PM મોદીનું ટ્વીટર એકાઉન્ટ હેક કરવામાં કોની સંડોવણી? આ ખાસ ટીમ કરશે તપાસ

- સોશિયલ મિડીયા યુઝર્સે આને સુરક્ષાનું ભયાનક જોખમ અને બિટકોઈન માફિયાનું કામ જણાવ્યું

નવી દિલ્હી, તા. 12 ડિસેમ્બર, 2021, રવિવાર

વડાપ્રધાન મોદીના ટ્વીટર એકાઉન્ટને શનિવારે મોડી રાત્રે હેકર્સે હેક કરી 3 મિનિટની અંદર 2 ટ્વીટ કર્યા હતા. જેના કારણે સરકારમાં ખળભળાટ મચી ગયો છે. આ ટ્વીટ મોડી રાત્રે 2:11 વાગ્યાથી 2:15ની વચ્ચે કર્યા હતા. તે જ સમયે આ ઘટના પછી સરકાર હવે એક્શનમાં આવી ગઈ છે.

અધિકારીઓ હવે હેકર્સને શોધવા માટે સખત મહેનત કરી રહ્યા છે. મળતી માહિતી પ્રમાણે સરકારે આની તપાસ કરવા માટે ખાસ ટીમની નિમણૂક કરી છે. જે લેટેસ્ટ ટેક્નોલોજી દ્વારા હેકર્સને શોધી કાઢશે.

તપાસ માટે CERT-IN ટીમની નિમણૂક કરવામાં આવી

સૂત્રોના જણાવ્યા અનુસાર હેકર્સને શોધવા માટે ઈન્ડિયન કમ્પ્યૂટર ઈમરજન્સી રીસપોન્સ ટીમ (CERT-IN)ની નિમણૂક કરાઈ છે અને તે તેના સોર્સને શોધવાનો પ્રયત્ન કરી રહી છે. હેકિંગને શોધવા માટે આ ટીમ લેટેસ્ટ ટેક્નોલોજીનો ઉપયોગ કરી રહી છે. CERT-IN કેન્દ્ર સરકારની એક વિશેષ તપાસ એજન્સી છે જે મિનિસ્ટ્રી ઓફ ઈલેક્ટ્રોનિક્સ એન્ડ ઈન્ફોર્મેશન ટેક્નોલોજીની અંદર કામ કરે છે. તેનું કામ ભારત સરકારના હેકિંગ અને ફિશિંગ જેવા ગંભીર સાયબર જોખમોનો સામનો કરવાનું છે.

ટ્વિટરે આપ્યું નિવેદન

હવે ટ્વિટરે આ ઘટના પર નિવેદન રજૂ કરી સ્પષ્ટતા આપી છે. ટ્વિટર સ્પોક્સે જણાવ્યું કે, અમારી પાસે પ્રધાનમંત્રી કાર્યાલય સાથે કોમ્યુનિકેશનની 24X7 ઓપન લાઇન્સ છે અને અમને આ પ્રવૃતિ વિશે જાણ થતા જ અમારી ટીમોએ પ્રભાવિત એકાઉન્ટને સુરક્ષિત કરવા માટેના જરૂરી પગલા ઉઠાવ્યા. અમારી તપાસ દ્વારા જાણવા મળ્યું છે કે હમણા કોઈ પણ પ્રકારના જોખમનો કોઈ સંકેત નથી.

સોશિયલ મિડીયા યુઝર્સે આની પાછળ બિટકોઈન માફિયાનો હાથ જણાવ્યો

વડાપ્રધાન મોદીના ટ્વિટર હેન્ડલ હેક થવાની જાણકારી સોશિયલ મીડીયા પર આવતા જ વાયરલ થઈ ગઈ. આને લઈને યુઝર્સે સ્ક્રીનશોટ શેર કરતા પોતાની પ્રતિક્રિયા આપવાનું શરૂ કરી દીધું અને પછી હેશટેગ હેક અને હેકર્સ ટ્રેન્ડ કરવા લાગ્યા. હેશટેગ હેક્ડ ભારતમાં રાતે જ ચોથા નંબર પર ટ્રેન્ડ કરી રહ્યું હતું.

સોશિયલ મીડીયા યુઝર્સે આને સુરક્ષાનું ભયાનક જોખમ અને બિટકોઈન માફિયાનું કામ જણાવ્યું. કેટલાક લોકોએ એટલે સુધીની આશંકા વ્યક્ત કરી કે આ ઘટના બાદ ક્રિપ્ટોકરન્સી પર પ્રતિબંધ મૂકવામાં આવી શકે છે. મળતી માહિતી પ્રમાણે પહેલું ટ્વીટ 2:11 વાગ્યે કરવામાં આવ્યું હતું, જેને બે મિનિટમાં ડિલીટ કરી દેવામાં આવ્યું હતું પરંતુ તેને ડિલીટ કરતાની સાથે જ 2:14 કલાકે બીજુ ટ્વીટ કરવામાં આવ્યું હતું. જો કે, બંન્નેમા સમાન વાત લખવામાં આવી હતી. આ બીજીવાર કરવામાં આવેલા ટ્વીટને પણ ડીલિટ કરી દીધું હતું.

from Top Stories News - Gujarat Samachar : World's Leading Gujarati Newspaper https://ift.tt/3EPokNo
via IFTTT