શિવ નાદર બન્યા દેશના સૌથી મોટા દાનવીર, આપ્યું રૂ.2024 કરોડનું દાન, અજીમ પ્રેમજી બીજા ક્રમાંકે, જુઓ યાદી

નવી દિલ્હી, તા.02 નવેમ્બર-2023, ગુરુવાર

એડલગીવ હુરુન ઈન્ડિયા ફિલાન્થ્રોપી લિસ્ટ-2023 (EdelGive Hurun India Philanthropy List 2023) જાહેર કરી દેવામાં આવ્યું છે. આ યાદી મુજબ દેશની દિગ્ગજ આઈટી કંપની એચસીએલ ટેકનોલોજીના ફાઉન્ડર અને ચેરમેન શિવ નાદર (Shiv Nadar) સૌથી મોટા દાનવીર તરીકે ઉભરી આવ્યા છે. શિવ નાદરે નાણાંકીય વર્ષ 2022-23 દરમિયાન 2024 કરોડ રૂપિયા દાનમાં આપ્યા છે, જે અગાઉના નાણાંકીય વર્ષ કરતા 76 ટકા વધુ છે. તેમણે નવા નાણાંકીય વર્ષમાં પ્રતિદિવસ સરેરાશ 5.6 કરોડ રૂપિયા દાન આપ્યું છે. 

અજીમ પ્રેમજી બીજા ક્રમાંકે, મુકેશ અંબાણી ત્રીજા ક્રમાંકે

યાદીમાં શિવ નાદર બાદ વિપ્રોના અજીમ પ્રેમજી (Azim Premji) બીજા નંબરે છે. તેમણે 2022-23માં કુલ 1774 કરોડ રૂપિયા દાન આપ્યું છે, જે ગત નાણાંકીય વર્ષના મુકાબલે 267 ટકા વધુ છે. ત્યારબાદ રિલાયન્સ ઈન્ડસ્ટ્રીઝ (Reliance Industries)ના ચેરમેન મુકેશ અંબાણી (Mukesh Ambani) ત્રીજા સ્થાને છે. તેમણે રિલાયન્સ ફાઈન્ડેશન દ્વારા 376 કરોડ રૂપિયા દાનમાં આપ્યા છે. યાદીમાં 12માં ક્રમાંક ધરાવતા સૌથી યુવા દાનવીર જીરોધાના નિખિલ કામથે (Nikhil Kamath) 112 કરોડ રૂપિયાનું દાન કર્યું છે. 

મહિલાઓમાં રોહિણી નિલેકણી પ્રથમ ક્રમાંકે

મહિલાઓ દ્વારા દાન કરવાની યાદીમાં રોહિણી નિલેકણિ (Rohini Nilekani) પ્રથમ ક્રમાંકે છે. તેમણે 170 કરોડ રૂપિયાનું દાન કર્યું છે. યાદી મુજબ તેઓ 10માં સ્થાને છે. રોહિણી નીલેકણી ઉપરાંત અન્ય દાનવીર મહિલાઓમાં અનુ આગા (Anu Aga)  અને લીના ગાંધી તિવારી (Leena Gandhi Tewari)એ 23 કરોડ રૂપિયાનું દાન કર્યું છે. આ બંને મહિલાઓ 40 અને 41માં ક્રમાંકે છે. કુલ દાનવીરોની યાદીમાં 7 મહિલાઓના નામ સામેલ છે.

કુલ 8445 કરોડ રૂપિયાનું દાન

નાણાંકીય વર્ષ 2022-23માં 119 ઉદ્યોગપતિઓ દ્વારા 5 કરોડથી વધુ દાન આપ્યું છે. તમામ લોકોના કુલ દાનની વાત કરીએ તો કુલ 8445 કરોડ રૂપિયાનું દાન કરવામાં આવ્યું છે. વર્ષ 2021-22ના મુકાબલે આ વર્ષે 59 ટકા વધુ દાન મળ્યું છે. 2022-23માં 14 ભારતીયોએ 100 કરોડથી વધુનું દાન કર્યું હતું.

from Top Stories News - Gujarat Samachar : World's Leading Gujarati Newspaper https://ift.tt/MywPZIU
via IFTTT