અનેક રાજ્યોમાં લોકડાઉનના પગલે શેર માર્કેટમાં ભારે ઘટાડો, સેન્સેક્સ 1,438 પોઈન્ટ તૂટ્યો

- આંતરરાષ્ટ્રીય માર્કેટમાંથી મળી રહ્યા છે મિશ્ર પ્રતિસાદ

નવી દિલ્હી, તા. 12 એપ્રિલ, 2021, સોમવાર

શેર માર્કેટ પર પણ કોરોનાના વધી રહેલા કેસનો ડર હાવી જોવા મળી રહ્યો છે. સપ્તાહના પહેલા દિવસે સોમવારે માર્કેટમાં ભારે ઘટાડો નોંધાયો છે. સવારે બોમ્બે સ્ટોક એક્સચેન્જનો સેન્સેક્સ 635 પોઈન્ટના ઘટાડા સાથે 48,956.65 પર ખુલ્યો હતો. ત્યાર બાદ સવારે 9:32 કલાકે સેન્સેક્સ 1,438 પોઈન્ટના ભારે ઘટાડા સાથે 48,153.72 થઈ ગયો હતો. 

આ જ રીતે નેશનલ સ્ટોક એક્સચેન્જની નિફ્ટી 190 પોઈન્ટના ઘટાડા સાથે 14,644.65 પર ખુલી હતી. સવારે 9:35 કલાકે 350 પોઈન્ટના ઘટાડા સાથે નિફ્ટી 14,384.40એ પહોંચી ગઈ હતી. 

તમામ સેક્ટર લાલ નિશાનમાં

તમામ સેક્ટરના સૂચકઆંક લાલ નિશાનમાં ચાલી રહ્યા છે. એનએસઈમાં શરૂઆતના વેપારમાં 1181 શેરોમાં ઘટાડો જ્યારે 386 શેરમાં તેજી જોવા મળી હતી. શેર માર્કેટમાં આ ભારે ઘટાડાનું કારણ દેશમાં વધી રહેલા કોરોનાના કેસ અને લોકડાઉનની ચિંતા છે. જો કે, આંતરરાષ્ટ્રીય માર્કેટમાંથી તો મિશ્ર પ્રકારના સંકેત મળી રહ્યા છે. એશિયાઈ શેર માર્કેટ સોમવારે નરમાશમાં ખુલ્યુ હતું જ્યારે અમેરિકી માર્કેટ રવિવારે ઉંચાઈ પર બંધ થયું હતું. 

શુક્રવારે પણ ઘટાડો નોંધાયેલો

ભારતીય શેર માર્કેટ શુક્રવારે સ્ટેબલ ખુલ્યુ હતું. સવારે બોમ્બે સ્ટોક એક્સચેન્જનો સેન્સેક્સ આશરે 3 પોઈન્ટના ઘટાડા સાથે 49,743.39 પર ખુલ્યો હતો. જો કે, સવારે 9:40 કલાક બાદ તે ગ્રીન નિશાનમાં પહોંચી ગયો હતો. ત્યાર બાદ બજારમાં ઉતાર-ચઢાવ રહ્યો હતો. ક્લોઝિંગ ટાઈમમાં સેન્સેક્સ 154.89 પોઈન્ટ ઘટીને 49,591.32 પર બંધ રહ્યો હતો. 

from Top Stories News - Gujarat Samachar : World's Leading Gujarati Newspaper https://ift.tt/3tcHUgy
via IFTTT