રાંધણ ગેસમાં રૂ. ૨૫, કોમર્શિયલ સિલિન્ડરમાં રૂ. ૭૫નો વધારો
(પીટીઆઈ) નવી દિલ્હી, તા.૧
દેશમાં બુધવારે સબસિડીવાળા સિલિન્ડર સહિત રાંધણ ગેસ (એલપીજી)ના બધી જ કેટેગરીના સિલિન્ડરના ભાવમાં રૂ. ૨૫નો વધારો કરવામાં આવ્યો હતો, જે બે મહિના કરતાં ઓછા સમયમાં સતત ત્રીજો વધારો છે. આ વધારા સાથે દિલ્હીમાં સબસિડીવાળા તેમજ સબસિડી વગરના ૧૪.૨ કિલો સિલિન્ડરના એલપીજીની કિંમત રૂ. ૮૮૪.૫૦ થઈ છે. વધુમાં ૧૯ કિલોના કોમર્શિયલ એલપીજી સિલિન્ડરના ભાવમાં રૂ. ૭૫નો વધારો કરાયો છે. દિલ્હીમાં તેની કિંમત રૂ. ૧,૬૯૩ થઈ છે તેમ ઓઈલ કંપનીઓએ કહ્યું હતું.
સરકારી ઓઈલ કંપનીઓએ અગાઉ ૧લી જુલાઈએ સબસિડીવાળા અને સબસિડી વગરના એલપીજીના ભાવમાં પ્રતિ સિલિન્ડર રૂ. ૨૫.૫૦નો વધારો કર્યો હતો. ત્યાર પછી ૧લી ઑગસ્ટે સબસિડી વગરના એલપીજીના ભાવમાં પ્રતિ સિલિન્ડર રૂ. ૨૫ અને ૧૮મી ઑગસ્ટે પણ પ્રતિ સિલિન્ડર રૂ. ૨૫નો વધારો કરાયો હતો. બુધવારે થયેલા ભાવ વધારા સાથે અમદાવાદમાં ૧૪.૨ કિલોના પ્રતિ સિલિન્ડર એલપીજીનો ભાવ રૂ. ૮૯૧.૫૦ જ્યારે ૧૯ કિલોના કોમર્શિયલ સિલિન્ડરનો ભાવ રૂ. ૧૭૦૫ થયો છે.
ઉદ્યોગના સૂત્રોએ જણાવ્યું હતું કે સંસદનું સત્ર ચાલુ હોવાથી અને વિપક્ષ સામે સરકાર મુશ્કેલીમાં મુકાઈ શકે તેવી સંભાવનાના પગલે ૧લી ઓગસ્ટે સબસિડીવાળા એલપીજી સિલિન્ડરમાં ભાવ વધારો કરાયો નહોતો. સરકારી ઓઈલ કંપનીઓ દ્વારા એલપીજીના ભાવમાં બુધવારે કરાયેલા વધારા સાથે ૧લી જાન્યુઆરીથી આઠ મહિનામાં એલપીજીના ભાવમાં પ્રતિ સિલિન્ડર રૂ. ૧૯૦નો વધારો કરાયો છે.
સરકાર પ્રત્યેક પરિવારને ૧૪.૨ કિલોના ૧૨ સિલિન્ડર પર સબસિડી આપે છે, જેની કિંમત બજાર ભાવ કરતાં ઓછી હોય છે અને આ સબસિડી સીધી જ ગ્રાહકના ખાતામાં જમા થાય છે. જોકે, ૧૨ સિલિન્ડરથી વધુ એલપીજી સિલિન્ડર ગ્રાહકે બજાર ભાવે ખરીદવા પડે છે. જોકે, માસિક ભાવ વધારાને પગલે રાંધણ ગેસમાં પ્રતિ સિલિન્ડર સબસિડી નાબૂદ થઈ ગઈ છે.
માસિક વધારાના પગલે મે ૨૦૨૦થી એલપીજીમાં સબસિડી બંધ થઈ ગઈ છે. હવે માત્ર દેશમાં અંતરિયાળ વિસ્તારના લોકોને માત્ર ભાડાં સબસિડીનો અમુક હિસ્સો જ મળે છે. પરીણામે મોટાભાગના શહેરોમાં સબસિડીવાળા અને સબસિડી વગરના એલપીજી સિલિન્ડરનો ભાવ એક સમાન થઈ ગયો છે. ઉલ્લેખનીય છે કે પેટ્રોલિયમ મંત્રાલયે તાજેતરમાં જ તેના ટ્વિટર હેન્ડલ પર દિલ્હીના એક ગ્રાહકે સબસિડી અંગે પૂછેલા સવાલનો જવાબ આપતાં જણાવ્યું હતું કે ઘરેલુ રાંધણ ગેસ પર સબસિડી ચાલુ છે.
છેલ્લા સાત વર્ષમાં રાંધણ ગેસનો ભાવ બમણા કરતાં વધુ વધ્યો છે. ૧લી માર્ચ ૨૦૧૪ના રોજ ૧૪.૨ કિલોના પ્રતિ સિલિન્ડર એલપીજીનો ભાવ રૂ. ૪૧૦.૫ હતો. મુંબઈમાં ૧૪.૨ કિલોના એલપીજી સિલિન્ડરની કિંમત હવે રૂ. ૮૮૪.૫૦ થઈ છે જ્યારે કોલકાતામાં રૂ. ૯૧૧ થઈ છે, જે દેશના ચારેય મેટ્રોમાં સૌથી વધુ છે.
from Top Stories News - Gujarat Samachar : World's Leading Gujarati Newspaper https://ift.tt/3kRhYEy
via IFTTT
ટિપ્પણીઓ નથી: