સૌરાષ્ટ્રની ટીમ રણજી ટ્રોફીની સેમિફાઈનલમાં, રોમાંચક મેચમાં પંજાબને 71 રનથી હરાવ્યુ

Image : Facebook

અમદાવાદ, 5 ફેબ્રુઆરી 2023, રવિવાર

એક ખુબ જ રોમાંચક મેચમાં રણજી ટ્રોફીની ક્વાર્ટર ફાઈનલમાં સૌરાષ્ટ્રની ટીમે પંજાબને 71 રને હરાવ્યુ હતું. આ મેચ જીતીને સૌરાષ્ટ્રની ટીમ સેમિફાઈનલમાં પહોંચી ગઈ છે. આ મેચમાં ચારેય ઇનિંગ્સમાં મહત્વનું યોગદાન આપનાર પાર્થ ભુતને પ્લેયર ઓફ ધ મેચ જાહેર કરવામાં આવ્યો હતો.  સૌરાષ્ટ્ર હવે સેમિફાઈનલમાં કર્ણાટક સામે રમશે. આ સિવાય મધ્યપ્રદેશ અને બંગાળની ટીમ પણ સેમિફાઈનલમાં પહોંચી ગઈ છે.

આંધ્ર સામે મધ્ય પ્રદેશનો 5 વિકેટથી વિજય

આંધ્ર પ્રદેશને 5 વિકેટથી હરાવીને મધ્ય પ્રદેશે રણજી ટ્રોફીની સેમી ફાઇનલમાં પ્રવેશ મેળવ્યો છે. આંધ્ર પ્રદેશ પ્રથમ ઇનિંગમાં 379 રન કર્યા હતા. મધ્યપ્રદેશે 228 રન નોંધાવ્યા હતા. આમ આંધ્રપ્રદેશે 151 રનની સરસાઈ મેળવવા છતાં તેઓ હાર્યા હતા. આંધ્રપ્રદેશ બીજી ઇનિંગમાં 93 રનમાં જ ખખડયું હતું. મધ્યપ્રદેશે 245 રનનો ટાર્ગેટ 5 વિકેટ ગુમાવીને હાંસિલ કર્યો હતો. 

ઉત્તરાખંડ સામે કર્ણાટક એક ઇનિંગથી જીત્યુ

ઉત્તરાખંડને ક્વાર્ટર ફાઇનલમાં એક ઇનિંગ અને 281 રનથી ધરખમ પરાજય આપીને કર્ણાટક રણજી ટ્રોફીની સેમિ ફાઇનલમાં પ્રવેશ્યું હતું. ઉત્તરાખંડના પ્રથમ ઇનિંગના 116 રન સામે કર્ણાટકે 606 રન ખડકીને 490 રનની જંગી લીડ મેળવી હતી.

ઝારખંડને હરાવી બંગાળ રણજીની સેમિ ફાઇનલમાં પહોંચ્યુ હતું

ઝારખંડના પ્રથમ ઇનિંગના 173 રન સામે બંગાળે 328 રન સામે 155 રનની સરસાઈ મેળવી હતી. ઝારખંડ 7 વિકેટે 162 રનથી આગળ રમતા આજે 221 રનમાં ઓલઆઉટ થઈ ગયું હતું. બંગાળને જીતવા માટે 67 રનનો ટાર્ગેટ મળ્યો હતો. આ ટાર્ગેટ તેઓએ 1 વિકેટ ગુમાવીને પુરો કર્યો હતો. આ સાથે જ બંગાળની ટીમ રણજી ટ્રોફીની સેમિફાઈનલમાં પહોંચ્યુ હતું. 

from Top Stories News - Gujarat Samachar : World's Leading Gujarati Newspaper https://ift.tt/MGCmTwp
via IFTTT