દિલ્હીમાં આજથી કર્ફ્યુ, એક સપ્તાહ માટે લાગશે આકરા પ્રતિબંધો

- કોરોનાના પ્રકોપ વચ્ચે DRDOએ દિલ્હીમાં સરદાર પટેલ કોવિડ હોસ્પિટલ બનાવી

નવી દિલ્હી, તા. 19 એપ્રિલ, 2021, સોમવાર

કોરોના વાયરસના વધી રહેલા સંકટ વચ્ચે દિલ્હીમાં ફરી એક વખત લોકડાઉન લાગુ કરવામાં આવ્યું છે. દિલ્હીમાં એક સપ્તાહ માટે લોકડાઉન લાગુ કરવામાં આવ્યું છે અને મુખ્યમંત્રી અરવિંદ કેજરીવાલ તેની સત્તાવાર જાહેરાત કરશે. 

પ્રાપ્ત અહેવાલ પ્રમાણે રાજધાની દિલ્હીમાં સોમવાર રાતથી 26 એપ્રિલ સુધી લોકડાઉન રહેશે. તેમાં વીકેન્ડ કર્ફ્યુમાં હતા તેવા આકરા નિયમો લાગુ રહેશે. ઉલ્લેખનીય છે કે, કોરોના સંકટના કારણે દિલ્હીની સ્થિતિ બેકાબૂ બની ગઈ છે. દિલ્હીની અનેક હોસ્પિટલમાં બેડ નથી કે ઓક્સિજન પણ નથી મળી રહ્યો. આ કારણે દિલ્હીમાં લોકડાઉનનો આકરો નિર્ણય લેવો પડ્યો છે. 

ઓક્સિજન અને રેમડેસિવીરની તંગીને લઈ દિલ્હી સરકારે એક્શન લીધી છે. એક કંટ્રોલ રૂમ બનાવવામાં આવી રહ્યો છે જેના અંતર્ગત સપ્લાયનો ડેટા રાખવામાં આવશે. સરકારે આ માટે નોડલ ઓફિસરની નિમણૂક કરી દીધી છે. 

કોરોનાના પ્રકોપ વચ્ચે DRDOએ દિલ્હીમાં સરદાર પટેલ કોવિડ હોસ્પિટલ બનાવી છે. હાલ ત્યાં શરૂઆતમાં 500 બેડ રાખવામાં આવ્યા છે જે પૈકીના 250 બેડ ભરાઈ પણ ગયા છે. અહીં ઓક્સિજન સપ્લાયની સાથે સાથે એર કંડિશનની સુવિધા પણ છે. બાદમાં બેડની સંખ્યા વધારીને 1,000 કરવામાં આવશે. 

from Top Stories News - Gujarat Samachar : World's Leading Gujarati Newspaper https://ift.tt/3n10kOZ
via IFTTT