ગુજરાતમાં હોળી ટાણે જ માવઠું, કરાં પડયા

- વાતાવરણે રંગ બદલ્યો, ફાગણમાં અષાઢી માહોલ

- રાજ્યમાં અનેક સ્થળે હોળી પ્રગટાવાય તે પહેલાં જ તેને ઢાંકવાની નોબત આવી  ક્યાંક નદીમાં પૂર આવ્યું, ક્યાંક ચેકડેમ છલકાયા : કૃષિપાકનો કચ્ચરઘાણ

- દક્ષિણ ગુજરાતમાં કાળા ડિંબાગ વાદળો વચ્ચે અડધો કલાક સુધી સુસવાટાભેર પવન ફૂંકાયો  : કેરી પાકને સૌથી વધુ નુકસાન થશે

- સૌરાષ્ટ્રમાં વિસાવદર વિસ્તારમાં ત્રણ ઇંચથી વધુ વરસાદ : પોપટડી નદીમાં પૂર આવ્યું

અમદાવાદ : વેસ્ટર્ન ડિસ્ટર્બન્સ અને અરબી સમુદ્રમાં સક્રિય થયેલા ટ્રફની અસરથી અમદાવાદ સહિત રાજ્યભરના વાતાવરણમાં અચાનક પલટો આવ્યો છે. ફાગણી પૂનમ નિમિત્તે હોલિકા દહનની તૈયારીઓ અંતિમ તબક્કામાં હતી તો ક્યાંક હોલિકા દહન થઇ પણ ગયું હતું ત્યાં જ ગાજવીજ સાથે વરસાદ તૂટી પડયો હતો. હોળીના તહેવાર વખતે જ વરસાદ પડયો હોય તેવું વર્ષો બાદ બન્યું છે. હવામાન વિભાગની આગાહી અનુસાર આગામી ૩ દિવસ માવઠાની સંભાવના છે. ગુજરાતમાં ઠેરઠેર માવઠું થતાં, કરા પડતાં હાલત કફોડી બની હતી. ક્યાંક તો હોળી પ્રાગટય પહેલાં જ હોળીના લાકડાં, છાણાને ઢાંકવા પડે તેવી સ્થિતિ સર્જાઇ હતી. સૌરાષ્ટ્રમાં કોઇક સ્થળે ચેકડેમ છલકાયા હતા તો એકાદ નદીમાં પૂર પણ આવ્યું હતું.

અમદાવાદમાં આજે બપોર સુધી સામાન્ય વાતાવરણ હતું. પરંતુ  સાંજ પડતાં જ વાતાવરણમાં નાટયાત્મક પરિવર્તન આવ્યું હતું. જેના કારણે બપોરે ઉનાળો અને સાંજે ચોમાસું એમ કુદરતે સ્વિચ પાડીને વાતાવરણ બદલ્યું હોય તેવું ચિત્ર ઉભું થયું હતું. હોળીના પર્વ નિમિત્તે હોળાષ્ટકની તૈયારીઓ પણ પૂર્ણ થઇ ગઇ હતી અને ત્યાં જ વાતાવરણ પલટાયું હતું. જેના કારણે અનેક લોકોને છત્રી રાખીને હોળીના દર્શન કરવા પડયા હતા. હોળી પ્રગટાવાઇ હતી ત્યાં  ઠેકઠેકાણે પાણી પણ ભરાયા હતા. વરસાદ પડતાં કેટલાક સ્થળોએ છાણા પલળી જતાં હોલિકા દહનનું આયોજન બીજા દિવસ માટે સ્થગિત કરવાની પણ ફરજ પડી હતી.

અમદાવાદમાં આજે દિવસ દરમિયાન ૩૭.૬ ડિગ્રી સાથે સરેરાશ મહત્તમ તાપમાનમાં સામાન્ય કરતાં ચાર ડિગ્રીનો વધારો થયો હતો. આગામી ૩ દિવસ અમદાવાદમાં ૩૫થી ૩૭ ડિગ્રી વચ્ચે મહત્તમ તાપમાન રહેવાની સંભાવના છે. જોકે, ૧૧ માર્ચથી ગરમીમાં ખૂબ જ વધારો થવાની સંભાવના છે. આજે વાતાવરણમાં ભેજનું પ્રમાણ વધીને ૫૨ ટકા નોંધાયું હતું. આજે ૩૮.૩ ડિગ્રી સાથે ભૂજમાં સૌથી વધારે ગરમી નોંધાઇ હતી  જ્યારે રાજકોટમાં ૩૮.૨ ડિગ્રી સરેરાશ મહત્તમ તાપમાન નોંધાયું હતું. 

હવામાન વિભાગની આગાહી અનુસાર રાજ્યમાં હજુ ત્રણ દિવસ વરસાદી માહોલ રહેશે. મંગળવારે  બનાસકાંઠા, સાબરકાંઠા, અમરેલી, રાજકોટ, ગીર સોમનાથ, બોટાદ, ભાવનગર, જુનાગઢ, દીવ, ડાંગ, સુરત, તાપી, નર્મદા, નવસારી, વલસાડ, દમણ, દાદરા નગર હવેલીમાં માવઠાની આગાહી કરવામાં આવી છે. માવઠાને લીધે કેરી, ઘઉં સહિતના પાકને ખૂબ જ નુકસાન થવાની સંભાવના સેવાઇ રહી છે.

સૌરાષ્ટ્રમાં આજે સૂર્યાસ્ત પછી હોલિકાદહન થાય તે પૂર્વે વિજળીના પ્રચંડ કડાકા-ભડાકા સાથે રાજકોટ,અમરેલી, મોરબી જિલ્લામાં કમોસમી વરસાદ સાથે કરાં (બરફના ટૂકડાં) વરસતા હોળી ટાણે હૈયાહોળી સર્જાઈ હતી. હજારો સ્થળોએ છાણાં પાથરીને આયોજકોએ હોળી ગોઠવી હતી તે ભારે વરસાદમાં ભીંજાવા લાગતા તેને ઢાંકવા તાડપત્રી કે અન્ય રીતે દોડધામ મચી હતી અને સૌરાષ્ટ્રમાં પ્રથમવાર હોલિકા દહનના પર્વમાં માવઠાંનું વિઘ્ન આવ્યું હતું. સૌરાષ્ટ્રમાં આજે હોળીના પર્વની ખરીદી માટે બજારમાં ભીડ ઉમટી હતી ત્યારે વરસાદથી માલસામાન અને લોકો ભીંજાઈ ગયા હતા અને પર્વ ઉજવણીના ઉત્સાહ પર આકાશમાંથી ઠંડુ પાણી રેડાયું હતું. અમરેલી જિલ્લામાં ત્રીજા દિવસે કમોસમી માવઠાંથી અનેક માર્ગો પર પાણી ધસમસતું વહેતું થયું હતું. 

રાજકોટમાં ૭ મિ.મી. જેટલો વરસાદ પડયો હતો. શહેરમાં સાંજે છ વાગ્યે વરસાદ બાદ રાત્રે સાડા આઠે પણ વરસાદ ફરી આવ્યો હતો. રાજકોટ નજીકના કોટડાસાંગાણી રોડ ઉપર તો બરફના લેયર પથરાઈ ગયા હતા અને વસંત ઋતુમાં કાશ્મીર જેવું હવામાન સર્જાયું હતું. 

રાજકોટ જિલ્લાના ગોંડલમાં, મોરબી ઉપરાંત ટંકારા શહેર તેમજ જબલપુર, નસીતપર, લાલપર, આંદરણા સહિત ગ્રામ્ય વિસ્તારમાં આજે હવામાનમાં પલટા સાથે ગાજવીજ સાથે વરસાદ વરસ્યો હતો અને વરસાદ સાથે બરફના કરા પણ વરસ્યા હતા. 

અમરેલી જિલ્લામાં ત્રીજા દિવસે કમોસમી વરસાદનું જોર રહ્યું હતું. બગસરામાં આંધી અને ગાજવીજ સાથે આજે સાંજે રોડ પર જાણે નદી વહેવા લાગી હતી. અનેક ગામોમા બરફનાં કરાં વરસ્યા હતા. વરસાદનું જોર એવું હતું કે શેત્રુંજી નદીમાં ઉનાળા પૂર્વે પાણીની ભારે આવક થઈ હતી અને દલખાણીયા ગામે ચેકડેમ છલકાઈ ગયો હતો. 

જુનાગઢ જિલ્લામાં વિસાવદર શહેર અને ગ્રામ્ય પંથકમા ભારે વરસાદના અહેવાલ છે. ગ્રામ્યજનોએ જણાવ્યા અનુસાર તાલુકાના વેકરીયા, મુંડીયારાવણી, રાજપરા, લાલપુર સહિત ગ્રામ્ય વિસ્તારોમાં ત્રણથી ચાર ઈંચ જેટલો ધોધમાર વરસાદ વરસી ગયો છે. પોપટડી નદીમાં પૂર આવ્યું હતું. ખેડૂતોના પાકનો કચ્ચરઘાણ વળી ગયો હતો. 

હવામાન વિભાગ દ્વારા કરાયેલી આગાહીના પગલે આજે બપોરે સુરત શહેર સહિત સમગ્ર દક્ષિણ ગુજરાતના હવામાનમાં એકાએક પલ્ટો આવ્યો હતો. આકાશમાં કાળા ડિંબાગ વાદળો છવાવાની સાથે ધૂળની ડમરીઓ સાથે સુસવાટાભેર પવન ફુંકાતા ગાજવીજ વચ્ચે વરસાદ વરસતા ખેડૂતો અને શહેરીજનોમાં ચિંતાનું મોજુ ફરી વળ્યુ હતુ.કેરીના પાકને વ્યાપક નુકસાન થયું છે. સોમવારે સાંજે હોળી પ્રગટાવાય તે પહેલા જ ગાજવીજ સાથે વરસાદ પડતા ધૂળેટી જેવો માહોલ જોવા મળ્યો હતો. 

 બપોરે ત્રણ વાગ્યાના અરસામાં સુરત શહેર સહિત સમગ્ર દક્ષિણ ગુજરાતના સુરત, તાપી, નવસારી, વલસાડ, ડાંગ અને પડોશી સંઘપ્રદેશના હવામાનમાં અણધાર્યા ફેરફારો આવ્યા હતા. અચાનક આકાશમાં વાદળો છવાઇ ગયા હતા. ધૂળની ડમરીઓ ઉડવા સાથે સુસવાટાભેર પવન વચ્ચે તોફાની વરસાદ શરૂ થયો હતો. અડધો કલાક સુધી પૂરઝડપે પવન ફુંકાવાની સાથે વરસાદ વરસતા રસ્તાઓ પલળી જવા સાથે પાણી વહેતું થયું હતુ. અચાનક અડધો કલાક સુધી શહેરીજનોને બાનમાં લીધા હોઇ તેવા વાવાઝોડા સાથે વરસાદ વરસ્યો હતો. જો કે, સૌથી વધુ નુકસાન કેરીના પાકને થયું છે. હાલમાં આંબા પર મોર આવ્યો છે. અને આ મોર પર પાણી પડવાથી ખરાબ થવાની પુરેપુરી શકયતાઓ છે. સુરત જિલ્લામાં ૧૨ હજાર હેકટરમાં કેરીના પાકનું વાવેતર થાય છે. કેટલાક આંબા પર મોરવા પણ આવ્યા હોવાથી પાણી લાગવાથી કેરીની કવોલીટી બગડવાની શકયતા છે. 

આ વખતે ખરા અર્થમાં 'રેઇન' ડાન્સ !

*  આ વખતે ધૂળેટીએ જ વરસાદની આગાહીને લીધે ખરા અર્થમાં હોળી ખેલતી વખતે 'રેઇન' ડાન્સ કરવા મળશે. 

*  મેઘરાજા ખૂદ 'સેવ વોટર'નો સંદેશો ભૂલાવીને પાણીથી હોળી રમ્યા. 

*  જે પ્રકારે ચોમાસું જામ્યું છે એ જોતાં લાગે છે કે, ચોમાસું આસપાસ અને ઉનાળો બાયપાસ. 

આગામી 3 દિવસ ક્યાં વરસાદની આગાહી ?

૭ માર્ચ : બનાસકાંઠા, સાબરકાંઠા, અમરેલી, રાજકોટ, ગીર સોમનાથ, બોટાદ, ભાવનગર, જુનાગઢ, દીવ, ડાંગ, સુરત, તાપી, નર્મદા, નવસારી, વલસાડ, દમણ, દાદરા નગર હવેલી. 

૮ માર્ચ : અમદાવાદ, ગાંધીનગર, ડાંગ, સુરત, તાપી, નર્મદા, છોટા ઉદેપુર, વડોદરા, સુરેન્દ્રનગર, બોટાદ, ભાવનગર. 

૯ માર્ચ : અમદાવાદ, ગાંધીનગર, દાહોદ, ડાંગ. 

from Top Stories News - Gujarat Samachar : World's Leading Gujarati Newspaper https://ift.tt/m6Ki47r
via IFTTT