શરારતી છોકરાઓ માનશે નહીં તો કૂચબિહાર જેવી ઘટના બની શકે છેઃ દિલીપ ઘોષનું વિવાદિત નિવેદન
- શરારતી છોકરાઓને એમ લાગે છે કે, કેન્દ્રીય દળના જવાનોએ હાથમાં રાઈફલ ખાલી દેખાડવા માટે રાખી છે
નવી દિલ્હી, તા. 12 એપ્રિલ, 2021, સોમવાર
બંગાળ ભાજપના પ્રદેશ અધ્યક્ષ દિલીપ ઘોષના એક નિવેદનને લઈ ભારે વિવાદ શરૂ થઈ ગયો છે. તેમણે પશ્ચિમ બંગાળમાં ચોથા તબક્કાના મતદાન દરમિયાન કૂચબિહાર ખાતે જે હિંસા થઈ તેને લઈ આ નિવેદન આપ્યું હતું. દિલીપ ઘોષે કહ્યું હતું કે, જો શરારતી છોકરાઓ માનશે નહીં અને કાયદો પોતાના હાથમાં લેશે તો આગામી તબક્કાના મતદાન દરમિયાન પણ કૂચબિહાર જેવી ઘટના બની શકે છે.
હકીકતે 10 એપ્રિલના રોજ પશ્ચિમ બંગાળની 44 બેઠકો માટે મતદાન થયું હતું. તે દિવસે કૂચબિહારના સિતાલકુચી ખાતે હિંસા ભડકી ઉઠી હતી. ત્યાર બાદ કેન્દ્રીય દળોએ ગોળીબાર કર્યો હતો જેમાં 4 લોકોના મોત થયા હતા. આ ઘટનાને લઈ દિલીપ ઘોષનું નિવેદન સામે આવ્યું છે.
ઉત્તર 24 પરગણા જિલ્લાના બારાનગર ખાતે એક કાર્યક્રમમાં દિલીપ ઘોષે કહ્યું હતું કે, 'આ શરારતી છોકરાઓ અહીં ક્યાંથી આવે છે? આ શરારતી છોકરાઓને સિતાલકુચીમાં ગોળી મારવામાં આવી. આ છોકરાઓ વધુ સમય સુધી બંગાળમાં નહીં રહે. આ શરારતી છોકરાઓને એમ લાગતું હતું કે, ચૂંટણી ડ્યુટી કરી રહેલા કેન્દ્રીય દળના જવાનોના હાથમાં રાઈફલ ફક્ત દેખાડવા માટે જ છે. સિતાલકુચીની ઘટના જોયા બાદ તેઓ ફરી આવી ભૂલ કરવાની હિંમત નહીં કરે. જે કોઈ કાયદો પોતાના હાથમાં લેવાની હિંમત કરશે તેના સાથે આવું જ બનશે.' સાથે જ તેમણે પાંચમા તબક્કામાં પણ આવું જ બનશે તેવી ચેતવણી આપી હતી.
વધુમાં કહ્યું હતું કે, 'દીદી ડરી ગયા છે. એટલે જ તેઓ ચૂંટણી પંચની નજરમાં આવવા કાયદાનું ઉલ્લંઘન કરવાનો પ્રયત્ન કરતા જોવા મળે છે. એ દિવસો ગયા જ્યારે લોકો તેમનાથી ડરતા હતા. હવે લોકો સવારથી લાઈનમાં ઉભા રહી જાય છે અને મતદાન કરે છે. મને આશા છે કે, 17 તારીખે પણ તમે સવારથી લાઈનમાં લાગી જશો અને મતદાન કરશો. ત્યાં કેન્દ્રીય દળના જવાનો હશે. તમને કોઈ ડરાવી નહીં શકે. અમે ત્યાં રહીશું. જો કોઈ એવું કરશે તો તમે સિતાલકુચીમાં શું બન્યું તે જોયું. દરેક જગ્યા સિતાલકુચી બની જશે.'
ઘોષની ધરપકડની માંગ
તૃણમૂલ કોંગ્રેસે દિલીપ ઘોષની ધરપકડ કરવાની માંગણી કરી છે. ટીએમસી નેતા સુખેંદુ શેખર રાયે કહ્યું કે, આ સંપૂર્ણપણે ઉશ્કેરણીજનક ભાષણ છે. આ પ્રકારના ભડકાઉ ભાષણને લઈ અધિકારીઓએ કાર્યવાહી કરવી જોઈએ અને દિલીપ ઘોષની ધરપકડ કરવી જોઈએ.
from Top Stories News - Gujarat Samachar : World's Leading Gujarati Newspaper https://ift.tt/3uI1yRX
via IFTTT
ટિપ્પણીઓ નથી: