રશિયા-યુક્રેન યુદ્ધથી વૈશ્વિક અર્થતંત્ર ડામાડોળ થશે : આઈએમએફ

લવિવ, તા. ૬
યુક્રેન પર રશિયાના આક્રમણનો ૧૧મો દિવસ છે. બંને દેશ વચ્ચે શાંતિ મંત્રણાની બે બેઠક નિષ્ફળ ગયા પછી રશિયા વધુ આક્રમક બન્યું છે. રશિયન સૈન્ય હવે યુક્રેનમાં ત્રીજું પરમાણુ મથક કબજે કરવા આગેકૂચ કરી રહ્યું છે જ્યારે રશિયન સૈન્યે રવિવારે વિનિત્સિયા શહેર પર ભારે બોમ્બમારો અને મિસાઈલ હુમલો કર્યો હતો, જેમાં શહેરના નાગરિક ઝેલેન્સ્કી એરપોર્ટનો નાશ થયો હતો. આ હુમલાઓ વચ્ચે રવિવારે આંતરરાષ્ટ્રીય નાણાં ભંડોળ (આઈએમએફ)એ ચેતવણી આપી છે કે રશિયા-યુક્રેન યુદ્ધ અને ત્યાર પછી રશિયા પર મૂકાયેલા પ્રતિબંધોથી દુનિયાનું અર્થતંત્ર ડામાડોળ થઈ જશે. વર્તમાન સંકટથી મોંઘવારી માઝા મૂકશે.
આઈએમએફને ૧.૪ અબજ ડોલરના ઈમર્જન્સી ફંડ માટે અરજી
આઈએમએફે જણાવ્યું કે, કોરોનાના કારણે મુશ્કેલીમાં મુકાયેલા વૈશ્વિક અર્થતંત્રમાં વસ્તુઓના ભાવ પર પહેલાથી જ ઘણું દબાણ છે. એવામાં વર્તમાન સંકટથી મોંઘવારીનો દર વધી શકે છે અને આર્થિક પ્રવૃત્તિઓને આંચકા વાગી શકે છે. તેણે આશા વ્યક્ત કરી કે તેનું બોર્ડ આગામી સપ્તાહે યુક્રેનની ૧.૪ અબજ ડોલરની ઈમર્જન્સી ફન્ડિંગની અપીલ પર નિર્ણય કરશે. યુક્રેન પર રશિયાના આક્રમણ પછી અનાજ અને એનર્જીના ભાવ સતત વધી રહ્યા છે. આ યુદ્ધના કારણે દુનિયાભરના શૅરબજારોમાં છેલ્લા કેટલાક સપ્તાહથી સતત નરમાઈ જોવા મળી રહી છે. બીજીબાજુ દુનિયાભરની અનેક કંપનીઓ રશિયા અને યુક્રેનમાંથી કારોબાર સમેટી રહી હોવાથી પણ સ્થિતિ મુશ્કેલ બનશે.
પશ્ચિમી દેશોના પ્રતિબંધો રશિયા સામે યુદ્ધની જાહેરાત સમાન : પુતિન
રશિયન પ્રમુખ વ્લાદિમિર પુતિને ચેતવણી આપતા કહ્યું કે, મારિયુપોલમાં ગઈકાલે રશિયાએ યુદ્ધવિરામની જાહેરાત કરી હતી, પરંતુ યુક્રેને સીઝફાયરનો ભંગ કર્યો હતો. રશિયા સામે લડવાનું અને પશ્ચિમી દેશોનો સાથ મેળવવાનું યુક્રેનનું વલણ ચાલુ રહેશે તો આ દેશનું ભવિષ્ય અંધકારમય છે. તેમણે પશ્ચિમી પ્રતિબંધોને રશિયા વિરુદ્ધ યુદ્ધની જાહેરાત સમાન ગણાવ્યા હતા. પુતિને કહ્યું કે, યુક્રેનીઓ રશિયાનો પ્રતિકાર ચાલુ રાખશે તો એક દેશ તરીકે યુક્રેનના દરજ્જા પર સવાલ ઉઠાવવાનું તેઓ આહ્વાન કરશે. અને જો આવું થશે તો તેના માટે સંપૂર્ણપણે યુક્રેન જ જવાબદાર રહેશે. પુતિને રશિયાના અર્થતંત્રને નુકસાન પહોંચાડવા અને તેના ચલણને નરમ કરવા માટે લગાવાઈ રહેલા આર્થિક પ્રતિબંધો મુદ્દે પશ્ચિમી દેશોને આડેહાથ લીધા હતા.
ઈરપિનમાં રશિયન ગોળીબારમાં બે બાળકો સહિત ૩ નાગરિકોનાં મોત
બીજીબાજુ યુક્રેન પર સતત હુમલા ચાલુ રાખતા રશિયન સૈન્ય યુક્રેનના ત્રીજા પરમાણુ મથક પર કબજો જમાવવા માટે આગળ વધી રહ્યું છે. ઈરપિનમાં રશિયન ગોળીબારમાં બે બાળકો સહિત ત્રણ નાગરિકોનાં મોત નીપજ્યાં છે. વધુમાં યુક્રેનના ઓડેસા પોર્ટ સિટી પર હુમલા કરવા માટે રશિયાએ તૈયારી કરી લીધી છે. યુક્રેનના પ્રમુખ વોલોદિમિર ઝેલેન્સ્કીએ અમેરિકાના ૩૦૦ સાંસદો સાથે લગભગ એક કલાક સુધી વાતચીત કરતાં કહ્યું કે રશિયન સૈન્યે યુક્રેનના બે પરમાણુ ઊર્જા કેન્દ્રો પર કબજો મેળવી લીધો છે. ઝેલેન્સ્કીએ કહ્યું કે હવે ત્રીજું પરમાણુ મથક જોખમમાં છે. આ ન્યુક્લિયર પાવર પ્લાન્ટ યુઝ્નૌક્રનસ્કમાં સ્થિત છે. અગાઉ રશિયાએ યુક્રેનના એર્નોહોદાર ખાતે યુરોપનું સૌથી મોટું પરમાણુ મથક ઝેપોરિઝ્ઝિયા અને ચેર્નોબિલમાં ન્યૂક્લિયર પાવર પ્લાન્ટ પર કબજો જમાવેલો છે.
નાટો સમક્ષ ફરી યુક્રેનની એરસ્પેસને નો ફ્લાય ઝોન જાહેર કરવા માગ
યુક્રેનના પ્રમુખ વોલોદિમિર ઝેલેન્સ્કીએ અમેરિકા પાસે વધુ ફાઈટર પ્લેન મોકલવા અને રશિયન ક્રૂડની આયાત ઘટાડવા માટે ભાવુક અપીલ કરી હતી. ઝેલેન્સ્કીએ કહ્યું કે શક્ય છે કે આ તેનો અંતિમ વીડિયો હોય અને તેઓ કદાચ પોતાને છેલ્લી વખત જીવીત જોઈ રહ્યા છો. યુક્રેનને પોતાની હવાઈ સરહદની સુરક્ષા કરવા માટે વિમાનોની જરૃર છે. ઝેલેન્સ્કીએ નાટો યુક્રેનની એરસ્પેસને નો ફ્લાય ઝોન જાહેર કરે તેવી માગણી કરી હતી. જોકે, નાટોએ ઝેલેન્સ્કીની આ માગણી ફગાવી દીધી છે. નાટોનું કહેવું છે કે આમ કરવાથી યુદ્ધ વધુ વિકરાળ બની શકે છે. આ સિવાય ઝેલેન્સ્કીએ અમેરિકા પાસે વધુ ફાઈટર પ્લેનની માગણી કરી હતી.
ઈઝરાયેલના પીએમ, ફ્રાન્સના પ્રમુખ, તૂર્કીના પ્રમુખની પુતિન સાથે ચર્ચા
દરમિયાન યુક્રેન અને રશિયા વચ્ચે યુદ્ધ વિરામ માટે પ્રયાસ કરતાં ઈઝરાયેલના વડાપ્રધાન નફ્તાલી બેનેટ રશિયાના આકસ્મિક પ્રવાસેથી પાછા ફરી ગયા છે. બેનેટે પુતિન સાથે યુક્રેનના યુદ્ધ મુદ્દે ચર્ચા કરી હતી. બેનેટે પુતિન સાથેની મુલાકાત પછી યુક્રેનના પ્રમુખ ઝેલેન્સ્કી સાથે વાત કરી અને ત્યાર પછી જર્મન ચાન્સેલર ઓલાફ સ્કોલ્ઝને મળવા માટે જર્મની રવાના થઈ ગયા હતા. ત્યાં બેઠક કર્યા પછી તેઓ રવિવારે સવારે ઈઝરાયેલ પહોંચ્યા હતા. ઉપરાંત તૂર્કીના પ્રમુખ એર્દોગોને પણ પુતિન સાથે યુક્રેન મુદ્દે ચર્ચા કરી હતી. ફ્રાન્સના પ્રમુખ ઈમેન્યુઅલ મૈક્રોંએ પણ પુતિનને યુદ્ધ બંધ કરવા અપીલ કરી હતી.
અમેરિકા યુક્રેનને સોવિયેત સમયના વિમાનો આપશે
દરમિયાન યુક્રેનને સૈન્ય સહાય મુદ્દે અમેરિકા અને પોલેન્ડ વચ્ચે એક મોટો સોદો થયો છે. અમેરિકન મીડિયાએ દાવો કર્યો છે કે રશિયાનો સામનો કરવા માટે યુક્રેનને ફાઈટર પ્લેન અપાશે. આ બધા જ વિમાન સોવિયત યુગના હશે અને પોલેન્ડ મારફત આ વિમાનો યુક્રેનને અપાશે. જોકે, સત્તાવાર રીતે આ સોદા અંગે અમેરિકા અથવા પોલેન્ડે કોઈ પુષ્ટી કરી નથી. બીજીબાજુ યુક્રેને યુદ્ધના ૧૧મા દિવસે દાવો કર્યો હતો કે તેણે રશિયાના ૧૧,૦૦૦ સૈનિકોને મારી નાંખ્યા છે. યુક્રેનના સૈન્યના અંદાજ મુજબ આ યુદ્ધમાં રશિયાએ અત્યાર સુધીમાં ૨૮૫ ટેન્કો, ૯૮૫ આર્મર્ડ ફાઈટિંગ વ્હિકલ્સ, ૧૦૯ આર્ટીલરી, ૫૦ એમએલઆર, ૨૧ એન્ટી-એરક્રાફ્ટ વોરફેર, ૪૪ વિમાનો, ૪૮ હેલિકોપ્ટર્સ, ૪૪૭ કાર, ૨ સ્પીડ બોટ્સ, ૬૦ ઈંધણ ટેન્કો અને ૪ યુએવી ગુમાવ્યા છે.

from Top Stories News - Gujarat Samachar : World's Leading Gujarati Newspaper https://ift.tt/d81nrM5
via IFTTT