ચીનમાં કોરોનાના નવા 1337 કેસ નોંધાયા, જિલિન પ્રાંતમાં 7,000 જવાનો તૈનાત

હોંગકોંગમાં કોરોનાના નવા 26,908 કેસ,249નાં મોત

દક્ષિણ કોરિયામાં કોરોનાના નવા 3,09,769 લાખ કેસ, 200નાં મોત : યુએસના ભૂતપૂર્વ પ્રમુખ બરાક ઓબામાને કોરોના

જાપાનમાં કોરોનાના નવા 50 હજાર અને ન્યુઝિલેન્ડમાં 15 હજાર કેસ નોંધાયા

તાઇપેઇ : ચીનમાં છેલ્લા ચોવીસ કલાકમાં કોરોનાના નવા સ્થાનિક સ્તરે ફેલાયેલા 1337 કેસ નોંધાવાને પગલે સરકારે સંખ્યાબંધ શહેરોમાં લોકડાઉન જાહેર કર્યું હતું. જ્યાં 895 કેસ નોંધાયા છે તે જિલિન ઓદ્યોગિક પ્રાંતમાં સરકારે કાયદો અને વ્યવસ્થા જાળવવા માટે 7,000 મિલિટરી જવાનોને તહેનાત કર્યા છે. 

એક સપ્તાહ પૂર્વે  ચાંગચૂન શહેરની ફરતે આવેલા જિલિન પ્રાંતમાં કોરોનાના 98 કેસ નોંધાયા હતા. ચીનની કોરોના મહામારી પ્રત્યેની ઝીરો ટોલરન્સ નીતિને કારણે કોઇપણ શહેરમાં કોરોનાના થોડા કેસો નોંધાય તો સમગ્ર શહેરમાં લોકડાઉન જાહેર કરી દેવામાં આવે છે. 

બીજી તરફ હોંગકોંગમાં છેલ્લા ચોવીસ કલાકમાં કોરોનાના નવા 26,908 કેસ અને 249 જણાના મોત નોંધાયા છે. આ જ રીતે દક્ષિણ કોરિયામાં કોરોનાના નવા 3,09,769 કેસ અને 200ના મોત નોંધાયા છે.

રશિયામાં પણ કોરોનાના નવા 41,055 કેસ અને 633 જણાના મોત નોંધાયા છે. જાપાનમાં પણ કોરોનાના નવા 52,002 કેસ અને 125 જણાના મોત નોંધાયા હતા. અત્યાર સુધી ન્યુઝિલેન્ડમાં કોરોનાના કસો પ્રમાણમાં ઓછા નોંધાયા હતા ત્યાં પણ હવે કોરોનાના નવા 15,576 કેસ નોંધાયા છે.

આમ, કોરોના મહામારી એશિયાના મોટાભાગના દેશોમાં બીએ2 નામના કોરોના વેરિઅન્ટને કારણે પૂરઝડપે ફરી પ્રસરી રહી છે.  ચીનના પૂર્વ કાંઠાના શહેરો અને ટાપુઓમાં પણ કોરોનાના નવા વેરિઅન્ટનો ચેપ પૂરઝડપે ફેલાઇ રહ્યો છે.

બિજિંગમાં નવા છ કેસ અને શાંઘાઇમાં 41 કેસ નોંધાવા સાથે જ્યાં કોરોનાનો દર્દી મળી આવ્યો હોય તે તંમામ રહેણાંક અને ઓફિસ ઇમારતોમાં લોકડાઉન કરી દેવામાં આવ્યું છે. પોણા બે કરોડની વસ્તી ધરાવતાં ટેક અને ફાયનાન્સ દબ ગણાતાં શેંન્ઝેન શહેરમાં રવિવારે લોકડાઉન જાહેર કરવામાં આવ્યું હતું. 

ચીનના રેલ નેટવર્કની સેવામાં મોટો કાપ મુકી દેવામાં આવ્યો છે. ચીન રેલવે અને એરલાઇન્સે જે લોકોએ આગોતરી ટિકિટો ખરીદી હોય તેમને ફ્રી રિફન્ડ આપવાની જાહેરાત કરી છે. શાંઘાઇએ અન્ય શહેરો અને પ્રાંતમાં ચલાવાતી બસસેવાઓને અટકાવી દીધી છે.

શાંઘાઇની ફુદાન યુનિવર્સિટીના ચેપી રોગના પ્રોફેસર ઝાંગ વેન્હોગે જણાવ્યું હતું કે હાલ ચીનના મોટાભાગના શહેરોમાં કોરોનાના બીએ2 વેરિઅન્ટ ફેલાયો છે. જે મૂળ ઓમિક્રોન વેરિઅન્ટ કરતાં પણ વધારે ઝડપથી ફેલાતો હોવાનું પ્રાથમિક અભ્યાસોમાં જણાયું છે. 

બીજી તરફ યુએસમાં ભૂતપૂર્વ પ્રમુખ બરાક ઓબામાને કોરોનાનો ચેપ લાગ્યો હોવાના સમાચાર મળતાં જ ભારતના વડાપ્રધાન નરેન્દ્ર મોદીએ તેમને તથા તેમના પરિવારને સાજા થવાની શુભેચ્છા પાઠવી હતી. ઓબામાએ જણાવ્યું હતું કે થોડા દિવસથી ગળામાં ખર્રાશ અનુભવાતી હતી.

જો કે બીજી કોઇ તકલીફ નથી. મારો કોરોના ટેસ્ટ પોઝિટિવ આવ્યો છે જ્યારે મિશેલનો કોરોના ટેસ્ટ નેગેટિવ આવ્યો છે. અમે બંને જણાએ કોરોનાની રસીનો બૂસ્ટર ડોઝ પણ લીધેલો છે. ઓબામાએ કોરોનાનો ચેપદર ઘટી રહ્યો હોવા છતાં અમેરિકનોને કોરોનાની રસી લેવા પ્રોત્સાહન આપ્યું હતું.

from Top Stories News - Gujarat Samachar : World's Leading Gujarati Newspaper https://ift.tt/3IWkfZU
via IFTTT