આખરે બે દિવસના વિલંબ પછી કેરળમાં ચોમાસાનું આગમન : હવામાન વિભાગ

(પીટીઆઈ) નવી દિલ્હી, તા.૩

આખરે બે દિવસના વિલંબ પછી ગુરુવારે કેરળમાં દક્ષિણ-પશ્ચિમ ચોમાસાનું આગમન થવાની સાથે દેશમાં ચાર મહિનાની ચોમાસુ મોસસની શરૂઆત થઈ છે તેમ હવામાન વિભાગે જણાવ્યું હતું. કેરળમાં ગુરુવારે કેટલાક સ્થળે પર ૨.૫ મીમીથી વધુ વરસાદ પડયો હતો. કેરળમાં સામાન્ય રીતે ૧લી જૂનથી ચોમાસાની શરૂઆત થાય છે. હવામાન વિભાગે અગાઉ ૩૧મી મેથી દેશમાં ચોમાસાની શરૂઆત થવાની આગાહી કરી હતી. દેશમાં છ વર્ષમાં ત્રીજી વખત ચોમાસાની મોડી શરૂઆત થઈ છે. અગાઉ વર્ષ ૨૦૧૬ અને ૨૦૧૯માં પણ ચોમાસાની મોડી શરૂઆત થઈ હતી. કેરળમાં આગામી બે દિવસમાં ભારેથી અતિ ભારે વરસાદની સંભાવના છે.

હવામાન વિભાગના ડિરેક્ટર જનરલ મૃત્યુંજર મોહપાત્રાએ જણાવ્યું હતું કે, કેરળમાં ગુરુવારથી દક્ષિણ-પશ્ચિમ ચોમાસાની શરૂઆત થઈ છે. દક્ષિણ-પશ્ચિમ ચોમાસુ હવે આગામી બે દિવસમાં દક્ષિણ અરબી સમુદ્ર અને મધ્ય અરબી સમુદ્રના કેટલાક ભાગો, કેરળના બાકીના ભાગો, લક્ષ્યદ્વિપ, તામિલનાડુ, પુડુચેરી, કર્ણાટકના દરિયાકાંઠાના વિસ્તાર અને દક્ષિણ ભાગ તેમજ બંગાળની ખાડીના દક્ષિણ અને મધ્ય ભાગમાં આગળ વધશે. ખાનગી હવામાન એજન્સી સ્કાયમેટે જણાવ્યું હતું કે, ૩૦મી મેના રોજ કેરળમાં ચોમાસુ બેસશે. જોકે, હવામાન વિભાગે કહ્યું કે, ચોમાસાની જાહેરાત કરવા માટેની પરિસ્થિતિઓ હાલ જોવા મળતી નથી.

હવામાન વિભાગે ગુરુવારે કહ્યું હતું કે, ત્રણ માપદંડોના આધારે કેરળમાં ચોમાસાની શરૂઆત થઈ હોવાની જાહેરાત કરવામાં આવે છે અને આ માપદંડો મુજબ ગુરુવારે કેરળમાં પડેલા વરસાદથી ચોમાસુ બેસવાની જાહેરાત કરાઈ હતી. હવામાન વિભાગ મુજબ ઉત્તર અને દક્ષિણ ભારતમાં ચોમાસુ સામાન્ય, મધ્ય ભારતમાં સામાન્યથી વધુ અને પૂર્વ તથા પૂર્વોત્તર ભારતમાં સામાન્યથી નીચે રહેવાની શક્યતા છે. હવામાન વિભાગે તેની બીજી લાંબાગાળાની આગાહી સમયે આ સંભાવના વ્યક્ત કરી હતી. કોરોના મહામારીના કારણે દેશનું અર્થતંત્ર મુશ્કેલીમાં મુકાયું છે ત્યારે કૃષિ અને સંબંધિત ક્ષેત્રોમાં સારા ચોમાસાથી અર્થતંત્રને ગતિ મળશે. દેશના મોટાભાગના વિસ્તારોમાં ચોમાસા દરમિયાન સામાન્યથી વધુ વધુ વરસાદની હવામાન વિભાગે આગાહી કરી છે. 

દરમિયાન કેરળના કેટલાક ભાગોમાં આગામી બે દિવસમાં ભારેથી અતિ ભારે વરસાદ થશે તેમ હવામાન વિભાગે તેના ગુરુવારના બુલેટીનમાં જણાવ્યું હતું. કેરળમાં વરસાદનું નિરિક્ષણ કરતાં ૧૪ સ્ટેશનોમાંથી ૬૦ ટકા સ્ટેશનો પર સતત બે દિવસ ૨.૫ મીમીથી વધુ વરસાદ થયો હતો. કેરળ ઉપરાંત લક્ષ્યદ્વિપ અને કર્ણાટકના કેટલાક વિસ્તારોમાં પણ ગુરુવારે સામાન્ય વરસાદ પડયો હતો. હવામાન વિભાગે કેરળના પઠાનમથિટ્ટા, અલાપ્પુઝા, કોટ્ટાયમ, એર્નાકુલમ, ઈડુકી, કોઝીકોડે, કન્નુર અને કસારાગોડ વિસ્તારમાં અતિ ભારે વરસાદની સંભાવના વ્યક્ત કરતાં 'યલો એલર્ટ' જાહેર કરી હતી.

દરમિયાન મહારાષ્ટ્રમાં હવામાન વિભાગે કહ્યું હતું કે રાજ્યમાં આગામી ૪૮ કલાકમાં મુંબઈ સહિત કેટલાક ભાગોમાં ચોમાસા પહેલાંનો વરસાદ પડવાની શક્યતા છે. મુંબઈ અને મહારાષ્ટ્રના દરિયાકાંઠે શનિવાર સુધીમાં સામાન્ય વરસાદ પડી શકે છે. વર્તમાન પરિસ્થિતિ મુજબ રાજ્યના વિવિધ ભાગોમાં વરસાદનું પ્રમાણ અલગ અલગ રહેવાની અપેક્ષા છે.

from Top Stories News - Gujarat Samachar : World's Leading Gujarati Newspaper https://ift.tt/3vPstwe
via IFTTT