી શક્યા નથી. તેઓ તેમનો વિરોધ કરવાનું ચાલુ રાખશે. બીજીબાજુ શનિવારે મોડી રાતે તાલિબાનોએ પંજશીરના ગવર્નર હાઉસ પર કબજો કરવાની સાથે આખા અફઘાનિસ્તાન પર તાલિબાનોએ કબજો કરી લીધો હોવાના અહેવાલો આવ્યા હતા.

from Top Stories News - Gujarat Samachar : World's Leading Gujarati Newspaper https://ift.tt/3thJ4Zi
via IFTTT