ચીને એઈમ્સના પાંચ સર્વર હેક કર્યા, 4 કરોડ દર્દીનો ડેટા વેચવા મૂક્યો

- દિલ્હી એઈમ્સનું સર્વર 10 દિવસથી ડાઉન, વીવીઆઈપીના ડેટા પણ ડાર્ક વેબ પર

- હેકર્સે રૂ. 200 કરોડની ખંડણી માગી છે, ડાર્ક વેબ પર 1600 વખત એઈમ્સનો ડેટા સર્ચ થયો, દેશમાં પહેલી વખત આઈએફએસઓએ હેકિંગ કેસની તપાસ હાથ ધરી

- રેન્સમવેરના હુમલામાં ડેટા લીક નથી થયો, માત્ર એઈમ્સમાંથી દર્દીઓના ડેટાનું એક્સેસ બંધ થયાનો સરકારનો દાવો

નવી દિલ્હી : દિલ્હીની અખિલ ભારતીય આયુર્વિજ્ઞાાન સંસ્થાન (એઈમ્સ)માં સારવાર કરાવી ચૂકેલા દર્દીઓની અંગત માહિતી હેકરોના હાથ લાગી ગઈ છે. હેકર્સે એઈમ્સના પાંચ મુખ્ય સર્વર ૧૦ દિવસ પહેલાં હેક કરી લીધા હતા. આ સર્વરને હજુ સુધી કાર્યરત કરી શકાયા નથતી. હેકર્સે એઈમ્સ પાસે ૨૦૦ કરોડ રૂપિયાની ખંડણી માગી છે. એઈમ્સના સર્વરના હેકિંગ પાછળ ચીનનો હાથ હોવાનું સામે આવ્યું છે. કેન્દ્રીય ઈલેક્ટ્રોનિક્સ અને આઈટી રાજ્યમંત્રી રાજીવ ચંદ્રશેખર પણ  એઈમ્સના હેકિંગ પાછળ કોઈ દેશ અથવા મોટી સંગઠિત ગેંગનો હાથ હોવાનું માને છે. તેમણે કહ્યું હતું કે, એઈમ્સના સર્વર પર હુમલો મોટું કાવતરું છે.

મીડિયા અહેવાલો મુજબ એઈમ્સના મુખ્ય ડિજિટલ સર્વર્સને ઠપ્પ કરવા પાછળ ચીની હેકર્સનો હાથ હોઈ શકે છે. આ હેકર્સ એઈમ્સના સર્વરમાંથી ડેટા ચોરીને ડાર્ક વેબ પર વેચી રહ્યા છે. આંકડા જણાવે છે કે ડાર્ક વેબ પર એઈમ્સમાંથી ચોરી કરાયેલા ડેટા ડાર્ક વેબ પર વેચાણ માટે મૂકવામાં આવ્યા છે અને તેના માટે ૧,૬૦૦થી વધુ સર્ચ થયા છે. ડાર્ક વેબ પર વેચાણ માટે મૂકાયેલા ડેટામાં એઈમ્સમાં સારવાર લઈ ચૂકેલા નેતાઓ, અનેક હસ્તીઓ સહિત વીવીઆઈપીનો સમાવેશ થાય છે. એક અંદાજ મુજબ ચીની હેકર્સે ૪ કરોડ દર્દીઓનો ડેટા ચોરી લીધો છે.

ધ ઈન્ટેલિજન્સ ફ્યુઝન એન્ડ સ્ટ્રેટેજિક ઓપરેશન્સ (આઈએફએસઓ)ના સૂત્રો મુજબ એઈમ્સના પાંચ સર્વર હેક કરાયા છે.. જોકે, આ હેક કરાયેલા સર્વરમાંથી કોઈ ડેટા લીક થયો નથી. દેશમાં પહેલી વખત હેકિંગનો કેસ આઈએફએસઓ હેન્ડલ કરી રહ્યું છે. આઈએફએસઓના અધિકારીઓનું કહેવું છે કે હેકર્સનો હુમલાનો મુખ્ય આશય ખંડણી વસૂલવાનો છે. હેકર્સે કથિત રીતે રૂ. ૨૦૦ કરોડની માગ પણ કરી છે.

કેન્દ્રીય મંત્રીએ આ રેન્સમવેર મુદ્દે કહ્યું કે, આ હુમલામાં દર્દીઓનો ડેટા લીક થયો નથી, પરંતુ દર્દીના ડેટાનું એક્સેસ એઈમ્સની હોસ્પિટલમાંથી બંધ થઈ ગયું છે. આ સાઈબર સિક્યોરિટીની બાબત છે. સરકાર ડેટા બ્રિચ અંગે ડિજિટલ પર્સનલ ડેટા પ્રોટેક્શન બિલ લાવવા જઈ રહી છે. તે લાગુ થયા બાદ એઈમ્સ જેવી ઘટનાઓ થતા પીડિત વ્યક્તિ પોતાની ડેટા પ્રાઈવસી અંગે ડેટા પ્રોટેક્શન બોર્ડને ઈ-મેલ કરીને ફરિયાદ કરી શકે છે.

કેન્દ્રીય મંત્રી રાજીવ ચંદ્રશેખરે કહ્યું કે, સીઈઆરટી, એનઆઈએ અને દિલ્હી પોલીસ કેસની તપાસ કરી રહી છે. આ સાથે જ તેમણે એમ પણ કહ્યું કે, સરકાર સરકારી સંસ્થાઓને સાઈબર હુમલાથી બચાવવા માટે અનેક પ્રકારની વ્યવસ્થા કરે છે, પરંતુ એઈમ્સ એક સ્વાયત્ત સંસ્થાન છે, જે આ કામ માટે ખાનગી એજન્સીઓને હાયર કરે છે. સરકાર ભવિષ્યમાં આ પ્રકારની ઘટનાઓ રોકવા માટેના માપદંડો તૈયાર કરવા પર વિચારણા કરી રહી છે, જેને એડવાઈઝરી રૂપમાં લઈને એઈમ્સ જેવી સંસ્થાઓને મોકલીને તેને લાગુ કરવાનો આગ્રહ કરી શકાશે, પરંતુ પગલાં તો એઈમ્સ જેવી સંસ્થાઓએ જાતે જ લેવા પડશે.

બીજીબાજુ એઈમ્સના સર્વર હેક થયા પછી સાઈબર હુમલાખોરોએ ગુરુવારે જળશક્તિ મંત્રાલયનું ટ્વિટર હેન્ડલ પણ હેક કરી લીધું હતું. એઈમ્સનું સર્વર હેક થયા પછી કોઈ સરકારી સાઈટ પર આ બીજો મોટો સાઈબર હુમલો હતો. એઈમ્સ પર સાઈબર એટેકમાં ચીની હેકર્સનો હાથ હોવાની બાબત પ્રારંભિક રિપોર્ટ છે, પરંતુ હેકર્સ દ્વારા હુમલા ચીનની જૂની આદત છે. ભારત અગાઉ પણ ચીનના આવા કરતૂતોનો ભોગ બની ચૂક્યું છે. ઑક્ટોબર ૨૦૨૦માં મુંબઈમાં મોટાપાયે બ્લેકઆઉટ થયું હતું. મુંબઈના અનેક ભાગોમાં ૧૦-૧૨ કલાક સુધી વીજકાપ રહ્યો હતો. આ ઘટનામાં ચીનના રેડઈકો નામના હેકર્સનો હાથ હોવાનો અમેરિકન એજન્સીએ દાવો કર્યો હતો.

from Top Stories News - Gujarat Samachar : World's Leading Gujarati Newspaper https://ift.tt/TXpg9nP
via IFTTT