કોરોના વધુ નબળો પડયો : 74 દિવસમાં સૌથી ઓછા 70 હજાર દૈનિક કેસ

એક્ટિવ કેસો બીજી લહેરની પીક બાદ પહેલી વખત 10 લાખથી નીચે 

વધુ 3921ના મોત સાથે કુલ મૃત્યુઆંક 3.74 લાખને પાર : કુલ 2.81 કરોડ લોકો કોરોનાને હરાવી સાજા થયા

ભારતમાં ડેલ્ટા બાદ હવે ડેલ્ટા પ્લસ વેરિઅંટ મળ્યો, હજુ બહુ ચિંતાજનક સ્થિતિ ન હોવાનો નિષ્ણાતોનો દાવો

હૈદરાબાદમાં ભારત બાયોટેકના કોવેક્સિનના ઉત્પાદન યુનિટની સુરક્ષા સીઆઇએસએફને સોપવામાં આવી

નવી દિલ્હી : ભારતમાં છેલ્લા 24 કલાકમાં કોરોનાના નવા 70421 કેસો સામે આવ્યા છે. છેલ્લા 74 દિવસમાં આ દૈનિક કેસો સૌથી ઓછા છે. જ્યારે આ સાથે જ એક જ દિવસમાં કોરોનાને કારણે વધુ 3921 લોકોના મોત નિપજ્યા છે. આ સાથે જ કોરોનાના કુલ કેસોની સંખ્યા 2.95 કરોડે પહોંચી ગઇ છે. એક્ટિવ કેસોમાં છેલ્લા બે મહિનામાં 10 લાખનો ઘટાડો થયો છે. 

ભારતમાં કોરોનાને કારણે અત્યાર સુધીમાં 3.74 લાખ લોકોએ જીવ ગુમાવ્યો છે. જ્યારે એક્ટિવ કેસો કોરોનાની બીજી લહેરની પીક બાદ પહેલી વખત 10 લાખની અંદર જતા રહ્યા છે. દેશમાં હાલ એક્ટિવ કેસો માત્ર 9.73 લાખ છે જે કુલ ઇંફેક્શનના 3.30 ટકા છે. રિકવરી  રેટમાં પણ સુધારો થયો છે અને 95.43 ટકાએ પહોંચી ગયો છે. 

રવિવારે દેશમાં કોરોનાના કુલ 14 લાખ ટેસ્ટ કરવામાં આવ્યા હતા જ્યારે કુલ ટેસ્ટનો આંકડો 37.96 કરોડે પહોંચી ગયો છે. અત્યાર સુધીમાં કોરોનાને હરાવીને 2.81 કરોડ લોકો સાજા થઇ ગયા છે. જ્યારે રસીકરણ અભિયાન તેજ બનાવાયું છે. અત્યાર સુધીમાં દેશમાં કુલ 25.48 કરોડ રસીના ડોઝ આપવામાં આવ્યા છે.

જ્યારે કેન્દ્રએ કહ્યું છે કે આગામી ત્રણ દિવસમાં કેન્દ્ર સરકાર રાજ્યો અને કેન્દ્ર શાસિત પ્રદેશોને 96 હજાર રસીના ડોઝ પુરા પાડશે.  બીજી તરફ નિષ્ણાંતોએ ભારતમાં કોરોના મહામારીની બીજી લહેર માટે જવાબદાર ગણાતા ડેલ્ટા પ્લસ વેરિઅંટને શોધી કાઢ્યો છે. જોકે સાથે નિષ્ણાતોનુ કહેવુ છે કે ડેલ્ટ પ્લસ વેરિઅંટ વધુ ચિંતાજનક નથી.

અગાઉ આલ્ફા અને ડેલ્ટા વેરિઅંટ મળી આવ્યો હતો. જોકે હવે તેનાથી પણ એડવાંસ ડેલ્ટા પ્લસ વેરિઅંટ મળી આવ્યો છે.  હૈદરાબાદમાં ભારત બાયોટેક દ્વારા કોવેક્સિન રસીનું ઉત્પાદન કરવામાં આવી રહ્યું છે. એવામાં આ યુનિટની સુરક્ષા સેન્ટ્રલ ઇન્ડસ્ટ્રીયલ સિક્યોરિટી ફોર્સ (સીઆઇએસએફ)ને સોપવામાં આવી છે.

from Top Stories News - Gujarat Samachar : World's Leading Gujarati Newspaper https://ift.tt/3wtlUj6
via IFTTT