કોવેક્સિનના બુસ્ટર ડોઝની ક્લીનિકલ ટ્રાયલને મળી કેન્દ્રની મંજૂરી

- બે ડોઝ લીધાના 6 મહિના બાદ બુસ્ટર ડોઝની મંજૂરી મળશે તો અનેક વર્ષ સુધી વાયરસ સામે રક્ષણ મળશે

નવી દિલ્હી, તા. 3 એપ્રિલ, 2021, શનિવાર

કોરોનાથી સંપૂર્ણપણે બચવા માટે વેક્સિનનો ત્રીજો ડોઝ લેવો પણ જરૂરી બની શકે છે. તેને બુસ્ટર ડોઝ નામ આપવામાં આવ્યું છે અને તે શરીરમાં એન્ટીબોડીનું પ્રમાણ અનેક ગણું વધારી શકે છે. તેના કારણે લાંબા સમય સુધી શરીરમાંથી એન્ટીબોડી ઓછા નહીં થાય. 

આ સમયે મળશે ત્રીજો ડોઝ

કેન્દ્રના નિષ્ણાંતોની ટીમે બુસ્ટર ડોઝની ક્લીનિકલ ટ્રાયલને મંજૂરી આપી દીધી છે. હૈદરાબાદ ખાતેની ભારત બાયોટેકના વૈજ્ઞાનિકોએ આ માટેનો અભ્યાસ પણ શરૂ કરી દીધો છે. હાલ 28 દિવસના અંતરમાં કોવેક્સિનના બે ડોઝ લીધા બાદ જ વેક્સિન કોર્સ પૂરો થાય છે. પરંતુ કેટલાક અભ્યાસમાં થયેલા દાવા પ્રમાણે શરીરમાં 3થી 6 મહિના સુધી જ એન્ટીબોડી રહે છે. આ સંજોગોમાં લાંબા સમય સુધી એન્ટીબોડી માટે બુસ્ટર ડોઝ જરૂરી છે. સમિતિના એક સદસ્યએ વેક્સિનના 2 ડોઝ લીધાના 6 મહિના બાદ બુસ્ટર ડોઝ લગાવી શકાશે તેવી માહિતી આપી હતી. 

ભારત બાયોટેકે પરીક્ષણમાં સામેલ લોકોને 6 મહિના સુધી ફોલોઅપ લેવા માટે પણ કહ્યું છે. જો આ અભ્યાસ સકારાત્મક રહેશે તો આગામી દિવસોમાં બુસ્ટર ડોઝ ઉપલબ્ધ થઈ શકે છે. સમિતિના સદસ્યોએ જણાવ્યું કે, બુસ્ટર ડોઝ અલગ નથી પરંતુ ત્રીજા ડોઝ સાથે એન્ટીબોડી બુસ્ટ થઈ શકે છે. 

વાયરસ હાવી નહીં થઈ શકે

અભ્યાસ પ્રમાણે બુસ્ટર ડોઝ બાદ વાયરસના વેરિએન્ટ્સ પણ શરીર પર હાવી નહીં થઈ શકે. સંક્રમણ બાદ કેટલાક સપ્તાહ સુધી એન્ટીબોડી રહે છે જ્યારે બુસ્ટર ડોઝ લીધા બાદ તે અનેક વર્ષો સુધી વાયરસ સામે રક્ષણ આપશે.  

from Top Stories News - Gujarat Samachar : World's Leading Gujarati Newspaper https://ift.tt/3meB5IR
via IFTTT