દક્ષિણમાં વરસાદ, પશ્ચિમમાં ગરમી, ઉત્તરમાં બરફવર્ષા, પૂર્વમાં વાવાઝોડું
- દેશમાં વિચિત્ર વાતાવરણ : કાશ્મીર, હિમાચલ, ઉત્તરાખંડમાં બરફવર્ષા
- બેંગ્લુરુ, દિલ્હી, લખનઉમાં વરસાદ, પ. બંગાળ, ઓડિશા, ઝારખંડમાં તોફાની હવા ફૂંકાઈ : રાજસ્થાન, મધ્યપ્રદેશ, બિહાર જેવા રાજ્યોમાં તાપમાન 40 ડિગ્રીની નજીક
નવી દિલ્હી : વેસ્ટર્ન ડિસ્ટર્બન્સના કારણે દેશના અલગ અલગ રાજ્યોમાં જુદા પ્રકારનું વાતાવરણ અનુભવાયું હતું. બંગાળની ખાડીમાં તોફાન સક્રિય થયું હોવાથી પશ્વિમ બંગાળ, ઓડિશાથી ઝારખંડ સુધીના રાજ્યોમાં તીવ્ર હવા ફૂંકાઈ હતી. કાશ્મીર, હિમાચલ અને ઉત્તરાખંડમાં બરફવર્ષા થઈ હતી. પશ્વિમના રાજ્યો સહિત કેટલાક વિસ્તારોમાં વરસાદ પડયો હતો. બિહાર, રાજસ્થાન, મધ્યપ્રદેશ જેવા રાજ્યોમાં તાપમાનનો પારો ૪૦ નજીક પહોંચતા આકરી ગરમીનો અનુભવ થયો હતો.
હવામાન વિભાગના કહેવા પ્રમાણે હિમાલયન રાજ્યોમાં બરફવર્ષા થઈ હોવાથી આગામી દિવસોમાં મેદાની વિસ્તારોમાં ગરમીથી રાહત મળશે. વેસ્ટર્ન ડિસ્ટર્નબન્સની અસર હેઠળ દેશના અલગ અલગ રાજ્યોમાં જુદુ જુદુ તાપમાન નોંધાયું હતું. બેંગ્લુરુમાં વરસાદ પડતા ઘણાં રસ્તાઓમાં ચોમાસામાં ભરાય એવું પાણી ભરાઈ ગયું હતું. તમિલનાડુ, કર્ણાટક, કેરળ, મહારાષ્ટ્રના ઘણાં સ્થળોએ ઝરમર વરસાદ પડયો હતો. દિલ્હીમાં પણ વરસાદ પડયો હતો.
લખનઉમાં વરસાદી ઝાપટાં પછી તાપમાન નીચું ગયું હતું. જોકે, ઉત્તર પ્રદેશના અન્ય વિસ્તારોમાં તાપમાનનો પારો ૪૦ની નજીક રહેતા ગરમીનો અનુભવ થયો હતો. મધ્યપ્રદેશમાં પણ ગરમી અનુભવાઈ હતી. રાજસ્થાનમાં કેટલાય સ્થળોએ તાપમાન ૪૦ની આસપાસ નોંધાયું હતું. પંજાબ-હરિયાણામાં ધૂળની ડમરી ઉઠી હતી. વરસાદી વાતાવરણ રહ્યું હતું. વાદળછાયા મોસમના કારણે ગરમીમાં રાહત મળી હતી.
પંજાબ, હરિયાણા ઉપરાંત મેઘાલય, તેલંગણા, આંધ્રપ્રદેશ, છત્તીસગઢ, ઓડિશા, પશ્વિમ બંગાળમાં બે દિવસ દરમિયાન વરસાદ પડવાની હવામાન વિભાગે શક્યતા વ્યક્ત કરી હતી. પશ્વિમ બંગાળ, ઓડિશા, ઝારખંડ, આંધ્રપ્રદેશ, તેલંગણામાં તીવ્ર હવા ફૂંકાશે. બંગાળની ખાડીમાં વાવાઝોડું સક્રિય થતાં માછીમારોને દરિયામાં ન જવાની સલાહ આપવામાં આવી હતી. પશ્વિમ બંગાળ અને ઓડિશાના દરિયામાં ૬૦ કિ.મી પ્રતિકલાકની ઝડપે પવન ફૂંકાયો હતો.
જમ્મુ-કાશ્મીર, હિમાચલ પ્રદેશ અને ઉત્તરાખંડમાં બરફવર્ષા થતાં જનજીવનને અસર થઈ હતી. હવામાન વિભાગના અધિકારીઓએ કહ્યું હતું કે આગામી દિવસોમાં મેદાની પ્રદેશોમાં ગરમી ઘટશે. દેશમાં વાતાવરણે પલટો લીધો હોવાથી એકાદ સપ્તાહ સુધી આકરી લૂની શક્યતા નહીંવત છે. વેસ્ટર્ન ડિસ્ટર્નબન્સ અને અલ નીનોની અસરના કારણે દેશમાં વાતાવરણ મિજાજ બદલાયો છે. મે મહિનામાં સૌથી ઓછી ગરમીનો રેકોર્ડ નોંધાયો છે.
from Top Stories News - Gujarat Samachar : World's Leading Gujarati Newspaper https://ift.tt/NQTOml0
via IFTTT
ટિપ્પણીઓ નથી: