અમેરિકામાં ટેક્સાસના શોપિંગ મોલમાં હુમલાખોરે કર્યો અંધાધૂંધ ગોળીબાર, બાળકો સહિત 9 લોકો ઘવાયા

image : Envato

અમેરિકામાં ગોળીબારની ઘટનાઓ અટકવાનું નામ નથી લઈ રહી. આજે પણ ટેક્સાસના એક મોલમાં ભીષણ ગોળીબાર થયો હતો, જેમાં બાળકો સહિત નવ લોકો ઘાયલ થયા હતા. જો કે, પોલીસે હવે શંકાસ્પદને ઠાર કરી મોલને સુરક્ષિત કરી લીધો છે.

એક શકમંદ ઠાર 

એલન પ્રીમિયમ આઉટલેટ્સ મોલમાં ગોળીબાર બાદ પોલીસે મોરચો સંભાળ્યો હતો. એલન પોલીસ વિભાગે જણાવ્યું હતું કે મોલમાં સક્રિય તપાસ કામગીરી હાથ ધર્યા પછી ઘણી સુરક્ષા એજન્સીઓની સહાયથી મોલને સુરક્ષિત કરવામાં મદદ મળી છે. હવે કોઈ સક્રિય ખતરો નથી. ગોળીબારમાં ઘાયલ થયેલા નવ લોકોને સ્થાનિક હોસ્પિટલમાં દાખલ કરવામાં આવ્યા છે. 

લોકો પાર્કિંગમાંથી ચીસો પાડતા ભાગતા જોવા મળ્યા હતા

સ્થાનિક અહેવાલો અનુસાર ફાયરિંગમાં કેટલાય લોકો ઘાયલ થયા છે જેમાં ઘણાં બાળકો પણ સામેલ છે. સોશિયલ મીડિયા પર ફરતા એક વીડિયોમાં લોકો શોપિંગ સેન્ટરની સામેના પાર્કિંગમાંથી ભાગતા જોવા મળ્યા હતા. બેકગ્રાઉન્ડમાં મોટેથી બૂમો સંભળાય છે. અહેવાલો અનુસાર, એલન પ્રીમિયમ આઉટલેટ્સ ડલ્લાસથી લગભગ 25 માઇલ ઉત્તરમાં એક આઉટડોર મોલ છે.

અગાઉ પણ ફાયરિંગની ઘટના બની હતી 

અગાઉ 3 મેના રોજ એટલાન્ટામાં મેડિકલ સેન્ટરના 11મા માળે વેઇટિંગ રૂમમાં એક બંદૂકધારીએ ગોળીબાર કર્યા બાદ એક વ્યક્તિનું મોત થયું હતું અને અન્ય ચાર ઘાયલ થયા હતા. ઘટના વિશે માહિતી આપતાં એટલાન્ટા પોલીસ વિભાગના વડા ડેરિન શિરબૌમે જણાવ્યું હતું કે હુમલાખોરે પાંચ લોકોને ગોળી મારી હતી અને તેમાંથી એકનું ઘટનાસ્થળે જ મોત થયું હતું.

from Top Stories News - Gujarat Samachar : World's Leading Gujarati Newspaper https://ift.tt/8TMqgJW
via IFTTT