કર્ણાટકમાં આજે વિધાનસભાની તમામ 224 બેઠકો પર મતદાન

- મતદાન સવારે સાત વાગ્યે શરૂ થશે અને સાંજે છ વાગ્યે સમાપ્ત થશે

- કુલ 2615 ઉમેદવારો મેદાનમાં : સ્વતંત્ર અને નિષ્પક્ષ ચૂંટણી માટે કડક સુરક્ષા વ્યવસ્થા : 13 મેના રોજ પરિણામ

બેંગાલુરુ : કર્ણાટક વિધાનસભા ચૂંટણી માટે આવતીકાલે એટલે કે બુધવારે મતદાન થશે. મતદાન સવારે સાત વાગ્યાથી સાંજે ૬ વાગ્યા સુધી ચાલશે. વિધાનસભાની ૨૨૪ બેઠકો માટે ૫,૩૧,૩૩,૦૫૪ મતદારો પોતાના મતાધિકારનો ઉપયોગ કરશે. જેમાં ૨,૬૭,૨૮,૦૫૩ પુરુષ અને ૨,૬૪, ૦૦,૦૭૪ મહિલાઓ મતદાન કરશે.

કુલ ૧૧.૭૧ લાખ લોકો એવા છે કે જે પ્રથમ વખત મતદાન કરશે. મતદાન માટે સમગ્ર રાજ્યમાં ૫૮,૫૪૫ મતદાન કેન્દ્રોની રચના કરવામાં આવી છે. મતદાનનું પરિણામ ૧૩ મેના રોજ જાહેર કરવામાં આવશે.

ચૂંટણી મેદાનમાં ભારતીય જનતા પાર્ટી, કોંગ્રેસ, જનતા દળ (સેક્યુલર) સહિતના પક્ષોના કુલ ૨૬૧૫ ઉમેદવારો છે. જેમાં ૨૪૩૦ પુરુષોે અને ૧૮૪ મહિલાઓનો સમાવેશ થાય છે. 

ભાજપે તમામ ૨૨૪ બેઠકો પર ઉમેદવારો ઉભા રાખ્યા છે. કોંગ્રેસે ૨૨૩, આમ આદમી પાર્ટી તથા જનતા દળ(એસ)એ ૧૦૯-૧૦૯ બેઠકો પર ઉમેદવાર ઉભા રાખ્યા છે.  રાજ્યમાં કુલ ૧૧,૭૧,૫૫૮ યુવા મતદાતા છે જ્યારે ૫,૭૧,૨૮૧ દિવ્યાંગ  તથા ૧૨,૧૫,૯૨૦ મતદાતા ૮૦ વર્ષથી વધુ ઉંમરના છે. સમગ્ર રાજ્યમાં એક સાથે મતદાન માટે ચૂંટણી પંચ દ્વારા તમામ તૈયારીઓ પૂર્ણ કરી લેવામાં આવી છે. 

સ્વતંત્ર અને નિષ્પક્ષ ચૂંટણી કરાવવા માટે કડક સુરક્ષા વ્યવસ્થા ગોઠવવામાં આવી છે. રાજ્ય પોલીસ ઉપરાંત પેરા મિલિટરી ફોર્સ તથા પાડોશી રાજ્યોમાંથી પણ પોલીસ બોલાવવામાં આવી છે.

મતદાન માટે ૩ લાખ ચૂંટણી કર્મચારીઓ તૈનાત કરવામાં આવ્યા છે. મતદાન માટે કુલ ૭૫,૬૦૩ બેલેટ યુનિટ, ૭૦,૩૦૦ કન્ટ્રોલ યુનિટ, ૭૬,૨૦૨ વીવીપીએટી મૂકવામાં આવ્યા છે. 

આ અગાઉ રાજ્યના નેતાઓ અને ઉમેદવારોએ ભગવાનના આર્શિવાદ મેળવવા વિવિધ મંદિરોમાં પ્રાર્થના કરી હતી. ભાજપ ફરીથી સત્તામાં આવી ઇતિહાસ રચવા માગે છે જ્યારે કાંગ્રસ સત્તામાં પરત ફરવા માગે છે. વડાપ્રધાન મોદી સહિતના નેતાઓએ લોકોને મતદાન કરવાની અપીલ કરી હતી.

આવતીકાલે મુખ્યપ્રધાન બસવારાજ બોમ્માઇ, વિરોધ પક્ષના નેતા સિદ્ધારમૈયા, જેડી (એસ) નેતા એચ ડી કુમારસ્વામી, કર્ણાટક કોંગ્રેસ પ્રમુખ ડી કે શિવકુમારનું ભાગ્ય ઇવીએમમાં સીલ થઇ જશે.

ઉલ્લેખનીય છે કે કર્ણાટકમાં ૧૯૮૫થી સળંગ બીજી વખત કોઇ પણ પક્ષની સરકાર બની હતી. ભાજપ આવતીકાલની વિધાનસભા ચૂંટણી જીતીને આ પરંપરા તોડવા માગે છે.

કર્ણાટકમાં ચૂંટણી અગાઉ કુલ 375 કરોડનું દારૂ, ડ્રગ્સ, રોકડ, ભેટો જપ્ત

કર્ણાટકમાં વિધાનસભા ચૂંટણી અગાઉ કુલ ૩૭૫ કરોડ રૂપિયાનું દારૂ, ડ્રગ્સ, રોકડ ેઅને ભેટો જપ્ત કરવામાં આવી છે. આ રકમ અગાઉની વિધાનસભા ચૂંટણી કરતા ૪.૫ ગણી વધારે છે તેમ ચૂંટણી પંચે એક નિવેદનમાં જણાવ્યું છે. ૨૯ માર્ટે ચૂંટણી આચાર સંહિતા અમલમાં આવ્યા પછી ઇડીએ ૨૮૮ કરોડ રૂપિયાની મિલકતો ટાંચમાં લીધી છે. નાર્કોટિસ કન્ટ્રોલ બ્યુરોએ બિદાર જિલ્લામાંથી ૧૦૦ કીલો ગાંજો જપ્ત કર્યો હતો. અનેક જિલ્લાઓમાંથી સાડીઓ અને ફૂડ કિટ પણ જપ્ત કરવામાં આવી છે.

from Top Stories News - Gujarat Samachar : World's Leading Gujarati Newspaper https://ift.tt/PAWv7lO
via IFTTT