દેશમાં 32 દિવસમાં ૨૦મી વખત ભાવ વધારો, અમદાવાદમાં પેટ્રોલ રૂ. ૯૨ નજીક

(પીટીઆઈ) નવી દિલ્હી, તા.૬

આંતરરાષ્ટ્રીય સ્તરે ક્રૂડના ભાવમાં વધારાના પગલે દેશમાં પેટ્રોલ અને ડીઝલના ભાવમાં વધારાની પરંપરા રવિવારે પણ ચાલુ રહી છે. દિલ્હીમાં સૌપ્રથમ વખત પેટ્રોલનો ભાવ પ્રતિ લીટર રૂ. ૯૫ અને ડીઝલનો ભાવ પ્રતિ લીટર રૂ. ૮૬ની વિક્રમી સપાટીને વટાવી ગયો છે. રવિવારે પેટ્રોલમાં ૨૧ પૈસા અને ડીઝલમાં ૨૦ પૈસાનો વધારો થયો હતો. દેશમાં પશ્ચિમ બંગાળ સહિત પાંચ રાજ્યોની ચૂંટણી પૂરી થયા પછી ૪થી મેથી અત્યાર સુધીમાં પેટ્રોલ અને ડીઝલના ભાવમાં ૨૦મી વખત વધારો થયો છે.

દેશમાં છ રાજ્યો અને કેન્દ્રશાસિત પ્રદેશોમાં પેટ્રોલનો ભાવ રૂ. ૧૦૦ની માનસિક સપાટીને વટાવી ગયો છે. આ રાજ્યોમાં રાજસ્થાન, મધ્ય પ્રદેશ, મહારાષ્ટ્ર, આંધ્ર પ્રદેશ, તેલંગાણા અને લદ્દાખનો સમાવેશ થાય છે. દેશમાં છેલ્લા એક મહિનામાં પેટ્રોલ અને ડીઝલના ભાવમાં અનુક્રમે પ્રતિ લીટર રૂ. ૪.૬૯ અને રૂ. ૫.૨૮નો  વધારો થયો છે. આંતરરાષ્ટ્રીય સ્તરે ક્રૂડ ઓઈલના ભાવ છેલ્લા કેટલાક સમયથી સતત વધી રહ્યા છે. અનેક દેશોમાં લોકડાઉન અને નિયંત્રણો હળવા થવાના પગલે ઈંધણની માગમાં વધારાની સંભાવનાના રોકાણકારોના આશાવાદને પગલે ક્રૂડના ભાવ વધી રહ્યા છે. ભારતમાં વ્યાપક સ્તરે ઉપયોગમાં લેવાતા વૈશ્વિક ઓઈલ બેન્ચમાર્ક બ્રેન્ટ ક્રૂડનો ભાવ છેલ્લા બે વર્ષમાં પહેલી વખત ૭૨ ડોલર નજીક પહોંચ્યો હતો.   

દિલ્હીમાં પેટ્રોલનો ભાવ પ્રતિ લીટર રૂ. ૯૫.૦૯ અને ડીઝલનો ભાવ પ્રતિ લીટર રૂ. ૮૬.૦૧ થયો હતો. દેશમાં પેટ્રોલ અને ડીઝલના સૌથી ઓછા ભાવ ધરાવતા રાજ્યોમાં ગુજરાતનો સમાવેશ થાય છે. ગુજરાતમાં પેટ્રોલનો સરેરાશ ભાવ વધીને રૂ. ૯૨ નજીક પહોંચ્યો છે જ્યારે ગુજરાતના ત્રણેય પડોશી રાજ્યો રાજસ્થાન, મધ્ય પ્રદેશ અને મહારાષ્ટ્રમાં પેટ્રોલનો ભાવ રૂ. ૧૦૦ને પાર થઈ ગયો છે.

પેટ્રોલ અને ડીઝલના રીટેલ ભાવમાં કેન્દ્રની એક્સાઈઝ ડયુટી ઉપરાંત વેટ અને ફ્રેટ ચાર્જીસ જેવા અન્ય સ્થાનિક કરની અસરના કારણે રાજ્યોમાં પેટ્રોલ અને ડીઝલના ભાવ અલગ અલગ રહે છે. દેશમાં ઈંધણ પર સૌથી વધુ વેટ રાજસ્થાનમાં હોવાથી ત્યાં ઘણા સમય પહેલાં પેટ્રોલનો ભાવ પ્રતિ લીટર રૂ. ૧૦૦ને પાર થઈ ગયો છે. રાજસ્થાન બાદ મધ્ય પ્રદેશ, મહારાષ્ટ્ર, આંધ્ર પ્રદેશ અને તેલંગાણા તેમજ કેન્દ્રશાસિત પ્રદેશ લદ્દાખમાં પેટ્રોલનો ભાવ રૂ. ૧૦૦ને પાર ગયો હતો.

મુંબઈમાં ૨૯મી મેના રોજ પેટ્રોલનો ભાવ રૂ. ૧૦૦ને પાર થયો હતો. આ સાથે દેશના ચાર મેટ્રોમાં સૌથી પહેલાં મુંબઈમાં પેટ્રોલનો ભાવ રૂ. ૧૦૦થી વધુ થયો હતો. હાલ મુંબઈમાં પેટ્રોલનો ભાવ પ્રતિ લીટર રૂ. ૧૦૧.૩૦ પૈસા અને ડીઝલનો ભાવ રૂ. ૯૩.૩૫ છે. દેશમાં રવિવારે ઈંધણના ભાવમાં થયેલો વધારો પશ્ચિમ બંગાળ સહિત પાંચ રાજ્યોમાં વિધાનસભા ચૂંટણીના પરિણામો જાહેર થયા પછી ૨૦મો વધારો છે. તે પહેલાં સરકારી ઓઈલ કંપનીઓએ લગભગ ૧૮ દિવસ સુધી પેટ્રોલ અને ડીઝલના ભાવમાં વધારો અટકાવ્યો હતો.

from Top Stories News - Gujarat Samachar : World's Leading Gujarati Newspaper https://ift.tt/3g859TO
via IFTTT